ލަންޑަން (އޮގަސްޓް 10) - އިނގިރޭސި ފުޓްބޯޅަ ސީޒަން ފެށުމުގެ ގޮތުން ކުޅޭ ކޮމިއުނިޓީ ޝީލްޑް މެޗުގައި މެންޗެސްޓާ ޔުނައިޓެޑާ ދެކޮޅަށް ކުޅޭއިރު، މި މެޗު ފަސޭހަކޮށް ނުނަގާނެ ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
އެންމެ ފަހުން ތިން ފަހަރު ވެސް ސިޓީ ވަނީ ޝީލްޑް މެޗުން ބަލިވެފަ އެވެ. އެއީ ލެސްޓާ ސިޓީ އާއި ލިވަޕޫލްގެ އިތުރުން މިދިޔަ އަހަރު ޕެނަލްޓީ ޖަހައިގެން، އާސެނަލް އަތުންނެވެ.
ޖެހިޖެހިގެން ހަތަރު ވަނަ ފަހަރަށް ސިޓީން ޝީލްޑް މެޗަށް ނުކުންނައިރު، އެ ޓީމުގެ ކޯޗު ގާޑިއޯލާ އަށް މެޗުގެ ކުރިން އަމާޒުވި ސުވާލަކީ، މިއީ ސިޓީން އަހައްމިއްޔަތުކަމެއް ނުދޭ މެެޗެއްތޯ އެވެ.
ގާޑިއޯލާ ބުނީ، މިއީ ފައިނަލެއް ކަމަށާއި މޮޅުވާން ބޭނުންވާ ކަމަށެވެ.
"މި މެޗު މުހިންމު. މިއީ ފައިނަލެއް. ޔުނައިޓެޑާ ދެކޮޅަށް ކުޅެން މި ޖެެހެނީ، މި މެޗު ހަގީގަތުގައި ވޭ އަހަރެމެން ސީޒަން ބައްޓަންކުރަން ފަށާ މެޗަކަށް ވެސް. ބްރޭކަކަށް ފަހު ހަރުފަތަކަށް ފަހު ހަރުފަތެއް ކުޅުންތެރިން ކުރިއަރަން މަސައްކަތް ކުރާ މެޗަކަށް ވެސް. އަހަަރެމެން ފަސޭހަނުކުރާނަން،" ގާޑިއޯލާ ބުންޏެވެ.
ޔޫރޯ ފައިނަލުގައި ކުޅުުނު ސިޓީގެ ކުޅުންތެރިން ކަމަށްވާ ރޮޑްރީ، ކައިލް ވޯކާ، ޖޯން ސްޓޯންސް އަދި ފިލް ފޯޑެން އަދި ސިޓީގެ ޓީމު ފަރިތަކުރުންތަކުގައި ބައިވެރިވާން ނުފަށަ އެވެ. ކެވިން ޑި ބްރޭނާ ވެސް ޓީމުގެ ކޭމްޕާ ގުޅުނީ މީގެ ދުވަސް ކޮޅެއް ކުރިންނެވެ.
ޝީލްޑް މެޗުގައި އެންމެ ފަހުން ސިޓީ އާއި ޔުނައިޓެޑް ބައްދަލުކުރީ 2011 ވަނަ އަހަރު އެވެ. އެ ފަހަރު، ޔުނައިޓެޑުން ވަނީ 3-2 އިން ސިޓީ ބަލިކޮށްފަ އެވެ. މީގެ 77 ދުވަސް ކުރިން، ޔުނައިޓެޑުން ވަނީ، ސިޓީ ބަލިކޮށް އެފްއޭ ކަޕް ތަށި ވެސް އުފުލައިލައިފަ އެވެ.
ޔުނައިޓެޑްގެ ކޯޗު އެރިކް ޓެން ހާގް ބުނީ، ޝީލްޑް މެޗަކީ ވެސް ޓްރޮފީ އަކަށް ކުޅޭ ފައިނަަލަކަށްވާތީ، އޭނާ ޓީމު ތައްޔާރުކުރަނީ ވެސް އެ ވިސްނުމުގައި ކަމަށެވެ.
"ވާދަވެރިކޮށް ކުޅެ، މި ތަށި ހޯދޭނެ ޓީމެއް އަހަރެން ސެޓުކުރާނީ. މި ކާމިޔާބުކުރަން ބޭނުން،" މިދިޔަ ދެ ސީޒަނުގައި ޔުނައިޓެޑަށް ލީގު ކަޕާއި އެފްއޭ ކަޕް ހޯދައިދިން ކޯޗު ޓެން ހާގް ބުންޏެވެ.
ޔުނައިޓެޑުން މި މެޗަށް ނުކުންނައިރު އަނިޔާގެ މައްސަލަތައް ބޮޑެވެ. އެ ގޮތުން، އަލަށް ގެނައި ޑިފެންޑަރު، ލެނީ ޔޯރޯ ތިން މަހެއްހާ ދުވަހަށް ކުޅުމާ ދުރުގައި ހުރިއިރު، ފޯވާޑް ރަސްމުސް ހޮއިލުންޑް ވެސް ފިޓްވާން މަހެއްހާ ދުވަސް ނެގުމުގެ ފުރުސަތު އެބައޮތެވެ.
ޔުނައިޓެޑަކީ އެންމެ ގިނަ ފަހަރު ޝީލްޑް ކާމިޔާބުކުރި ޓީމެވެ. އެ ޓީމުން ވަނީ 21 ފަހަރު ޝީލްޑް އުފުލާލައިފަ އެވެ. ޝީލްޑް މެޗުގައި ސިޓީ އާއި ޔުނައިޓެޑް ބައްދަލުުކުރާ މެޗު ފަށާނީ މިރޭ ރާއްޖެ ގަޑިން 7 ޖަހާއިރު އެވެ.
