ލަންޑަން (އޮގަސްޓް 10) - ޓޮޓެންހަމް ހޮޓްސްޕާސް އިން ރެކޯޑް އަގަަކަށް ބޯންމައުތަށް ކުޅެމުން އަންނަ އިނގިރޭސި ފޯވާޑް، ޑޮމިނިކް ސޮލާންކޭ ގަންނަން ނިންމާފައިވާ ކަމަށް ރިޕޯޓްތައް ބުނެފި އެވެ.
ސޮލާންކޭ، 26، ގަންނަން ޓޮޓެންހަމް އިން ޖުމްލަ އެކު، 83 މިލިއަން ޑޮލަރު ހަރަދުކުރާނެ އެވެ. މިއީ މިހާތަނަށް ޓޮޓެންހަމް އިން ކުޅުންތެރިއަކު ގަންނަން ހޭދަކުރާނެ އެންމެ ބޮޑު އަދަދެވެ. އަނެއްކޮޅުން، މި އަގުގައި ސޮލާންކޭ، ޓޮޓެންހަމާ ގުޅިއްޖެނަމަ، މިއީ، ބޯންމައުތުން އެންމެ އަގުބޮޑުކޮށް ކުޅުންތެރިއަކު ވިއްކާލާނެ ޑީލެވެ.
ޗެލްސީ ޔޫތު ޓީމުގައި ވިދާލި ސޮލާންކޭ ދެން ގުޅުނީ ލިވަޕޫލްއާ އެވެ. ލިވަޕޫލުން 2019 ވަނަ އަހަރު ބޯންމައުތަށް ސޮލާންކޭ ވިއްކާލީ، 23 މިލިއަން ޑޮލަރަށެވެ. އެ ޑީލްގެ ދަށުން ލިވަޕޫލުން ވަނީ ކުރިއަށް އޮތްތަނުގައި، ސޮލާންކޭ އެހެން ޓީމަކަށް ވިއްކާލާނަމަ، ލިބޭ ފީގެ 20 ޕަސެންޓް އެ ޓީމަށް ލިބޭ ގޮތަށް އެއްބަސްވުމުގައި ހިމަނައިފަ އެވެ.
އިންގްލެންޑްގެ ސީނިއާ ޓީމަށް އެއް މެޗު ކުޅެދީފައިވާ ސޮލާންކޭގެ ކެރިއަރުގައި މިދިޔަ ސީޒަން ހާއްސަ އެވެ. އޭނާ ވަނީ 42 މެޗުން 21 ލަނޑު ޖަހައިފަ އެވެ.
ޓޮޓެންހަމް އަށް ކުޅޭ ބްރެޒިލްގެ ފޯވާޑް، ރިޗާލިސަން އަށް ސައުދީ ޕްރޯ ލީގުގެ ކްލަބްތަކުން ލިބުނު އޮފާ އޭނާ ވަނީ ދޫކޮށްލައިފަ އެވެ.
