ފްލޮރެންސް، އިޓަލީ (އޮގަސްޓް 9) - މެންޗެސްޓާ ޔުނައިޓެޑްގެ ކޮންޓްރެކްޓް ހަމަވުމުން އެއްވެސް ޓީމަކާ ނުގުޅެ އެއް އަހަރު ކުޅުމާ ދުރުގައި ހުރި ސްޕެއިނުގެ ގޯލްކީޕަރު ޑޭވިޑް ޑެހެއާ، އިޓަލީގެ ފިއޮރެންޓީނާ އިން ދިން އޮފާ ގަބޫލުކޮށް، އެ ޓީމާ ގުޅެން ނިންމާފައިވާ ކަމަށް ރިޕޯޓްތައް ބުނެފި އެވެ.
ޑެހެއާ, ޔުނައިޓަޑާ ވަކިވީ އެ ކްލަބުގައި 12 އަހަރު ހޭދަކުރުމަށް ފަހު އެވެ. ޖުމްލަ 545 މެޗާ އެކު، ޑެހެއާ އަކީ ޔުނައިޓަޑްގެ ތާރީހުގައި ވެސް ކްލަބަށް އެންމެ ގިނަ މެޗު ކުޅުނު ގޯލްކީޕަރެވެ. ޑެހެއާ ވަނީ އެ ކްލަބުގެ ކުޅުންތެރިން ހޮވާ މޮޅު ކުޅުންތެރިޔާގެ އެވޯޑާއި ސަޕޯޓަރުން ހޮވާ މޮޅު ކުޅުންތެރިޔާގެ އެވޯޑް ހަތަރު ފަހަރު ހޯދައިފަ އެވެ.
އަލުން އަނބުރާ ޔުނައިޓެޑަށް ދެވޭނެ މަގެއް އޮތްތޯ ބަލަން، އޭނާ މިދިޔަ ސީޒަނުގައި ހުރީ މަޑުކޮށްގެންނެވެ. އިންޑިވިޖުއަލް ޓްރެއިނިންތައް ނަގައި، ސްޕެއިނުގެ ބައެއް ކްލަބްތަކުގެ ޓްރެއިނިން ސެންޓަރު ބޭނުންކުރި އެވެ.
އެކަމަކު، ޔުނައިޓެޑުން އޮފާއެއް ނާންނާތީ، އެންމެ ފަހުން، ޑެހެއާ މި ވަނީ ފިއޮރެންޓީނާ އިން ދިން އެއް އަހަރުގެ ކޮންޓްރެކްޓް ގަބޫލުކުރަން ނިންމައިފަ އެވެ. އެ އެއްބަސްވުމުގައި ވަނީ، ޑެހެއާ އާއި ފިއޮރެންޓީނާ އިން ބޭނުންނަމަ އިތުރު އެއް އަހަރަށް ކޮންޓްރެކްޓް އާ ކުރެވޭ ގޮތަށް ހިމަނައިފަ އެވެ.
މީގެ ދެ ހަފްތާއެއްހާ ދުވަސްކުރިން، އިޓަލީގެ ޖެނޯއާ އިން ވެސް ޑެހެއާގެ ސޮއި ހޯދަން މަސައްކަތްކުރި ނަމަވެސް ކާމިޔާބެއްނުވި އެވެ. އަދި މިދިޔަ ސީޒަނުގައި ނިއުކާސަލް ޔުނައިޓެޑުން ވެސް ކުރު ކޮންޓްރެކްޓެއްގައި ޑެހެއާ ގެންދަން މަސައްކަތް ކޮށްފައިވެ އެވެ.
