ރައީސް ޑރ. މުހައްމަދު މުއިއްޒުގެ ސަރުކާރުން ރައްޔިތުންނަށް ގެއްލުންވާ ގޮތަށް ކުރަމުންދާ ކަންކަން ހުއްޓުވައި ގައުމު ހަމަ މަގަށް އެޅުވުމަށްޓަކައި، އެންމެ ބޮޑު އިދިކޮޅު ޕާޓީ، އެމްޑީޕީން "ސީދާ ހަރަކާތަށް" ދިޔުމުގެ އަމާޒު ކަނޑައަޅައިފި އެވެ.
އެމްޑީޕީން ރޭ ބޭއްވި ގައުމީ މަޖިލީހުގެ ޖަލްސާގައި މެންބަރުން ކަންބޮޑުވުން ފާޅުކުރީ ކުންފުނިތަކުން މުވައްޒަފުން ވަކިކުރާތީ އާއި ރަށްރަށުގައި ފަށާފައިވާ މަޝްރޫއުތައް ހުއްޓާލާފައިވާތީ އާއި ސަރުކާރުން އަމިއްލަ ކުންފުނިތަކަސް ފައިސާ ނުދޭތީ އަދި ރައީސް މުއިއްޒު ވައުދުވި ގޮތަށް ކަންކަން ހިންގަމުން ނުދާތީ އެވެ.
އެމްޑީޕީގެ ތިމަރަފުށީ ދާއިރާގެ ރައީސް އަންވަރު އިބްރާހިމް ގައުމީ މަޖިލީހުގައި ވިދާޅުވީ ރައީސް މުއިއްޒުގެ މެނިފެސްޓޯ ހާސިލު ނުކުރެވޭ ކަމަށް ވާނަމަ އެކަމުގެ ވާހަކަތައް އިދިކޮޅު ޕާޓީއެއްގެ ގޮތުން އެމްޑީޕީން ދައްކަންޖެހޭ ކަމަށެވެ. އެންމެ ބޮޑު މައްސަލައެއްގެ ގޮތުގައި އޭނާ ފާހަގަ ކުރެއްވީ ކުންފުނިތަކުން މުވައްޒަފުން ވަކިކުރުމެވެ.
"ފެނަކަ އާއި ދެން ހުރި ކުންފުނިތަކުން ވެސް ވަކިކުރަމުން އެ ދަނީ މި ޕާޓީގެ މެންބަރުން،" އޭނާ ވިދާޅުވި އެވެ.
އެމްޑީޕީގެ މަޑުއްވަރީ ދާއިރާގެ ރައީސް މޫސާ އަލީ މަނިކު (މޫކޭ) ވިދާޅުވީ އާރުޑީސީން 500 މުވައްޒަފުން ވަކިކުރަން މަސައްކަތް ކުރަމުންދާ ކަމަށެވެ.
"މި ގައުމު ފުނޑިގެންދާއިރު އެންމެ ބޮޑު ޒިންމާއެއް އޮތީ އެމްޑީޕީގައި އެހެންވެ. ސީދާ ހަރަކާތަށް ދާން ގޮވާލަން،" އާރުޑީސީގެ ކުރީގެ އެމްޑީ މޫކޭ ވިދާޅުވި އެވެ
"މި ޕާޓީގެ އިސްވެރިންނާއި މެންބަރުން ފިޔަވައި އެކަމަށް ފަރިތަ ބަޔަކު ނުތިބޭނެ."
މި މަހުގެ ނިޔަލަށް ފެނަކަ ކޯޕަރޭޝަނުން ވެސް 731 މީހުން ވަކިކުރަން ވަނީ ނޯޓިސް ދިފަ އެވެ.
އެމްޑީޕީގެ ޗެއާޕާސަން އަދި ކުރީގެ އިކޮނިމިކް މިނިސްޓަރު ފައްޔާޒު އިސްމާއީލް ވިދާޅުވީ ސަލާމަތުގެ އައްސޭރިއަށް ރީތިކޮށް ގެންދެވެން އޮތް ގައުމެއް، ގޮސް ބޮޑު އަނދަވަޅަކަށް ވައްޓާލާތަން ބަލަން އިތުރަށް ނުތިބެވޭނެ ކަމަށެވެ.
"އަޅުގަނޑުމެންނަށް ތިބެން ދަތިވޭ، އާންމު ރައްޔިތުންނަށް ބޮޑެތި އަނިޔާތައް ދޭން ފަށާ ހިސާބުން. މީހުން ވަޒީފާތަކުން ކަނޑަނީ. އެއްޗެހީގެ އަގު އެތައް ގުނައެެއ ބޮޑުވެން މިދަނީ. ކުރިއަށް އޮތް ތަނުގައި ކޮންޓްރެކްޓަރުންނާއި އެ މީހުންގެ ވަޒީފާގައި ތިބި މުވައްޒަފުންނަށް މުސާރަ ދެވޭނެ ކަމެއް ނޭނގޭ. އެހެންވީމާ އަޅުގަނޑުމެން ތައްޔާރުވާންޖެހޭ މި ނޫން ހާލަތަކަށް ސަރުކާރަށް މި ވާހަކަ އަޑުއިއްވަން،" ފައްޔާޒު ވިދާޅުވި އެވެ.
ވަޒީފާއިން ވަކިކުރާތީ ފަސް މެންބަރުންގެ ކޮމިޓީއެއް
ސަރުކާރުގެ ކުންފުނިތަކުން ވަކިކުރާ މުވައްޒަފުންނަށް އިންސާފު ހޯދައި ދިނުމުގެ މަސައްކަތް ކުރަން އެމްޑީޕީގެ ގައުމީ މަޖިލީހުން ރޭ ކޮމިޓީއެއް އުފެއްދި އެވެ. އެ ކޮމިޓީގައި ތިއްބެވީ ޕާޓީގެ ނައިބު ރައީސް ހިސާން ހުސައިން، ލީގަލް ޑިރެކްޓަރު މަހްފޫޒު ސައީދު، ކެންދޫ ދާއިރާގެ މެންބަރު މައުރޫފް ޒާކިރު، އަލިފުށީ ދާއިރާގެ ކުރީގެ މެންބަރު މުހައްމަދު ހުސައިން ރަޝީދު (ބިގޭ) އަދި އެމްޑީޕީގެ ކުޑަހުވަދޫ ދާއިރާގެ ރައީސް ޝާތިރު އަބްދުއްރަހްމާން އެވެ.
ފައްޔާޒު ވިދާޅުވީ މި ކޮމިޓީއަކީ ރައްޔިތުންގެ އަޑުއިއްވުމަށް މިހާރަށް ވުރެ އިތުރު މަސައްކަތްތަކެއްކޮށް، ސީދާ ހަރަކާތަށް ދާންޖެހުނަސް އެކަމަށް ތައްޔާރުވުމަށްޓަކައި އުފެއްދި ކޮމިޓީއެއް ކަމަށެވެ.
ރަށްރަށުގެ ހާލަތު ސަރުކާރަށް އަންގައި ދިނުމަށް ހަފުތާއަކު އެއްފަހަރު ގައުމީ މަޖިލީހުގެ ޖަލްސާއެއް ވެސް ބާއްވާނެ ކަމަށް އޭނާ ވިދާޅުވި އެވެ.
"މި ގައުމު ސަލާމަތް ކުރާނެ ޕާޓީއަކީ އަޅުގަނޑުމެން، އެމްޑީޕީ،" ފައްޔާޒު ވިދާޅުވި އެވެ.
