ފަލަސްތީނުގައި ހިންގަމުން އަންނަ ގަތުލުއާމު ނިމުމަކަށް ގެނެވޭނީ އެއްވެސް ގައުމެއް އިސްތިސްނާ ނުވެ ބައިނަލްއަގުވާމީ ގާނޫނުތައް ތަންފީޒުކުރުމުން ކަމަށް ފޮރިން މިނިސްޓަރު މޫސާ ޒަމީރު އިއްޔެ ވިދާޅުވެއްޖެ އެވެ.
ފޮރިން މިނިސްޓަރު ޒަމީރު މިހެން ވިދާޅުވީ ސައުދީގެ ޖިއްދާގައި ބޭއްވި އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ ހާރިޖީ ވަޒީރުންގެ އޯޕަން އެންޑް އެކްސްޓްރާ އޯޑިނަރީ ބައްދަލުވުމުގަ އެވެ.
އޯއައިސީގެ ބައްދަލުވުމުގައި ޒަމީރު ވަނީ އިޒުރޭލުން ފަލަސްތީނުގައި ހިންގާ ގަތުލުއާމު ހަރުކަށި އިބާރާތުން ކުއްވެރިކޮށް، އެ އަމަލު މިހާރުން މިހާރަށް ހުއްޓާލުމަށް ގޮވާލާފަ އެވެ. އަދި ފަލަސްތީނުގެ ރައްޔިތުންނަށް ބޭނުންވާ އަސާސީ ހައްގުތައް އެ ރައްޔިތުންނަށް ލިބޭނެކަން ކަށަވަރު ކުރުމަކީ މިވަގުތައް އެންމެ މުހިންމު ކަންތައް ކަމުގައި އޭނާ ވިދާޅުވި އެވެ.
"ވަކި ގައުމެއް ނުވަތަ ގައުމުތަކެއް އިސްތިސްނާ ނުވާނެހެން ބައިނަލްއަގުވާމީ ގާނޫނާއި ބައިނަލްއަގުވާމީ އިންސާނީ ހައްގުތަކާބެހޭ ގާނޫނު ތަންފީޒުކުރުމަކީ ބައިނަލްއަގުވާމީ މުޖުތަމައުގެ ޒިންމާއެއް." ޒަމީރު ވިދާޅުވި އެވެ.
"ހަމައެއާއެކު، ހަނގުރާމަ ވަގުތުން ހުއްޓާލާ، ފަލަސްތީނު ރައްޔިތުންގެ ޒަރޫރީ ބޭނުންތަކަށް ބޭނުންވާ އަސާސްތައް އެ ރައްޔިތުންނަށް ފޯރާކަން ކަށަވަރުކުރުމަކީ މި ވަގުތަށް އެންމެ މުހިންމު އެއް ކަންތައް."
ޒަމީރުގެ ތަގުރީރުގައި އޭނާ ވަނީ ރާއްޖެ އަބަދު ވެސް މަސައްކަތް ކުރާނީ ފަލަސްތީނުގެ ހައްގުގާ ކަމަށާއި ފަލަސްތީނުގެ މައްސަލައަށް ދާއިމީ ހައްލެއް ލިބެންދެން ދެ ގޮތެއް ނުވެ އެ ގައުމާއެކީ ތިބޭނެ ކަމަށް މިނިސްޓަރުގެ ތަގުރީރުގައި ފާހަގަކުރި އެވެ.
އޭނާ ވިދާޅުވި ގޮތުގައި މި ހަމަނުޖެހުމަށް އޮތް ހަމައެކަނި ހައްލަކީ 1967 ގައި ފަލަސްތީނުގެ ބޯޑަރު އޮތް ގޮތަށް، އަދި އިރުމަތީ ގުދުސް އަކީ އެ ގައުމުގެ ވެރިކަން ކުރާ ރަށަށް ކަމަށް ކަނޑައަޅައި، އިޒުރޭލުގެ އަތުން ފަލަސްތީނު މިނިވަންވެ އަމިއްލަ މުސްތަގިއްލު ގައުމަކަށް ހެދުމެވެ.
ހަމާސްގެ ޗީފް އޮފް ޕޮލިޓިކަލް ބިއުރޯ، އިސްމާއިލް ހަނިއްޔާ އަވަހާރަކޮށްލައިފައިވާތީ، އެ ކަން ވެސް މިނިސްޓަރު ވަނީ މި ބައްދަލުވުމުގައި ކުށްވެރިކުރައްވާފަ އެވެ.
އޯއައިސީއަކީ ފަލަސްތީނު ރައްޔިތުންގެ ހައްގުގައި މެދުކެނޑުމެއްނެތި ވަކާލުތުކުރަމުންދާ 57 މެމްބަރު ގައުމުތަކުގެ މައްޗަށް އެކުލެވޭ ޖަމިއްޔާއެކެވެ. ދިވެހިރާއްޖެ އޯއައިސީގެ މެމްބަރު ގައުމަކަށްވީ 1976 ވަނަ އަހަރެވެ.
އިޒުރޭލުން ހިންގާ މި ގަތުލު އާމުގައި މިހާރު އެތައް ފަލަސްތީނުގެ ކުށެއް ނެތް އެތައް ރައްޔިތުންނެއް ޝަހީދުކޮށްލައިފި އެވެ. ޝަހީދުކޮށްލި މީހުންގެ ތެރޭގައި ގިނައީ ކުޑަކުދިންނާއި އަންހެނުންނެވެ.
