ޣައްޒާއަށް އިސްރާއީލުން ދިން ހަމަލާތަކެއްގައި އަލްޖަޒީރާގެ ކެމެރާމަނަކާއި ކުޑަކުއްޖަކު ހިމެނޭހެން ހަ މީހުން މަރުވެފައިވާ ކަމަށް ސިއްހީ އޮފިޝަލުންނާއި މީހުން ސަލާމަތްކުރާ ފަރާތްތަކުން ބުނެފި އެވެ.
ހޮނިހިރު ދުވަހު ޣައްޒާގެ މެދުތެރޭގައި ހުރި ގެއަކަށް ދިން ހަމަލާއެއްގައި އަލްޖަޒީރާގެ ކޮރެސްޕޮންޑެންޓް އަހުމަދު ވިޝާހް މަރާލާފައި ވާތީ، އެ "ލާއިންސާނީ ޖަރީމާ" ވަނީ އެ ނޫހުން ކުށްވެރިކޮށްފަ އެވެ.
އިސްރާއީލް ޑިފެންސް ފޯސަސް (އައިޑީއެފް) އިން ތުހުމަތުކުރާ ގޮތުގައި ވިޝާހް އަކީ "ހަމާސްގެ އަސްކަރީ ގޮފީގެ ސްނައިޕަރެއްގެ ގޮތުގައި މަސައްކަތް ކުރި ޓެރަރިސްޓެކެވެ."
ތަފާސްހިސާބުތަކުން ދައްކާ ގޮތުގައި، މިދިޔަ އޮކްޓޯބަރު މަހު އިސްރާއީލާއި ހަމާސްއާ ދެމެދު ހަނގުރާމަ ހުއްޓާލުމުގެ އެއްބަސްވުމަކަށް އައި ފަހުން ވެސް އިސްރާއީލް ސިފައިން ވަނީ 1,007 މީހުން މަރާލާފަ އެވެ.
އަލްޖަޒީރާއިން ބުނީ ހޮނިހިރު ދުވަހު ވިޝާހް މަރާލުމަކީ "ބައިނަލްއަގުވާމީ ހުރިހާ ގާނޫނުތަކާއި އުސޫލުތަކާ ހިލާފަށް ހިންގި އަމަލެއް" ކަމަށާއި، މިއީ ނޫސްވެރިންނަށް އަމާޒުކޮށް ހަގީގަތުގެ އަޑު ކަނޑުވާލުމަށް އިސްރާއީލުން ގެންގުޅޭ ނިޒާމީ ސިޔާސަތެއް ކަމަށެވެ.
އައިޑީއެފް އިން ބުނި ގޮތުގައި، ވިޝާހް ވަނީ ފާއިތުވި މަސްތަކުގައި އިސްރާއީލް ސިފައިންނަށް އަމާޒުކޮށް ސްނައިޕަރު ހަމަލާތަކެއް ދިނުމަށް ރާވާފަ އެވެ. ނަމަވެސް މިކަމުގެ އެއްވެސް ހެއްކެއް އިސްރާއީލުން ދައްކާފައެއް ނުވެ އެވެ.
ބުރައިޖް ރެފިއުޖީ ކޭމްޕުގައި ހުރި ގެއަކަށް ދިން މި ހަމަލާގައި ވިޝާހްގެ އިތުރުން ދެ މީހަކު މަރުވެފައިވާ ކަމަށް އެ ސަރަހައްދުގެ ހޮސްޕިޓަލަކުންނާއި ހަމާސްއިން ހިންގާ ސިވިލް ޑިފެންސް އެޖެންސީން ބުނެ އެވެ. އައިޑީއެފް އިން ވަނީ މަރުވި އަނެއް ދެ މީހުންނަކީ ވެސް ހަމާސްގެ މެންބަރުން ކަމަށް ތުހުމަތުކޮށްފަ އެވެ.
ވިޝާހްގެ ކޮއްކޮ މުހައްމަދު ވެސް ވަނީ މިދިޔަ އޭޕްރިލް މަހު އިސްރާއީލުން ދިން ހަމަލާއެއްގައި މަރުވެފަ އެވެ. އޭނާއަކީ ވެސް އަލްޖަޒީރާގެ ކޮރެސްޕޮންޑެންޓެކެވެ. އިސްރާއީލުން ބުނެފައިވަނީ އޭނާއަކީ ވެސް ހަމާސްގެ ރޮކެޓާއި ހަތިޔާރު އުފައްދާ މަރުކަޒުގައި މަސައްކަތް ކުރި މީހެއް ކަމަށެވެ. ނަމަވެސް އެކަމުގެ އިތުރު ތަފްސީލެއް ދީފައެއް ނުވެ އެވެ.
