މި ގައުމަށް ގެއްލުންވަމުން ދަނީ މި ސަރުކާރުގެ ގޮތެއް ނެތުމުން ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު މިރޭ ވިދާޅުވެއްޖެ އެވެ.
މިރޭ ކުރިއަށްދާ އެމްޑީޕީގެ ގައުމީ މަޖިލިސް ބައްދަލުވުމުގައި ޝާހިދު ވިދާޅުވީ އިންޑިއާގެ ހާރިޖީ ވަޒީރު ސުބްރަމާނިއަމް ޖައިޝަންކަރު ހުކުރު ދުވަހު ރާއްޖެއަށް ރަސްމީ ދަތުރުފުޅެއް ކުރައްވާއިރު ސަރުކާރުގެ ސަބަބުން ރާއްޖެ އާއި އިންޑިއާއާ ދެމެދު އޮތް ގުޅުން ގޯސްވެ ރާއްޖެއަށް ބޮޑެތި ގެއްލުންތައް ލިބިފައިވާ ކަމަށެވެ.
"ހަނދުމަފުޅު ކުރައްވާތި ރާއްޖޭގެ ރައްޔިތުންނަށް މި ސަރުކާރުގެ ގޮތެއް ނެތްކަމުން ލިބެމުންދާ ގެއްލުންތައް. އިންޑިއާއިން ރާއްޖެ އަންނަ ޓޫރިސްޓުންގެ އަދަދު 43 ޕަސަންޓު ދަށަށް ގޮސްފައި މިވަނީ. އޭގެ ސަބަބުން ރިސޯޓުތައް ފަޅުވެ ރިސޯޓުތަކުގެ އޮކިއުޕެންސީ މިދިޔަ ދުވަސްތަކުގައި މިވަނީ އިންތިހާއަށް ދަށަށް ގޮސްފައި،" ޝާހިދު ވިދާޅުވި އެވެ.
ވެރިކަމަށް އައުމުގެ ކުރިން މި ސަރުކާރުގައި ތިބި މީހުން އިންޑިއާއަށް ނިސްބަތްކޮށް އެތައް ދޮގެއް ހަދާފައިވާ ކަމަށާއި އެގޮތުން ރާއްޖޭގެ ކަނޑު އިންޑިއާ ބައިވެރިވެގެން ވިއްކާލި ވާހަކަ ޖައިޝަންކަރު ކައިރިން އައްސަވާލަން ވެސް ޝާހިދު ވަނީ އެދިވަޑައިގެންފަ އެވެ.
މީގެ އިތުރުން ޖައިޝަންކަރު ކުރައްވާ ދަތުރުފުޅުގައި ރާއްޖޭގައި އިންޑިއާއިން ނިންމާފައިވާ މަޝްރޫއުތައް އިފްތިތާހުކޮށް، އިންޑިއާގެ ފަރާތުން އެހީތެރިކަން ލިބޭނެ ކަމަށް އުންމީދު ކުރައްވާ ކަމަށް ވެސް ވިދާޅުވި އެވެ.
ޝާހިދު ވިދާޅުވީ ރާއްޖޭގައި ކުރިން އޮތީ ވެރިކަމުގައި ހުންނަވާ އެއް ބޭފުޅެއްގެ ކޮންޓްރޯލުގައި ވެރިކަން ހިންގުމުގެ ނިޒާމެއް ކަމަށާއި ނަމަވެސް އެމްޑީޕީން އިސް ނަގައިގެން ކުރި ބުރަ މަސައްކަތުން މިހާރު މި އޮތް ގާނޫނުއަސާސީ ގެނެވުނު ކަމަށެވެ.
ގާނޫނު އަސާސީއަށް 16 އަހަރު ފުރިފައިވާއިރު މިސްރާބު ހުރީ ޑިމޮކްރަސީ އާއި ގާނޫނުއަސާސީގެ ރޫހާ ދިމާ އިދިކޮޅަށްކަން ފާހަގަކުރައްވާ ޝާހިދު ވިދާޅުވީ މިއަދު ރައްޔިތުންގެ މަޖިލީހުގެ މުޅި ނިޒާމު ތަގައްޔަރުވެ، މިސްރާބު ޖަހާފައި ވަނީ ހުރިހާ ބާރުތަކެއް އެއްކޮށްލުމަށް ކަމަށެވެ.
"ވިސްނުން ހުރީ ވެރިކަމާއި މަޖިލިސް ދައުރުގެ މުއްދަތު އިތުރުކޮށްލުމަށް. މިނިވަން މުއައްސަސާތަކުގެ ބާރު ހަނިކޮށް، މިނިވަން މުއައްސާތައް އުވާލުމަށް ގިނަ މަސައްކަތްތަކެއް ކުރުން. ޖަހަމުންދާ ރަނގަބީލަކީ ބިރުވެރި ކަމުގެ ރަނގަބީލެއް،" ޝާހިދު ވިދާޅުވި އެވެ.
ގާނޫނު އަސާސީގެ ހައްގުތަކާއި ބެހޭ ބާބާ ގުޅިގެން ސަރުކާރުން ދައްކާ ވާހަކަތަކުން ފިއްކަނޑައިގެންދާ ކަމަށާއި އޭގެއިތުރުން ކަތީބު ސިސްޓަމަކަށް ދިޔުމަށް ލާމަރުކަޒީ ނިޒާމު ކޮށައި މަށައި އުވާލުމަށް ވާހަކަ ދެއްކުމަކީ ނުރައްކަލެއް ކަމަށް ވެސް ޝާހިދު ވިދާޅުވި އެވެ.
ޝާހިދު އިތުރަށް ވިދާޅުވީ ރާއްޖޭގައި ތަރައްގީ ހުއްޓި، ސަރުކާރުގެ ވިސްނުން ހުއްޓިފައި އޮތީ އެތެރޭގެ ކޯޅުމަށް ކަމަށާއި ނަމަވެސް އެމްޑީޕީގެ ވިސްނުން ހުންނަން ޖެހޭނީ ރާއްޖެ ހަމަ މަގަށް އެޅުވުމާ ދީމަލަށް ކަމަށެވެ.
