ޕެރިސް (އޮގަސްޓް 6) - ޕޯޗުގަލްގެ ބެންފީކާ އަށް ކުޅެމުން އައި، 19 އަހަރުގެ ހުނަރުވެރި މިޑްފީލްޑަރު، ޖޮއާއޯ ނެވޭސް، ފްރާންސްގެ ޗެމްޕިއަން ޕީއެސްޖީ އަށް 60 މިލިއަން ޑޮލަރުގެ ޑީލެއްގެ ދަށުން ގަނެފި އެވެ.
ފަސް އަހަރުގެ ކޮންޓްރެކްޓެއްގައި، ނެވޭސް ވަނީ ޕީއެސްޖީއާ އެކު ސޮއިކޮށްފަ އެވެ. އެ ޑީލްގެ މުއްދަތުގެ ތެރޭގައި، ނެެވޭސް ވަކި ޓާގެޓްތަކެއް ކަނޑައަޅައިފިނަމަ، އިތުރު ފީތަކެއް، ޕީއެސްޖީން ބެންފީކާ އަށް ދައްކަން ވަނީ އެއްބަސްވެފަ އެވެ. އެ ގޮތުން، އެ މާއްދާތަކުގެ ޖުމްލަ އަގު، 30 މިލިއަން ޑޮލަރާ ގާތްކުރާނެ ކަމަށް ރިޕޯޓްތައް ބުނެ އެވެ.
ޕޯޗުގަލް ގައުމީ ޓީމާ އެކު މި ފަހަރުގެ ޔޫރޯ ފުޓްބޯޅަ މުބާރާތުގައި ވެސް ވާދަކުރި ނެވޭސް އަށް މި ފަހަރުގެ ޓްރާންސްފާ މާކެޓްގައި ފުރަތަމަ ފާރަލީ މެންޗެސްޓާ ޔުނައިޓެޑުންނެވެ. ޕޯޗުގަލްގެ މީޑިއާ ރިޕޯޓްތައް ބުނާގޮތުން، ނެވޭސް ގަންނަން ޔުނައިޓެޑަށް ހުށަހެޅީ އެ ޓީމުގެ ކެޕްޓަން، ބްރޫނޯ ފެނާންޑޭސް އެވެ. އެކަމަކު، ޔުނައިޓެޑްގެ ބޯޑުން، ނެވޭސް ގަންނަން ހިނގާނެ ޖުމްލަ ހަރަދާ މެދު ހިތްހަމަނުޖެހުންތަކެއް ހުރުމުން، އެ ޑީލް ކުރިއަށް ނުގެންދިޔައީ އެވެ.
ނެވޭސް ގަންނަން، ޕީއެސްޖީ އަށް އެންމެ ބޮޑަށް ހުށަހެޅީ، ޕޯޗުގަލް ގައުމީ ޓީމުގެ މިޑްފީލްޑަރު، ވިޓީނިއާ އެވެ. ޕީއެސްޖީ އަށް ކުޅެމުން އަންނަ ވިޓީނިއާއާ މަޝްވަރާ ކުރުމަށް ފަހު، އެ ޓީމުގެ ކޯޗު، ލުއިސް އެންރީކޭ ވަނީ ނެވޭސް އަކީ ގަންނަން ޖެހޭ ކުޅުންތެރިއެއްކަން އަންގައިފަ އެވެ.
ޕީއެސްޖީގެ ރައީސް ނާސިރު އަލް ހަލީފާ ވިދާޅުވީ، ނެވޭސް އަކީ އެ ކްލަބްގެ މުސްތަގުބަލަށް ބަލާފައި، މި ވަގުތުން ވަގުތަށް ވެސް ކުރަން ޖެހޭ މުހިންމު އިންވެސްޓްމަންޓެއް ކަމަށެވެ.
