ނިއު ދިއްލީ، އިންޑިއާ (އޮގަސްޓް 6) - އަންނަ އޮކްޓޫބަރު މަހު، ބަންގްލަދޭޝްގައި ބާއްވަން ޝެޑިއުލްކޮށްފައި އޮތް އައިސީސީ ވިމެންސް ޓީ20 ވޯލްޑް ކަޕް އެެހެން ގައުމަކަށް ބަދަލުކުރަން އިންޓަނޭޝަނަލް ކްރިކެޓް ކައުންސިލް (އައިސީސީ) އިން މަޝްވަރާތައް ކުރަމުން އަންނަ ކަމަށް ރިޕޯޓްތައް ބުނެފި އެވެ.
އައިސީސީން އެ މަޝްވަރާތައް ފަށާފައިވަނީ، ބަންގްލަދޭޝް މި ވަގުތު ދާހިލީ ހަމަނުޖެހުމަކަށް ގޮސްފައިވާތީވެ އެވެ. އެ ގޮތުން، ބަންގްލަދޭޝްގައި ކުރިއަށްދާ މުޒާހަރާތައް ހޫނުވެ، ބޮޑުވަޒީރު ޝެއިހް ހަސީނާ އިސްތިއުފާ ދެއްވައި، އެ ގައުމު ދޫކުރައްވައި ވަނީ ފިއްލަވައިފަ އެވެ.
ކުރިއަށް އޮތް މަސްތަކުގައި ބަންގްލަދޭޝްގެ ހާލަތު ބަދަލުވާނެ ގޮތެއްގެ ސީދާ މަންޒަރު ސާފުނުވާތީ، އައިސީސީން މިހާރު ވާހަކަ ދައްކަމުން އަންނަނީ، އޮކްޓޫބަރު ތިން ވަނަ ދުވަހު، ބަންގްލަދޭޝްގައި ފަށަން އޮތް ޓީ20 ވިމެންސް ވޯލްޑް ކަޕް އެހެން ގައުމަކަށް ބަދަލުކުރުމަށް ކަމަށް ރިޕޯޓްތައް ބުނެ އެވެ.
އެކަމަކު، ސީދާ ގޮތެއް ނިންމާނީ، މިކަމާ ގުޅޭގޮތުން ތަފްސީލީ ކަންކަން ހޯދުމަށް ފަހު ކަމަށް ވެސް އެ ރިޕޯޓްތައް ބުނެ އެވެ.
އޮކްޓޫބަރު 20 ވަނަ ދުވަހުގެ ނިޔަލަށް ޓީ20 ވިމެންސް ވޯލްޑް ކަޕް ކުރިއަށްގެންދަން ނިންމާފައިވާއިރު، ބަންގްލަދޭޝްގައި އެ މުބާރާތް ނުބޭއްވިއްޖެ ހާލަތެއްގައި، ދެން ހޯސްޓްކުރުމުގެ ފުރުސަތު ދޭން ވިސްނަނީ، ޔޫއޭއީ، އިންޑިއާ ނޫނީ ސްރީ ލަންކާ އަށް ކަމަށް ރިޕޯޓްތައް ބުނެ އެވެ.
އައިސީސީން ނެރުނު ބަޔާނެއްގައި ބުނެފައިވަނީ، ބަންގްލަދޭޝް ކްރިކެޓް ބޯޑް (ބީސީބީ)އާ އެކު، މަޝްވަރާތަކެއް ކުރެވެމުން އަންނަ ކަމަށާއި މުބާރާތެއް ބާއްވާއިރު، އެންމެ ބޮޑު ޔަގީންކަމެއް އޮންނަން ޖެހޭނީ ސެކިއުރީޓީއާ ގުޅޭ ކަންކަމުގައި ކަމަށެވެ.
