މޯލްޑިވްސް އިސްލާމިކް ބޭންކް (އެމްއައިބީ) އަކީ ކުރު މުއްދަތެއްގައި ގިނަ ބައެއްގެ މަގްބޫލުކަމާއި އިތުބާރު ހޯދާފައިވާ ބޭންކެކެވެ. ކަސްޓަމަރުންނަށް ފޯރުކޮށްދޭ ހިދުމަތް ފުޅާކޮށް، ކަސްޓަމަރުންނަށް ލުއި ފަސޭހަ ގޮތްތަކެއް ގާއިމުކޮށްދިނުމާއެކު ގިނަ ބަޔަކު އަންނަނީ އެމްއައިބީ އިހްތިޔާރު ކުރަމުންނެވެ.
އެމްއައިބީގެ ޑެޕިއުޓީ ސީއީއޯ އަހުމަދު ރިޒާ "އަދަދު" އަށް ވިދާޅުވީ ޒަމާނީ ޓެކްނޮލޮޖީ ބޭނުންކޮށްގެން އެމްއައިބީގެ ހިދުމަތްތަކަށް ވަރަށް ބޮޑު ކުރިއެރުމެއް ގެނެވިފައިވާ ކަމަށާއި ކަސްޓަމަރުންނަށް ދިމާވާ ދަތިތައް އަޑުއަހައި ގާތުން މަސައްކަތް ކުރަމުންދާ ކަމަށެވެ.
"އަޅުގަނޑުމެން މިތިބެނީ އަބަދުވެސް އެމްއައިބީ ކުރިއެރުވުމަށް، އިސްލާމިކް ބޭންކިން ކުރިއެރުވުމަށް ފެން ބޮވައި ގަނެފައި. އެވެސް ވަރަށް ބޮޑު ހިތްވަރަކަށް މިވަނީ އަޅުގަނޑުމެންނަށް. އަޅުގަނޑުމެންގެ ސްޓާފުން އަބަދުވެސް މި ތިބެނީ ހަމަ އެމްއައިބީ ކުރިއެރުވުމަށް ކެނޑިނޭޅި މަސައްކަތް ކުރުމަށް،" އޭނާ ވިދާޅުވި އެވެ.
މިދިޔަ އަހަރު އެމްއައިބީން އޮންލައިންކޮށް ބޭންކް އެކައުންޓު ހުޅުވަން ފެށުމާއެކު، ރާއްޖޭގެ ކޮންމެ ކަންކޮޅަކުން އެކައުންޓް ވަގުތުން ހުޅުވޭނެ އިންތިޒާމުތައް ހަމަޖެހިފައިވާކަން ފާހަގަކުރައްވާ ރިޒާ ވިދާޅުވީ ރާއްޖެއިން ބޭރުގައި ތިބޭ މީހުންނަށް ވެސް ރާއްޖެ ނައިސް އެކައުންޓް ވަގުތުން މިހާރު ހުޅުވޭ ކަމަށެވެ.
އޭގެ އިތުރުން ރާއްޖޭގެ އެންމެ މަޝްހޫރު އެއް ފައިނޭންސިން ޕްރޮޑަކްޓް ކަމަށްވާ އެމްއައިބީގެ އުޖާލާ ދިރިއުޅުން ބޭނުންވާ މީހުން ކުރިން އެ ބޭންކުގެ ބްރާންޗެއް ހުންނަ ރަށަކަށް ދާން ގިނަ ކަސްޓަމަރުންނަށް ދަތިތައް ދިމާވި ކަމަށާއި، ނަމަވެސް މިހާރު ކޮންމެ ރަށެއްގައި ހުރެގެންވެސް އޮންލައިންކޮށް އެކަން ކުރެވޭނެކަން އޭނާ ފާހަގަކުރެއްވި އެވެ.
"އަޅުގަނޑުމެންގެ ކުރިއެރުމުގައި ވަރަށް ބޮޑު ދައުރެއް އެބަ އަދާކުރޭ ސެލްފް ސާވިސް ނުވަތަ ޓެކްނޮލޮޖީ ބޭނުންކޮށްގެން އަޅުގަނޑުމެން މި ގެނައި ކުރިއެރުން. އަޅުގަނޑުމެން މި ދަނީ އަޅުގަނޑުމެންގެ ޕްރޮސެސްތައް ވެސް ރީ އިންޖިނިއާކޮށް އަޅުގަނޑުމެންގެ ޕްރޮސެސްތައް އޮޓޮމޭޓް ކުރަމުން،" ރިޒާ ވިދާޅުވި އެވެ.
އެންމެ ބްރާންޗަކާއެކު ހިދުމަތް ފެށި އެމްއައިބީގެ 10 ބްރާންޗަކުން މިހާރު ރާއްޖޭގެ އެކި ކަންކޮޅުގައި ހިދުމަތް ދެމުންނެވެ. އަދި 40 އާ ގާތްކުރާ ސެލްފް ސާވިސް މެޝިންތަކުން އެ ބޭންކުން ދަނީ ހިދުމަތް ދެމުންނެވެ.
މީގެއިތުރުން އެމްއައިބީން ދެމުން ގެންދާ ގިނަ ހިދުމަތްތައް އެ ބޭންކުން ޑިޖިޓަލްކޮށް، ހިދުމަތްތައް ދަނީ ފުޅާކުރަމުންނެވެ. އަދި ކުރިއަށް އޮތްތަނުގައި ހިދުމަތަށް ގެންނާނެ ބަދަލުތައް ވެސް އެ ބޭންކުން ދަނީ ހާމަކުރަމުންނެވެ.
