ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ގައި ކުރީގެ ރިޔާސީ ދައުރު އޮތް މެނޭޖުމަންޓުން އެއްވެސް ލިޔެކިއުމެއް ނެތި އެކި އެކައުންޓްތަކަށް 161 މިލިއަން ރ. ޓްރާންސްފާކޮށްފައިވާ ކަމަށް މިހާރު އެ ކުންފުނީގެ މެނޭޖުމަންޓުން ރައްޔިތުންގެ މަޖިލީހުގެ ކޮމިޓީއެއްގައި މިއަދު ބުނެފި އެވެ.
ސަރުކާރު ހިއްސާވާ ކުންފުނިތަކަށް ރައްޔިތުންގެ މަޖިލީހުގައި އޮންނަ ސްޓޭޓް އެންޓަޕްރައިޒަސް (އެސްއޯއީ) ކޮމިޓީގައި އާރުޑީސީގެ ޑެޕިއުޓީ މެނޭޖިން ޑިރެކްޓަރު މުހައްމަދު އަސްބާހު އަލީ ނަސީރު ވިދާޅުވީ އެއްވެސް ލިޔުމެއް ނުފެންނަ ޓްރާންސެކްޝަންތަކެއް ފާހަގަ ކުރެވިފައިވާ ކަމަށެވެ.
އާރުޑީސީ 2022 ވަނަ އަހަރު އުފެއްދުމަށް ފަހު އެ އަހަރުގެ ތެރޭގައި އެފަދަ 66 މިލިއަން ރުފިޔާ ދޫކޮށްފައިވާ އެބަ އޮތް ކަމަށެވެ. އަދި ނޮވެމްބަރު 2023، ގެ ނިޔަލަށް އެ އަހަރު ވެސް އެއްވެސް ލިޔެކިޔުމެއް ނެތި 95 މިލިއަން ރުފިޔާ ކުންފުނީގެ އެކައުންޓުން ރިލީޒުކޮށްފައިވާ ކަމަށެވެ.
"2022 ގައި އެއްވެސް ޑޮކިއުމަންޓެއް ނެތި އެބައިނޭ 66 މިލިއަން ރުފިޔާ ހަރަދުކޮށްފައި، ފައިސާ ދޫކޮށްފައި، 2023 ނޮވެމްބަރާ ހަމައަށް އެބަ އޮތް 95 މިލިއަން ރުފިޔާ އެއްވެސް ސްޓޭޓްމަންޓެއް ނެތި ރިލީޒުކޮށްފައި އެކައުންޓުން،" އޭނާ ވިދާޅުވި އެވެ.
"މިއީ ކޮން ހިދުމަކަށްތޯ ނުވަތަ ކޮން މުދަލަކަށް ދީފައި ހުރި ފައިސާއެއްތޯ ނޭނގޭ،" ނަސީރު އިތުރަށް ވިދާޅުވި އެވެ.
ނަސީރު ވިދާޅުވީ އާރުޑީސީއާ ހަވާލުކޮށްފައިވާ މަޝްރޫއުތައް ހިންގަން ސަބްކޮންޓްރެކްޓަރުންނަށް އެއްޗެހި އަގުބޮޑުކޮށް ދިނުމާއި އެއްވެސް މަސައްކަތެއް ކުރިއަށް ނުގޮސް އެޑްވާންސްކޮށް މާ ގިނަ ފައިސާ ދޫކުރުން ފަދަ އެކި ކަންކަން ފާހަގަ ކުރެވިފައިވާ ކަމަށެވެ.
ހަރަދު ބޮޑު، ކޮރަޕްޝަން ގިނަވާ ގޮތަށް ކުންފުނި ހިންގުމުގެ ސަބަބުން، 837 މިލިއަން ރުފިޔާގެ ދަރަންޏެއް އާ މެނޭޖުމަންޓް ހަވާލުވި އިރު އޮތް ކަމަށް ނަސީރު ވިދާޅުވި އެވެ. މިދިޔަ އަށް މަސް ދުވަހުގެ ތެރޭގައި އެއިން 152 މިލިއަން ރުފިޔާ ދައްކައި ދަރަނި 585 މިލިއަން ރުފިޔާ ކުޑަކޮށްފައިވާ ކަން ފާހަގަ ކުރެއްވި އެވެ.
