ކާފު އަތޮޅާއި މީމު އަތޮޅުގެ މަސްވެރިކަން ރަނގަޅު ވުމާ ގުޅިގެން، މިފްކޯގެ މަސް ކިރާ ބޯޓުތައް މާލެ ކައިރިއަށާއި މީމު އަތޮޅަށް ފޮނުވާފައިވާ ކަމަށް އެ ކުންފުނިން މިއަދު ބުނެފި އެވެ.
މިފްކޯއިން މާލެ ކައިރީގައި މަސްކިރަން ބާއްވާފައި އޮތީ "ރަންދި-20" ބޯޓެވެ. އަދި މީމު އަތޮޅުގައި ބާއްވާފައި އޮތީ "ރަންދި-23" ބޯޓެވެ. މިފްކޯއިން ބުނީ ހުވަދޫ އަތޮޅުގައި އޮތް "މަހާ ކަލަމިންޖާ" ވެސް މިއަދުގެ ވަގުތެއްގައި މީމު އަތޮޅަށް ފުރާނެ ކަމަށެވެ.
މަސްވެރިކަން އަލުން ރަނގަޅުވާން ފަށާފައި މި ވަނީ، މިދިޔަ މަހުގެ ތެރޭގައި މަސްވެރިކަން އިންތިހާއަށް ދަށްވެ، މިފްކޯގެ ފިހާރަތަކުން ކަނޑު މަސް ހުސްވާ ހިސާބަށް ކަންކަން ދިޔަ ފަހުންނެވެ. އެކަމަކު، މަސްވެރިކަން ރަނގަޅު ވަމުން އައުމާ ގުޅިގެން މިފްކޯގެ ހާލަތު ވެސް އަންނަނީ ރަނގަޅު ވަމުންނެވެ.
ދިވެހި މަސްވެރިކަމުގެ ސިނާއަތަށް ގިނަ ގޮންޖެހުންތަކެއް ދިމާވެފައިވާއިރު، ގިނަ މައްސަލަތަކަކީ މިފްކޯގެ ދޯހަޅި ހިންގުމާ ހުރެ ސިނާއަތަށް ދިމާވެގެން އުޅޭ މައްސަލަތަކެކެވެ. މިކަންކަން އިސްލާހުކުރަން ސަރުކާރުން އަންނަނީ މަސައްކަތްތަކެއް ކުރަމުންނެވެ.
އެގޮތުން ގެނައި ފުރަތަމަ ބަދަލަކީ ކުރިން އެސްޓީއޯގެ ދަށުގައި އޮތް މިފްކޯ އަލުން ވަކި ކުންފުންޏަކަށް ހެދުމެވެ. ދެން ކުރި ކަމަކީ މިފްކޯއަށް ކަނޑުމަސް ގަންނަ އަގު ދުނިޔޭގެ ބާޒާރުގައި ހުންނަ އަގުތަކާއި މިފްކޯއަށް މަސް ވިއްކޭ އަގާ އެއްހަމައަށް ފްލޯޓިން ރޭޓަކަށް ބަދަލުކުރުމެވެ.
އެންމެ ފަހުން އިއުލާން ކޮށްފައިވާ އަގުތަކުގައި މިފްކޯއިން ގަނޑުކުރި މަސް ކިލޯއެއް ގަންނަނީ 16ރ. އަށެވެ. އަދި ގަނޑު ނުކުރާ މަސް ކިލޯއެއް ގަންނަނީ 14ރ. އަށެވެ.
