ކުރީގެ ރައީސް އަބްދުﷲ ޔާމީން ސަރުކާރާ ދުރަށް ޖެހުނީ އެމަނިކުފާނުގެ ހުރި ބޮޑާކަމާއި ކިބުރުވެރިކަމެއްގެ ބޮޑުކަމުން ކަމަށް ބުނެ މަޖިލީހުގެ ރައީސް އަބްދުއްރަހީމް އަބްދުﷲ ގެ ބަހުގެ ހޫނު ހަމަލާތަކެއް ޔާމީނަށް އަމާޒުކުރެއްވި ކަމަށް އިއްޔެ ރިޕޯޓުކުރި އެވެ.
އަބްދުއްރަހީމް މިހެން ވިދާޅުވީ ރައީސް ޔާމީން ސަރުކާރާ ދުރަށްޖެހުނީ ހަދާ ގޯސްތަކުން ހަޖަމުނުވެގެން ކަމަށް ވިދާޅުވި ވާހަކަތަކަށް ރައްދު ދެއްވަމުންނެވެ.
އަބްދުއްރަހީމް އެކްސް ކުރެެއްވި ޕޯސްޓެއްގައި ވިދާޅުވީ ޔާމީން ސަރުކާރާ ދުރަށް ޖެހުނީ އެހެން މީހަކު ވެރިކަން ކުރައްވާތަން ބަލަން ލަގޮނޑިއަށް ކެތްނުވާތީ ކަމަށެވެ. އަދި ވެރިކަމުގެ އިއްޒަތާއި ލައްޒަތަށް އޮތް ދަހިވެތިކަމެއްގެ ބޮޑުކަމުން ކަމަށް ވެސް އެމަނިކުފާނުގެ ޕޯސްޓުގައި ލިޔުއްވާފައިވެ އެވެ.
އަބްދުއްރަހީމް އިތުރަށް ވިދާޅުވީ ސިޔާސީ މައިދާނުގައި ފެއިލްވެފައި ތިބި ދެތިން މީހެއް ގޮވައިގެން ޖަހާ ހަޑިހުތުރު މުޑުދާރު ސަކަރާތުން ރައްޔިތުންނަށް އެކަން ވަރަށް ބޮޑަަށް ޔަގީންވާ ކަމަށެވެ. އަދި ރައްޔިތުން ހެއްލުވާލަން މާމޮޅު ވާހަކަ ނުދެއްކެވަމަށް ވެސް އެމަނިކުފާނު ވިދާޅުވި ެވެ.
ރައީސް ޔާމީން މިހާރު ވަނީ ސަރުކާރާ ދުރަށް ޖެހިވަޑައިގެން އަމިއްލަ ޕީޕަލްސް ނޭޝަނަލް ފްރަންޓް (ޕީއެންއެފް) ގެ ސިޔާސީ ޕާޓީއެއް އުފައްދަވައިގެން އެ ޕާޓީގެ މަސައްކަތްތަކުގަ އެވެ. މި ޕާޓީގައި ދެން އިސްކޮށް އުޅުއްވަނީ ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދާއި ކުރީގެ މިނިސްޓަރު މަލީހު ޖަމާލެވެ.
