ހަރަކަތުލް މުޤާވަމަތުލް އިސްލާމިއްޔާ (ހަމާސް) ގެ ލީޑަރު އިސްމާއިލް އަވަހާރަކޮށްލީ އޭނާ ހުންނެވި ގެސްޓްހައުސްގެ އެތެރޭގައި ހަރުކޮށްފައި އޮތް ބޮމެއް ގޮއްވާލައިގެން ކަމަށް ފެތުރި ހަބަރު އީރާނުން ދޮގުކޮށްފި އެވެ.
އީރާން ސަރުކާރުން ބުނީ ހަނިއްޔާ އަވަހާރަކޮށްލީ ގެސްޓްހައުސްގެ ބޭރުން ފޮނުވައިލި ކުރު ރާސްތާ ޕްރޮޖެކްޓައިލްއަކުން ކަމަށެވެ.
އިޒްރޭލުން ދިން ކަމަށް ބެލެވޭ ހަމަލާއެއްގައި ހަނިއްޔާ އަވަހާރަކޮށްލީ މިދިޔަ ބުދަ ދުވަހު އީރާނުގެ ވެރިރަށް ތެހެރާނުގައި ހައި ސެކިއުރިޓީއާއެކު ހުންނަވަނިކޮށެވެ.
އިރާނުން ބުނީ އެ ހަމަލާ ދީފައި ވަނީ ކުރު ރާސްތާގެ ހަތް ކިލޯގެ ގޮވާ ޕްރޮޖެކްޓައިލްއެއް ބޭނުންކޮށްގެން ކަމަށެވެ. ނަމަވެސް އެއީ ކޮންކަހަލަ ޕްރޮޖެކްޓައިލްއެއް ކަމެއް އިރާނުން ނުބުނެ އެވެ.
މި ހަމަލާއާ ގުޅިގެން އިޒްރޭލަށް ވަރުގަދަ ރައްދެއް ދޭނެ ކަމުގެ އިންޒާރު އިރާނުން ބުނެފައިވީ ނަމަވެސް، މިހާތަނަށް އެއްވެސް ހަމަލާއެއް ދީފައެއް ނުވެ އެވެ.
އިރާނުން ތުހުމަތު ކުރާ ގޮތުގައި މި ހަމަލާ އިޒްރޭލުން ދީފައި ވަނީ އެމެރިކާގެ ވެސް ވާގިވެރިކަމާ އެކުގަ އެވެ. ނަމަވެސް އެމެރިކާއިން ވަނީ އެކަން ދޮގުކޮށްފަ އެވެ.
މި ހަމަލާ ދެވުނު ސަބަބު އިރާނުން ތަހުގީގު ކުރަމުން އަންނައިރު، އެ ގައުމަށް އަންނަނީ އިންޓެލިޖެންސް ފެއިލްވުމާ ގުޅިގެން ބޮޑެތި ފާޑުކިޔުންތައް ވެސް އަމާޒުވަމުންނެވެ.
އިޒްރޭލުން އަންނަނީ އިރާނުން ދީފާނެ ހަމަލާއަކަށް ރައްކާތެރިކަމުގެ ފިޔަވަޅު އަޅަމުންނެވެ. އެގޮތުން އެމެރިކާއިން ވެސް އަންނަނީ އެ ގައުމަށް އެހީތެރިކަން ފޯރުކޮށްދެމުންނެވެ.
