މަތީ ތައުލީމާއި ތަމްރީންގެ ގާނޫނަށް އިސްލާހު ގެންނައިރު މުހިންމީ ޔުނިވާސިޓީއެއްގެ ދަރަޖަ ދޭއިރު މުއްދަތަށް ބެލުމަށް ވުރެ ފެންވަރު ބެލުން ކަމަށް ރާއްޖޭގައި މަތީ ތައުލީމަށް ކިޔަވައިދޭ ކޮލެޖުތަކާއި ޔުނިވާސިޓީތަކުގެ ދަރިވަރުންގެ ޔޫނިއަންތަކުން މިއަދު ބުނެފި އެވެ.
ގައުމީ ތަރައްގީއާއި ތަރިކައިގެ ކޮމިޓީގައި ދަރިވަރުންގެ ޔޫނިއަންތަކުން ބުނެފައި ވަނީ ބިލުގައި ވަކި މުއްދަތުތަކެއް ކަނޑައަޅާފައިވީ ނަމަވެސް، އެ މުއްދަތުތަކަށްވުރެ ޔުނިވާސިޓީތަކުގައި ހުންނަން ޖެހޭ ފެންވަރު މާ މުހިއްމު ކަމަށާއި އެކަން ކަށަވަރު ކުރެވޭ ގޮތްތަކެއް ހުންނަން ޖެހޭނެ ކަމަށެވެ.
ވިލާ ކޮލެޖުގެ ސްޓޫޑެންޓް އެސޯސިއޭޝަންގެ ފަރާތުން ހުސެއިން ޖުނާން ބުނީ ކޮލެޖެއް ޔުނިވާސިޓީއަށް ބަދަލުވާ މުއްދަތު 20 އަހަރުން 15 އަހަރަށް ކުޑަ ކުރުމަށް ތާއީދު ކުރާ ކަމަށާއި ނަމަވެސް ފެންވަރު ރަނގަޅު ކަމަށް ޝަރުތު ހަމަވާނަމަ އެކަމަށް ވަކި މުއްދަތެއް އޮތުން މުހިންމު ނޫން ކަމަށެވެ.
ޔުނިވާސިޓީއެއްގެ ވަކި މިންގަނޑުތަކަށް ފެތޭ ފެންވަރުތައް ހިފެހެއްޓުމަށް ކަންކަން ކުރަން ޖެހޭކަން ފާހަގަކޮށް ވިލާ ކޮލެޖުގެ ލޯ ސޮސައިޓީގެ ފަރާތުން ޝާނާ އުމަރު ބުނީ ޔުނިވާސިޓީއަކަށް ބަދަލުވުމަށް ކޮން ކޮލެޖަކުން ވެސް ރޯޑް މެޕެއް އެކުލަވާލަން ބިލަށް އިތުރުކުރަން ފެންނަ ކަމަށެވެ.
"ރޯޑް މެޕް ކަހަލަ އެއްޗެހި އިސްލާހުތަކުގެ ތެރެއަށް އެޑްކުރުން އެއީ މުސްތަގުބަލުގައި ޔުނިވާސިޓީތައް ހުޅުވިގެންދާއިރު އެއްގޮތަކަށް ފޯމެޓްވެގެންދާން ބާރު އެޅިގެންދާނެ ކަންތައްތަކެއް. ދިވެހިރާއްޖޭގެ ކަލްޗާއަށް ބޭސްވެފައި ހުންނަ ގަވާއިދުތަކާ އެއްޗެހި އެކުލެވޭ މުގައްރަރެއް ކޮންމެ ފެކަލްޓީއެއްގެ ފަރާތުން ކުރިއަށްގެންދާ ޑިގްރީ ނުވަތަ ޕީއެޗްޑީ އަދި މާސްޓާސްގެ ހިމެނިގެންދިޔުން މޮނިޓާކުރެވުން އެއީ ގާނޫނީ ގޮތުން ގެންނަން ޖެހޭ އިސްލާތުތައް ކަމަށް ގަބޫލުކުރަން،" ޝާނާ ބުންޏެވެ.
ސޮސައިޓީ އޮފް ޝަރީއާ އިންލޯގެ ރައީސް އިސްމާއިލް ހަސަން އިމްރާން ބުނީ ބޭރުގައި ކިޔަވައިދޭ ޔުނިވާސިޓީއެއް 10 އަހަރުގެ މުއްދަތެއް އޮންނަން ޖެހޭނެ ކަމަށް ބިލުގައި އޮތުމުން، މުއްދަތުގެ ބައި އުނިކުރުމަށް ހުށަހަޅާ ކަމަށާއި ރާއްޖޭގެ ކޮލެޖު ޔުނިވާސިޓީތަކަށް އެކަނި ހަނިކޮށްގެން ވެސް މިކަހަލަ ބިލުތަކަށް ވާހަކަ ނުދެއްކޭނެ ކަމަށެވެ.
ބައެއް ޔުނިވާސިޓީތައް އެންމެ ދާއިރާއަކަށް ހާއްސަކޮށްފައިވާކަން ފާހަގަކޮށް އޭނާ ބުނީ ތިން ދާއިރާއަކުން ޔުނިވާސިޓީތަކުން ކިޔަވައިދޭން ލާޒިކުރުން ގަބޫލު ނުކުރެވޭ ކަމަށާއި ފެންވަރު ރަނގަޅު ޔުނިވާސިޓީތަކަށް ތިން ދާއިރާއިން ކިޔަވައި ނުދެވޭތީ ރާއްޖެއަށް ނާދެވޭ ކަމަށެވެ.
"ޕެރިސް ސައިންސް ޔުނިވާސިޓީއަކީ ދުނިޔޭގެ އެންމެ ވަރުގަދަ އެއް ޔުނިވާސިޓީ ސައިންސް ކިޔަވަދޭ. މި ބޭފުޅުން 2019 ވީ ހިސާބުގައި މިއޮތީ އެސްޓަބްލިޝްވެފައި ޔުނިވާސިޓީއެއް ގޮތަށް. މިސާލަކަށް އެ ބޭފުޅުން މިތަނަށް އަންނަން ބަލާއިރު އެ 10 އަހަރު ވެފައި ނެތީމައާއެކު އެބޭފުޅުންނަށް އެބަ ހުރަސް އެޅޭ މިތަނުގައި ކޮލިޓީ ރަނގަޅު ޔުނިވާސިޓީ ގާއިމުކުރަން،" އޭނާ ބުންޏެވެ.
އޭގެއިތުރުން ގައުމީ ޔުނިވާސިޓީގެ ދަރިވަރުންގެ ޔޫނިއަންއިން ވެސް ވަނީ ގާނޫނަށް މުއްދަތު ގެނައުމުގެ ބަދަލުގައި ގަވާއިދަށް އެ މުއްދަތު ގެންނަން ޖެހޭ ކަމަށް ބުނެފަ އެވެ. އަދި ދަރިވަރުން ބާރުވެރި ކުރެވޭނެ ގޮތްތަކެއް ވެސް ގާނޫނު ތެރެއިން ހަމަޖައްސައި ދިނުމަށް ވަނީ އެދިފަ އެވެ.
