ހާރިޖީ ސިޔާސަތުގައި މި ސަރުކާރާއި ކުރީގެ ސަރުކާރާ ހާރިޖީ ސިޔާސަތާ ތަފާތެއް ނެތް ކަމަށް އެމްޑީޕީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދު ރޭ ވިދާޅުވެއްޖެ އެވެ.
އެމްޑީޕީން "ހަވަރު ބެރު" ގެ ނަމުގައި ކުރިއަށް ގެންދިޔަ ޕެނަލް ޑިސްކަޝަންގައި ޝާހިދު ވިދާޅުވީ މި ސަރުކާރުގެ ފޮރިން މިނިސްޓަރު މޫސާ ޒަމީރު ދައްކަވަނީ އޭނާ ފޮރިން މިނިސްޓަރަކަށް ހުރެގެން ދެއްކި ވާހަކަތައް ކަމަށެވެ. އަދި ވެރިކަމާ ހަވާލުވީމަ މަންޒަރު ބަދަލުވެ ބައިނަލްއަގުވާމީ އުސޫލުތައް އެނގި އެއަށް އިހުތިރާމު ކުރާ މަންޒަރު ފެންނަ ކަމަށް ޝާހިދު ވިދާޅުވި އެވެ.
"އިހަށް ރޭ މިއަދުގެ ހާރިޖީ ސިޔާސަތު ހާމަކުރެއްވީ ޓީވީގައި. ކުރެއްވިއިރު ހަމައެކަނި ތަފާތަކަށް އަޅުގަނޑަށް ފެނުނީ އަޅުގަނޑުގެ ބޮލުގައި ފަތް ނެތްކަން. މިހާރު އިންނެވި ވަޒީރުގެ އިސްތަށިފުޅުގައި ފަތްހުރި. ދެއްކެވި ވާހަކަ އެކައްޗެއް." ޝާހިދު ވިދާޅުވި އެވެ.
"ހަމަ އަޅުގަނޑު ވަޒީރަކަށް އިިންނަވައިގެން ދެއްކެވި ވާހަކަ އެމަނިކުފާނު ދެއްކެވީ. ބައިނަލްއަގުވާމީ އުސޫލުތަކަށް ތަބާވާ އަޅުގަނޑުމެންނާ ގުޅުން ބާއްވަން ބޭނުންވާ ހުރިހާ ގައުމަކާއި އިޒްރޭލު ފިޔަވައި ގުޅުން ބާއްވާނަމޭ،"
ޝާހިދު ވިދާޅުވީ ކުރިން އިދިކޮޅުގައި ތިބިއިރު މި ސަރުކާރުން އެގްރީމަންޓުތައް ދައްކަން ގޮވާލަމުން ދިޔަ ނަމަވެސް، މިހާރު އެކަން އެގޮތަށް ނުކުރެވޭނެކަން އެނގިލައްވާ ކަމަށާއި ކުރިން އެމްޑީޕީ ސަރުކާރުން ދެއްކި ވާހަކަތައް މި ސަރުކާރުން މިހާރު ދައްކަން ފަށާފައިވާ ކަމަށެވެ.
ކުރިން ދައްކަމުން ދިޔައީ ދޮގު ހަދައިގެން އޮޅުވާލައިގެން ދެއްކި ވާހަކަތަކެއްކަން މިހާރު އެނގި ހާމަވަމުންދާކަން ފާހަގަކުރައްވާ ޝާހިދު ވިދާޅުވީ ދެ ގައުމެއްގެ ދެމެދުގައި ހަދާ އެއްބަސްވުންތަކަކީ ހާމަކުރެވޭނެ އެއްޗެއް ނޫން ކަމަށް ކުރިން ވެސް އޭރުގެ ސަރުކާރުން ބުނަމުންދިޔަ ކަމަށެވެ.
