ސަރުކާރުގެ މައި ވިޔަފާރި ކުންފުނި، އެސްޓީއޯ އަށް މި އަހަރުގެ ދެވަނަ ކުއާޓަރުގައި ލިބުނު އާމްދަނީ އާއި ފައިދާ ވަރަށް ބޮޑަށް ދަށަށް ހިނގެއްޖެ އެވެ.
އެސްޓީއޯއިން މިއަދު އާންމުކުރި ދެ ވަނަ ކުއާޓަރުގެ ރިޕޯޓުގައިވާ ގޮތުން އެޕްރީލް އިން ޖޫން މަހުގެ ނިޔަލަށް އާމްދަނީގެ ގޮތުގައި 3.47 ބިލިއަން ރުފިޔާ ލިބިފައި ވާއިރު، ފުރަތަމަ ކުއާޓަރަށް ވުރެ ދެވަނަ ކުއާޓަރުގެ އާމްދަނީ ގާތްގަނޑަކަށް އެއް ބިލިއަން ރުފިޔާ ދަށްވެފައިވެ އެވެ.
މި އަހަރުގެ ފުރަތަމަ ތިން މަހު އެސްޓީއޯގެ އާމްދަނީއަށް 4.49 ބިލިއަން ރުފިޔާ ލިބިފައި ވާއިރު، ދެވަނަ ކުއާޓަރުގައި ލިބުނު އާމްދަނީ އަކީ 3.78 ބިލިއަން ރުފިޔާ އެވެ.
ދެ ވަނަ ކުއާޓަރުގައި އާމްދަނީ ދަށް ވެފައި މި ވަނީ މިދިޔަ އަހަރުގެ އެއްވެސް ކުއާޓަރެއްގައި ދަށަށް ނުދާ ވަރަށެވެ.
އާމްދަނީ ދަށްވުމުގެ މައިގަނޑު ސަބަބަކީ އެސްޓީއޯގެތެލުގެ ވިޔަފާރީގެ އަގަށް ދުނިޔޭގެ ބާޒާރުގައި އައި ބަދަލާއެކު ރާއްޖޭގެ ބާޒާރުގައި ވެސް ތެޔޮ ވިއްކާ އަގުތައް ހެޔޮކުރުން ކަމަށް އެ ކުންފުނިން ބުނެ އެވެ.
އާމްދަނީ ދަށަށް ދިޔައިރު، ދެވަނަ ކުއާޓަރުގެ ފައިދާ ވެސް ވަނީ ވަރަށް ބޮޑަށް ދަށަށް ގޮސްފަ އެވެ. ޓެކުހަށް ކެނޑުމަށް ފަހު ދެ ވަނަ ކުއާޓަރުގެ ސާފު ފައިދާ އަކީ 147 މިލިއަން ރުފިޔާ އެވެ.
2024 ގެ ސާފު ފައިދާ (ޓެކުހަށް ކެނޑުމަށް ފަހު)
- ފުރަތަމަ ކުއާޓަރު - 195 މިލިއަން ރުފިޔާ
- ދެ ވަނަ ކުއާޓަރު - 147 މިލިއަން ރުފިޔާ
2023 ގެ ސާފު ފައިދާ (ޓެކުހަށް ކެނޑުމަށް ފަހު)
- ދެ ވަނަ ކުއާޓަރު - 170 މިލިއަން ރުފިޔާ
- ތިން ވަނަ ކުއާޓަރު - 195 މިލިއަން ރުފިޔާ
- ހަތަރު ވަނަ ކުއާޓަރު - 182 މިލިއަން ރުފިޔާ
މި އަހަރުގެ ދެ ވަނަ ކުއާޓަރުގައި ވިޔަފާރި ހިންގުމުގެ ހަރަދު (ކޮސްޓް އޮފް ސޭލްސް) އަށް 2.95 ބިލިއަން ރުފިޔާ ހަރަދުވެފައިވާއިރު، ފުރަތަމަ ކުއާޓަރުގެ އެ ހަރަދު ހުރީ 4.49 ގަ އެވެ.
