ޕެރިސް (ޖުލައި 29) - ޗައިނާ އަށް އުފަން، ޗިލީ އަށް ނިސްބަތްވާ، ޓޭބަލް ޓެނިސް ކުޅުންތެރިޔާ، ޓާނިއާ ޒެން، އަކީ މީގެ ކުރިން ޗައިނާގެ އެތުލީޓެކެވެ. އެހެން ނަމަވެސް، އުމުރުން 58 އަހަރުގައި އޭނާ އޮލިމްޕިކްސްގެ ހުވަފެން ހަގީގަތަކަށް ހެދިއިރު، އެއީ ޗިލީގެ އެތުލީޓެކެވެ.
ކުރިން ޗައިނާގައި، ޒިޔިން ޒެންގެ ނަމުން ނަންދެވުނު، ޓާނިއާ ދެކޭގޮތުގައި ލަހުން ނަމަވެސް ހުވަފެން ހަގީގަަތަކަށް ވުމަކީ އުންމީދެއް އޮވެގެން ކުރާ މަަސައްކަތުގައި ކާމިޔާބު ލިބޭނެ ކަމުގެ ހެއްކެކެވެ.
އޮލިމްޕިކްސްގެ ޕްރިލިމިނަރީ ބުރުގައި، ޓާނިއާ ވަނީ، ލެބަނަންގެ މަރިއާނާ ސަހަކިއާން އަތުން ބަލިވެ ކަޓައިފަ އެވެ. ޓާނިއާ ބަލިވީ، 4-1 އިންނެވެ.
ޒިޔިން، އުފަން ގައުމު، ޗައިނާ ދޫކޮށް، 1989 ވަަނަ އަހަރު ޗިލީ އަށް ދިޔައީ، ކުޅިވަރު ކިޔަވައިދޭން ލިބުނު ފުރުސަތެއްގަ އެވެ. ޗިލީ މީހަކާ ލޯބީގެ ގޮތުން ގުޅި، ފަހުން ކައިވެނި ކުރިއިރު، ޒިޔިން ވަނީ އޭނާގެ ނަން ޓާނިއާ އަށް ބަލަދުކޮށްފަ އެވެ. އެންމެ ބޮޑު އެއް ސަަބަބަކީ، ޗިލީގެ މީހުންނަށް ފަރިތަ، އެ ގައުމުގެ މީހެއްގެ ގޮތުގައި ކުރިއަށް ދިއުމުގެ ވިސްނުމުގަ އެވެ.
ޗައިނާގައި ދިރިއުޅުނުއިރު، 1970 ގެ އަހަރުތަކުގެ ތެރެއިން، ޓާނިއާގެ ކުޅުމުގެ ރަން ދުވަސްވަރުގައި ވެސް އޭނާގެ ބޮޑު ހުވަފެނަކަށް ވެފައި އޮތީ އޮލިމްޕިކްސްއެއްގައި ކުޅުމެވެ. އެ ގޮތުން، އުމުރުން 16 އަހަރުގައި ޓާނިއާ އަށް ޗައިނާ ގައުމީ ޓީމުން ވެސް ފުރުސަތު ލިބުނެވެ. އެކަމަކު، އޭނާ އަށް ކުރިއަށް ދެވޭ ގޮތެއްނުވީ، 1986 ވަަނަ އަހަރު، ސޯލް އޮލިމްޕިކްސްގެ ދެ އަހަރު ކުރިން، ޓޭބަލް ޓެނިހުގެ "ޓޫ ކަލާ ރޫލް" އަައުމުންނެވެ. އެ އަށް ހޭނެން ދިމާވި ދަތިތަކާއި އެހެނިހެން ކަންތައްތަކާ ހެދި ފޯމަށް އަސަރުކޮށް، އެންމެ ފަހުން ޓީމުގެ ފުރުސަތު ދިޔައީ އެވެ.
ޒެން "ޓާނިއާ": މި ފަހަރުގެ އޮލިމްޕިކްސްގައި ކުޅުނު މެޗުގެ ތެރެއިން.--- ފޮޓޯ: ގެޓީއިމޭޖަސް.
އޭގެ ފަހުން،، ޗިލީ އަށް ދިރިއުޅުން ބަދަލުކުރުމަށް ފަހު، އުމުރުން 20 އަހަރުގައި ޓާނިއާ ވަނީ ޕްރޮފެޝަނަލްކޮށް ކުޅުން ހުއްޓާލައިފަ އެވެ. އަދި އޭނާ ވިއްސަކަށް އަހަރު ވަންދެން ޓޭބަލް ޓެނިސް ނުކުޅެ ވެސް ހުއްޓެވެ.
"އެންމެ ކުޑައިރުގައި ވެސް އަހަރެން ގާތުގައި އެންމެ ބޮޑު އުންމީދަކީ ކޮބައިތޯ އެހުމުން އަހަރެންގެ ޖަވާބަކީ އޮލިމްޕިއަނަކަށް ވުމޭ. މިއީ އަހަރެންގެ ދިރިއުޅުމުގެ އެންމެ ބޮޑު ހުވަފެން،" އޮލިމްޕިކް ވިލެޖްގައި ހުރެ މީޑިއާ އަށް ދިން އިންޓަވިއުއެއްގައި ޓާނިއާ ބުންޏެވެ.
ޗިލީ އަށް ބަދަލުވުމަށް ފަހު، 2003 ވަނަ އަހަރު ޓާނިއާ ކޮންމެވެސް ވަރަކަށް ވާދަވެރި ޓެނިސް ކުޅެން ފެށި އެެވެ. އެއީ، އެއިރު، 13 އަހަރުގެ ދަރިފުޅު ޓޭބަލް ޓެނިސް އަށް ޝައުގުވެރިކަން ބެހެއްޓުމުގެ ވިސްނުމާ އެކުގަ އެވެ.
އަހަރުތަކެއްގެ މެދުކެނޑުމަށް ފަހު، ޓާނިއާ އެނބުރި އިންޓަނޭޝަނަލް ލެވަލަށް ދާން ޕްރޮފެޝަނަލް ކުޅުމަށް އައީ، ކޮވިޑް-19 ޕެންޑަމިކް ތެރޭގަ އެވެ. އެ އަށް ފަހު، ވަރުގަދަ އަށް އަލުން ކުޅުން ފަށައި، ޗިލީގައި އޭނާ ޓޭބަލް ޓެނިހުން ކުރިއަށްދާން ފުރުސަތު ފަހިވުމުން، ބޭނުންހިފީ އެވެ. ތިރީސް ފަސް އަހަރު ޗިލީގައި ދިރިއުޅެފައިވާ ޓާނިއާ ވަނީ ދާދި ފަހުން، ޕޭން އެމެރިކަން ގޭމްސްގައި ޗިލީ އަށް ލޯ މެޑަލް ހޯދައިދޭން އެހީވެފަ އެވެ.
ޓޭބަލްޓެނިހުން މި ވަގުތު ދުނިޔޭގެ ރޭންކިންގައި 151 ވަނައިގައި އޮތް ޓާނިއާ އަށް މި ފަހަރުގެ އޮލިމްޕިކްސްގައި ކޮންމެ ނަތީޖާއެއް ނުކުތަސް ފަރުވާލެން ނެތެވެ. ދެކުނު އެންމެ ބޮޑު ހުވަފެން ހަގީގަތަކަށް ވުމުގެ ފަހުރު އޭނާ އަށް މާ ބޮޑެވެ.
ޓާނިއާގެ އާއިލާ ޗައިނާގައި ދިރިއުޅޭއިރު، އޭނާ އަށް އާއިލާ މީހުންގެ ފަރާތުން ލިބިފައިވާ ނަމަކީ، "އޮލިމްޕިކް ގްރޭންޑްމަދާ (އޮލިމްޕިކް މާމަ)" އެވެ.
ޓާނިއާ އޮލިމްޕިކްސް ހުވަފެން ހަގީގަތަކަށް ވުން އެއީ، އޭނާގެ ބޭބެ އާއި 92 އަހަރުގެ ބައްޕަ އަށް ވެސް ހަޔާތުގައި ލިބިގެންދިޔަ ބޮޑު އުފަލެކެވެ.
މަސްދަރު: ސީއެންއެން/ސީބީއެސް ސްޕޯޓްސް
