އެމެރިކާގެ ރިޔާސީ އިންތިހާބުގައި ޑިމޮކްރެޓިކް ޕާޓީގެ ފަރާތުން ވާދަކުރައްވާނެ ކަމަށް ބެލެވޭ އެ ގައުމުގެ ނައިބުރައީސް ކަމަލާ ހެރިސްގެ ކެމްޕޭނަށް ހަފްތާއެއް ތެރޭގައި 200 މިލިއަން ޑޮލަރު ލިބިއްޖެ އެވެ.
އިންތިހާބުގައި ކަމަލާ ވާދަކުރައްވަން ތައްޔާރުވަމުން އަންނަނީ ޑިމޮކްރެޓިކުންގެ ކެންޑިޑޭޓު އެމެރިކާގެ ރައީސް ޖޯ ބައިޑެން ދެވަނަ ދައުރަކަށް ވާދަނުކުރައްވަން ނިންމެވުމާ ގުޅިގެންނެވެ.
ޑިމޮކްރެޓުންގެ ކެންޑިޑޭޓަކަށް ގިނަ ބައިޑެންއާއި އެމެރިކާގެ ކުރީގެ ރައީސް ބަރަކް އޮބާމާ އެންޑޯޒް ކުރެއްވި ނަމަވެސް، މިހާތަނަށް އެ ޕާޓީން ރަސްމީކޮށް ކަމަލާއާ ޓިކެޓު ހަވާލުކޮށްފައެއް ނުވެ އެވެ.
ކުރު މުއްދަތެއް ތެރޭގައި އެމެރިކާ ރައްޔިތުންގެ ތާއީދު ކަމަލާ ވަނީ ހޯއްދަވާފަ އެވެ. އެއާއެކު ރިޕަބްލިކްގެ ކެންޑިޑޭޓު އެމެރިކާގެ ކުރީގެ ރައީސް ޑޮނަލްޑް ޓްރަމްޕްއާއި އެކަމަނާއާ ދެމެދު އޮތް ވާދަވެރިކަން ވަނީ ބޮޑުވެފަ އެވެ.
ޓްރަމްޕްގެ ކެމްޕޭނަށް ޖުލައި މަހުގެ ކުރީކޮޅާ ހަމައަށް އެއްކުރެވިފައި ވަނީ 331 މިލިއަން ޑޮލަރެވެ. އެ މުއްދަތުގައި ބައިޑެންއަށް އެއްކުރެވުނީ 264 މިލިއަން ޑޮލަރެވެ.
އެމެރިކާގެ އިންތިހާބު ބޭއްވުމަށް ހަމަޖެހިފައި ވަނީ ނޮވެމްބަރު 5، ގަ އެވެ. އިންތިހާބުގައި އެންމެ ވާދަވެރިވާނީ ޑިމޮކްރެޓުންނާއި ރިޕަބްލިކް އެވެ.
