ކުރީގެ ގައުމީ ޝިޕިން ކުންފުނި، އެމްއެންއެސްއެލްއިން ކުއްޔަށް ދޭ އެޕާޓްމެންޓު އިމާރާތެއްގެ ކުރިން ބޭނުން ކުރަމުން ދިޔަ އޯކިޑް ޕްލާޒާގައި ރޭ ދަންވަރު އަލިފާން ރޯވި ވަގުތު އެތަނުގެ މަގުމަތީގައި މާރާމާރީ ހިންގި މީހަކު ހައްޔަރުކޮށްފި އެވެ.
ފުލުހުން ބުނީ މަގުމަތީގައި ހުރި މީހަކާ ހިންގި އެ މާރާމާރީއާ ގުޅިގެން ހައްޔަރުކުރީ ދިވެހި ފިރިހެނެއް ކަމަށާއި އެ މައްސަލަ ތަހުގީގު ކުރަމުންދާ ކަމަށެވެ.
ބުރުޒު މަގުގައި ހުންނަ ހަތަރު ބުރީގެ އެ އިމާރާތުގައި މީހުން ދިރި ނޫޅެ، ފަޅަށް ހުންނަތާ އަހަރުތަކެއް ވަނީ ވެފަ އެވެ. އެތަނުގައި ކަރަންޓުގެ އަލިކަމެއް ވެސް ނުހުރެ އެވެ.
ނަމަވެސް "އަދަދު" އަށް މަންޒަރު ދުށް ފަރާތެއް ކިޔައިދިން ގޮތުގައި އެ ގޭގައި އެވަގުތު ނިދާފައި ތިބި ހަތަރު ވަރަކަށް މީހުން ފުލުހުންގެ ބެލުމުގެ ދަށަށް ގެންދިޔަ އެވެ.
އަލިފާނުގެ ހާދިސާގައި އެއްވެސް މީހަކަށް އަނިޔާވެފައެއް ނުވެ އެވެ. އެ ހާދިސާ ހިނގުމާއެކު ސިފައިން ވަނީ އެ ސަރަހައްދަށް ގޮސް އަލިފާން ނިއްވާލާފަ އެވެ.
