ޓޫރިސްޓުން ތިބި ސަފާރީއެއް މ. ވޭވަށު ފަރަށް އަރައިފި އެވެ.
މި ހާދިސާއާ ގުޅޭގޮތުން ވޭވަށު ކައުންސިލްގެ ރައީސް މަމްދޫހު ވަހީދު "އަދަދު" އާ ވާހަކަދައްކަވަމުން ވިދާޅުވީ، ސަފާރީ ފަރަށް އެރީ ރޭ އައި ވިލާގަނޑެއްގައި ފަޅު ބޭރުގައި އަޅާފައި އޮތްވާ ނަގިލި ކަހާލައިގެން ކަމަށެވެ.
ފަރަށް އެރިއިރު ސަފާރީގައި ނުވަ ފަޅުވެރިންނާއި 18 ޓޫރިސްޓުން ތިއްބެވެ. އެ ހުރިހާ އެންމެން ވެސް ސަލާމަތުން ރޭ ވޭވަށަށް ގެންގޮސްފައިވާ ކަމަށް މަމްދޫހު ވިދާޅުވި އެވެ.
ސަފާރީ އަދިވެސް ފަރުމަތީ އޮތް އިރު އެ ބޯޓުގައި ތިބި ފަތުރުވެރިން މިހާރު ތިބީ އެ ރަށް ކައިރި އޮންނަ މަޑިފުށި ޕްރައިވެޓް އައިލެންޑް ރިސޯޓުގަ އެވެ. އެ ބޯޓުގެ ފަޅުވެރިން އަދިވެސް ތިބީ ވޭވަށުގަ އެވެ.
މި ހާދިސާއާ ގުޅިގެން ސިފައިން މިހާތަނަށް ބަހެއް ނުބުނެ އެވެ.
ވޭވަށު ފަރަށް އަރާފައިވަނީ 'މައިނާ 1' ނަމަކަށް ކިޔާ ސަފާރީ އެކެވެ. މިއީ ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަހުމަދު ތޯރިގުގެ ވިޔަފާރިއެއް ކަމަށްވާ މައިނާ ޓުއާސް އިން އޮޕަރޭޓު ކުރާ ސަފާރީއެކެވެ.
މި ހާދިސާއާ ގުޅޭގޮތުން ތޯރިގުގެ ބަހެއް ހޯދަން ގުޅިއިރު ފޯނަށް ޖަވާބު ނުދެއްވާތީ، އޭނާގެ ބަހެއް ނުލިބެ އެވެ.
