މާލޭ ސަރަހައްދުގެ މަގުމަތީގައި ހުރި އުޅަނދުތަކުގެ ސަބަބުން ދިމާވެފައިވާ ތޮއްޖެހުމުގެ މައްސަލަ ހައްލުކޮށް، މަގުތައް ހުސްކުރަން މަލްޓިސްޓޯރީ ޕާކިން ބިލްޑިންތަކެއް އަޅަން މި ސަރުކާރުން ވެސް ނިންމައިފި އެވެ.
މާލޭގެ މަގުތައް އަމާންތަނަކަށް ހެދުމުގެ މަގުސަދުގައި ސަރުކާރުން ފަށައިގެން އުޅޭ "މާލެ ފަހި" ޕްރޮގްރާމުގެ ދަށުން ޕާކިން ބިލްޑިންތައް އަޅާނީ މާލެ އާއި ހުޅުމާލޭގައި ކަމަށް ޓްރާންސްޕޯޓު މިނިސްޓްރީން ބުނެފައިވެ އެވެ.
ޓްރާންްސްޕޯޓުން ބުނީ މި ބިލްޑިންތައް އެޅުމުގެ މަގުސަދަކީ މާލެ އާއި ހުޅުމާލޭގެ ހުރިހާ މަގެއްގައި އުޅަނދުތައް ޕާކު ކުރަމުން ގެންދިޔުމުގެ ސަބަބުން މަގުމަތީގައި ރައްކާތެރިކަމާއެކު ހިނގާބިނގާވެ އުޅުމަށާއި އުޅަނދު ދުއްވަން ދަތިވެފައިވާތީ ކަމަށެވެ.
އެގޮތުން މަލްޓިސްޓޯރީ ޕާކިން ބިލްޑިންތައް އަޅައި، ފީއެއް ކަނޑައަޅައިގެން ޕާކިން ބިލްޑިންތައް އޮޕަރޭޓް ކުރެވޭނެ ނިޒާމެއް ހަމަޖެއްސުމަކީ ކޮންމެހެން ކުރަން ޖެހޭ ކަމެއް ކަމަށް ޓްރާންސްޕޯޓް މިނިސްޓްރީން ބުންޏެވެ.
މާލެ ފަހި ޕްރޮގްރާމުގައި މައިގަނޑު ގޮތެއްގައި ހިމެނެނީ ގާނޫނާއި ގަވާއިދުގެ ތެރެއިން ވެހިކަލް ރެޖިސްޓަރީ ކުރުމާއި އުޅަނދުގެ އަދަދު ކޮންޓްރޯލް ކުރުމާއި، ޕަބްލިކް ޓްރާންްސްޕޯޓު ވަސީލަތްތައް ހަރުދަނާކޮށް ކުރިއަށް ގެންދިޔުމުގެ އިތުރުން މަގުތަކަކީ ރައްކާތެރި އަދި ދަތުރުފަތުރާއި ހިނގައި އުޅެން ފަސޭހަ އަމާން ތަންތަނަށް ހެދުމެވެ.
މާލެ ފަހި ޕްރޮގުރާމުގައި ހިމެނޭ ބައެއް ކަންކަން އެ ޕްރޮގުރާމު އިފުތިތާހު ކުރުމުގެ ކުރިން ވެސް ވަނީ ތަންފީޒު ކުރަން ފަށައިފަ އެވެ.
