ޕެރިސް (ޖުލައި 25) - ޕެރިސް އޮލިމްޕިކްސްގެ ފުޓްބޯޅަ އިވެންޓްގައި، އިއްޔެ މޮރޮކޯ އިން 2-1 އިން އާޖެންޓީނާ ބަލިކުރި މެޗުގައި، ފެނިގެންދިޔައީ ލަދުވެތި މަންޒަރެއް ކަމަށް އާޖެންޓީނާ 23 އަހަރުން ދަށުގެ ޓީމުގެ ކޯޗު، ހަވިއޭ މަޝެރާނޯ ބުނެފި އެވެ.
ހަތަރު ގަނޑިއިރަށް މެޗު ދިގުދެމިގެންދިޔައިރު، ދެ ގަޑިއިރަށް މެޗު މެދުކަނޑާލަން ޖެހުނެވެ. މެޗު މެދުކަނޑާލަން ޖެހުނީ، ނިމެން މަދު ވަގުތުކޮޅަކަށް ވަނިކޮށް މޮރޮކޯ ސަޕޯޓަރުން ދަނޑަށް އެރުމާ ގުޅިގެންނެވެ. އެ ގޮތުން، ސަޕޯޓަރުން ދަނޑަށް އަރަން ޖެހުނީ، އިތުރު ވަގުތުގެ ގޮތުގައި ދެއްކި 15 ވަނަ މިނިޓްގެ ތެރެއިން ފަހު މިނިޓްތަކުގެ ތެރޭގައި، އާޖެންޓީނާ އިން ލަނޑެއް ޖަހައި، 2-2 އިިން އެއްވަރުކުރުމުން އެކަމާ ހިތްހަމަނުޖެހިގެންނެވެ. ހަމަނުޖެހުމާ ހެދި މެޗު މެދުކަނޑާލަން ޖެހުނުއިރު، އާޖެންޓީނާ އިން އެއްވަރުކުރަން ޖެހި ގޯލު ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލިއިރު، އޮފްސައިޑް އެެވެ. އެެހެންވެ، އެ ގޯލު ބަލައިނުގަތެވެ. ހަމަނުޖެހުންތައް ކޮންޓްރޯލް ކުރުމަށް ފަހު، މެޗު ފުރިހަމަކުރީ ސަޕޯޓަރުން ނުވައްދައި، ހުސް ދަނޑެއްގަ އެވެ.
މެޗަށް ފަހު، މަޝެރާނޯ ބުނީ، އޭނާ އަކީ އަދި ބޮޑު ކޯޗިން ކެރިއަރެއް ނެތް މީހެއް ކަމުގައި ވިޔަސް، ކުޅުމުގެ ކެރިއަރުގައި ވެސް މި ފަދަ ކަމެއް ނުދެކޭ ކަމަށެވެ.
"ކަންކަން ފެނުނީ ވަރަށް ދެރަކޮށް، ސާކަސް އެއް ހެން ދިޔައީ. ލަދުވެތި މަންޒަރުތަކެއް ފެނުނީ. އެކަމަކު، އަހަރެެމެންގެ ކޮންޓްރޯލުން ބޭރު ކަންކަމަށް ވިސްނައިގެން ކުރިއަކަށް ނުދެވޭނެ. ދެން އޮތް ދެ މެޗުން ހަ ޕޮއިންޓް ހޯދައިގެން ކުރިއަށް ދެވޭތޯ ބަލަންވީ،" ކުޅުންތެރިއެއްގެ ގޮތުގައި، 2004 އާއި 2008 ވަނަ އަހަރު އާޖެންޓީނާއާ އެކު، އޮލިމްޕިކް ފުޓްބޯޅަ އިވެންޓް ކާމިޔާބުކުރި މަޝެރާނޯ ބުންޏެވެ.
އާޖެންޓީނާ އާއި މޮރޮކޯ ކުޅުނު މެޗުގެ ތެރެއިން ހަަމަނުޖެހުން ހުއްޓުވަން ފުލުހުން ދަނޑަށް އަރަނީ.
މަޝެރާނޯ ބުނީ، ފުރަތަމަ އިންޓަނޭޝަނަލް އޮލިމްޕިކް ކޮމިޓީ (އައިއޯސީ)ގެ ވެބްސައިޓުން ފެނުނީ މެޗު ނިމިފައިވާ ކަމަށް ކަމަށާއި އަލުން މެޗު ފަށަން ޖެހޭކަން އެނގުމުން، މި ކަން ކުރުމުގައި ފީފާގެ ލަފާ ވެސް ހޯދަން ބޭނުންވި ކަމަށެވެ.
"ގޭދޮށު މުބާރާތެއްގައި ވެސް ނުފެންނަ ކަހަލަ ކަންތައްތަކެއް މި މެޗުގައި މި ފެނިގެންދިޔައި. މިހެން މި ކަންތައް ވުމަކީ، އޮލިމްޕިކް އަށް ވެސް ހުތުރު ކަމެއް،" މަޝެރާނޯ ބުންޏެވެ.
އާޖެންޓީނާ އިން ހޮނިހިރު ދުވަހު ގްރޫޕްގެ ދެ ވަނަ މެޗުގައި އިރާގާ ބައްދަލުކުރާނެ އެވެ. ދެން، މި ގްރޫޕްގައި އޮތީ ޔޫކްރެއިން އެވެ.
