ޔޫއޭއީގެ އެއާ އެރޭބިއާއިން އަންނަ އޮކްޓޯބަރު މަހު ރާއްޖެއަށް ދަތުރުތައް ފަށަން ތައްޔާރުވަމުން އަންނަކަން ހާމަކޮށްފި އެވެ.
އެ އެއާލައިނުން ދަތުރުތައް ފެށުމަށް ހަމަޖެހިފައި ވަނީ އޮކްޓޯބަރު، 27 އިން ޔޫއޭއީގެ ޝާރްޖާ އިންޓަނޭޝަނަލް އެއާޕޯޓުން މާލޭގެ ވެލާނާ އިންޓަނޭޝަނަލް އެއާޕޯޓަށެވެ.
އެއާ އެރޭބިއާގެ ސީއީއޯ އާދިލް އަލް އަލީ ވިދާޅުވީ ރާއްޖެއަށް ދަތުރުތައް ކުރުމަށް ހަމަޖެހިފައި ވަނީ A320 ގެ ބޯޓެއް ބޭނުން ކޮށްގެން ކަމަށާއި ރާއްޖެއަށް ދަތުރުތައް ފެށުމަކީ އެ އެއާލައިނަށް ލިބޭ އުފަލެއް ކަމަށެވެ.
"އެއާ އަރޭބިއާއިން އިތުރު މަންޒިލްތަކަށް ދަތުރު ފެށުމަކީ ކަސްޓަމަރުންނަށް ދަތުރުކުރުމުގައި އޮޕްޝަންތައް ދިނުމަށް،" އޭނާ ވިދާޅުވި އެވެ.
އެ އެއާލައިނުން ރާއްޖެއަށް ދަތުރު ކުރުމަށް ހަމަޖެހިފައިވަނީ ޑިމާންޑަށް ބެލުމަށްފަހު ދުވާލަކު އެއް ފްލައިޓު ބާއްވާ ގޮތަށެވެ.
ރާއްޖެއަށް ދަތުރުކުރާ އެއާލައިންތައް ކޮންމެ އަހަރަކު ވެސް ދަނީ އިތުރުވަމުންނެވެ. އެގޮތުން ރާއްޖެއަށް އެކި މަންޒިލްތަކުން އަންނަ ފަތުރުވެރިން ވެސް އަންނަނީ މަހަކަށްވުރެ މަހެއް އިތުރުވަމުންނެވެ.
އެއާ އަރޭބިއާއިން އަންނަނީ ޕާކިސްތާން، ނޭޕާލް، މޮރޮކޯ، ޖޯޑަން، އިޖިޕްޓު، އަރްމޭނިއާއަށް ދަތުރު ކުރަމުންނެވެ.
