އެސްއެމްއީ ޑިވެލޮޕްމަންޓު ފައިނޭންސް ކޯޕަރޭޝަން (އެސްޑީއެފްސީ) އިން ދޫކުރި ލޯނުތަކާއި ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) ގެ ބިންތަކުން ހިލޭ ގޯތި ދޫކުރުމުން ލިބުނު ގެއްލުން ދެނެގަންނަން ހާއްސަ އޮޑިޓެއް ހެދުމަށް އޮޑިޓާ ޖެނެރަލް އޮފީހަށް އެންގުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ފާސްކޮށްފި އެވެ.
މި ހުށަހެޅުން ކޮމިޓީއަށް ހުށަހެޅުއްވީ ފުވައްމުލަކު އުތުރު ދާއިރާގެ މެންބަރު ހަމަދު އަބްދުالله އެވެ. އޭނާގެ ހުށަހެޅުމަށް ތާއީދު ކުރެއްވީ ފުނަދޫ ދާއިރާގެ މެންބަރު މުހައްމަދު މަމްދޫހެވެ.
"މާޗު 2019 އިން ފެށިގެން 17 ނޮވެމްބަރު 2023 އަށް އެސްޑީއެފްސީގެ ހާއްސަ އޮޑިޓެއް ހަދަން އަންގަން. އިތުރު ކަމެއްގެ ގޮތުން ހުޅުމާލެއިން އެޗްޑީސީގެ ޕްރޮޕަޓީތަކުގެ ތެރޭ ހިމެނޭ ބިމުން ގޯތި ދޫކޮށްފައިވާ މައްސަލާގައި އޭގެ ސަބަބުން ލިބިފައި ހުރި ގެއްލުން, މާލީ ގެއްލުން ބަލަން ހާއްސަ އޮޑިޓެއް ހަދަން," ހަމަދު ވިދާޅުވި އެވެ.
އޮޑިޓާ ޖެނެރަލް ދެ މަސް ދުވަހުގެ ތެރޭގައި އޮޑިޓުތައް ނިންމައި ހުށަހަޅަން އެންގުމަށް ވެސް މިއަދުގެ ބައްދަލުވުމުގައި ފާސްކުރި އެވެ.
ކުދި އަދި މެދު ފަންތީގެ ވިޔަފާރިތައް ކުރިއަރުވައި މާލީ އެހީ ލުއި އިންޓްރެސްޓް ރޭޓުގައި ފޯރުކޮށްދިނުމަށް އެސްޑީއެފްސީ ވުޖޫދުކުރީ މާޗު 18, 2019 ގައެވެ. މިހާތަނަށް އެސްޑިއެފްސީން އެންމެ ގިނައިން ދޫކޮށްފައިވަނީ 500،000.ރ އާއި އެއް މިލިއަން ރުފިޔާއާއި ދެމެދުގެ ލޯނެވެ.
ބިންވެރިޔާ ސްކީމުގެ ދަށުން ފުރަތަމަ ބުރުގައި ދޫކުރާ 9003 ގޯތީގެ ތެރޭގައި ހުޅުމާލެއިން ދޫކުރި 1,351 ގޯތި ހިމެނެ އެވެ. މި ގޯތިތައް ދޫކުރުމުގެ ސަބަބުން އެޗްޑީސީއަށް ލިބުނު ގެއްލުމުގެ ބަދަލުގައި އެ ކުންފުންޏަށް ދެ ފަޅެއް ދޭން އިކޮނޮމިކް ކައުންސިލުން ވަނީ ނިންމާފަ އެވެ.
