ޒިންމާ އަދާނުކުރާ ނަަމަ ޕްރޮސެކިއުޓާ ޖެނެރަލް ވެސް ބޭރުކުރާނެ ކަމަށް ވިދާޅުވެ، ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް، ޕްރޮސެކިއުޓާ ޖެނެރަލް ހުސައިން ޝަމީމަށް މަޖިލީހުގެ މިއަދުގެ ޖަލްސާގައި އިންޒާރެއް ދެއްވައިފި އެވެ.
މެންބަރު އައްބާހަކީ ސަރުކާރު ހިންގާ ޕީއެންސީއާ އެކު ކޯލިޝަން ހަދާފައިވާ އެމްޑީއޭގެ މެންބަރެކެވެ. މަޖިލީހުގައި މިހައިތަނަށް ނެގި އެކިއެކި ވޯޓުތަކުގައި އޭނާ ވޯޓު ދެއްވީ ވެސް ޕީއެންސީއާ އެއްކޮޅަށެވެ.
ޖިނާއީ އިޖުރާއަތުގެ ގާނޫނަށް ބަދަލު ގެންނަން ސަރުކާރުގެ ފަރާތުން މަނަދޫ ދާއިރާގެ މެންބަރު ހުސްނީ މުބާރަކް ހުށަހަޅުއްވާފައިވާ ބިލަށް މަޖިލީހުގެ މިއަދުގެ ޖަލްސާގައި ކުރި ބަހުަސްގައި އައްބާސް ވިދާޅުވީ ޕްރޮސެކިއުޓާ ޖެނެރަލް އަކީ "އެ އިރެއްގައި އޮންނަ ސަރުކާރެއްގެ ޕްރޮސެކިއުޓާ ޖެނެރަލެއް ނޫން" ކަމަށެވެ. އެއީ "ޕްރޮސެކިއުޓާ ޖެނެރަލްގެ އަރިސްބޭފުޅުންގެ ޕްރޮސެކިއުޓާ ޖެނެރަލެއް ނޫން" ކަމަށް ވެސް އޭނާ ވިދާޅުވި އެވެ.
"އެބޭފުޅާ ވެސް އެބަ ޖެހޭ އެ ބޭފުޅާގެ ގާނޫނީ ޒިންމާ އަދާކުރަން. އަދާނުކުރެއްވެންޏާ މިހާރުން މިހާރަށް އިސްތިއުފާދެއްވާފައި ގެއަށް ވަޑައިގަންނަވަންވީ. އެހެންނޫނީ ގަވަރުނަރު ބޭރުކުރި ގޮތަށް އަޅުގަނޑުމެން ބޭރުކުރާނަން، އިއްޒަތްތެރި ރައީސް،" އައްބާސް ވިދާޅުވި އެވެ.
ރައްޔިތުންނަށް އަނިޔާ ވެރިވާ އަދި ރައްޔިތުން އެދޭ ގޮތަށް ކަންތައް ނުކުރައްވާ އެއްވެސް ބޭފުޅަކު މަގާމުގައި ހުންނަވަން ރައްޔިތުންގެ މަޖިލީހުގެ މެންބަރުން ފުރުސަތު ނުދެއްވާނެ ކަމަށް ވެސް އޭނާ ވިދާޅުވި އެވެ.
"އެއަށް ވުރެ ނަޒާހަތްތެރި މަޖިލީހެއް މިއީ،" އައްބާސް ވިދާޅުވި އެވެ.
ވާނުވާ ބަންދުގައި މީހުން ތިބެން ޖެހޭ ޖެހުން ނިމުމަކަށް ގެންނަން ޖެހޭ ކަމަށާއި އެެއީ ރައީސުލް ޖުމްހޫރިއްޔާ ހާއްސަ އިސްކަމެއް ދެއްވައިގެން ނުވަތަ ޕްރޮސެކިއުޓާ ޖެނެރަލް އަށް އޮންނަ ބާރުގެ ބޭނުންކޮށްގެން ވެސް ކުރަން ޖެހޭ ކަމެއް ކަމަށް ވެސް އޭނާ ވިދާޅުވި އެވެ.
ޝަރީއަތްތައް ލަސްވާ އެއް ސަބަބަކީ ކޯޓުރޫމްތައް މަދުވުން ކަމަށް ކްރިމިނަލް ކޯޓުން ދާދި ފަހުން ބުނެފައި ވާތީ އެވާހަކައަށް ވެސް އައްބާސް ފާޑުވިދާޅުވި އެވެ.
