މެކްސިކޯ ސިޓީ (ޖުލައި 22) - ބާސެލޯނާގެ ޔޫތު ޓީމުގެ ކޯޗުކަން ދޫކޮށްލުމަށް ފަހު، ރަފައެލް މާކުއޭޒް މެކްސިކޯ ގައުމީ ފުޓްބޯޅަ ޓީމުގެ އެސިސްޓަންޓް ކޯޗުކަމާ ހަވާލުވެއްޖެ އެވެ.
ކުރިން ބާސެލޯނާ އަށް ކުޅުނު މާކުއޭޒް، 45، އެ ކްލަބްގެ ޔޫތު ޓީމުގެ ކޯޗުކަމާ ހަވާލުވީ 2022 ވަނަ އަހަރު އެވެ. ދެ އަހަރުގެ ކޮންޓްރެކްޓެއްގައި އެ ޓީމާ ހަވާލުވުމުގެ ކުރިން، މާކުއޭޒް ހުރީ ރެއާލް ސޮސިއެޑާޑްގެ 15 އަހަރުން ދަށުގެ ޓީމުގެ ކޯޗަކަށެވެ.
މެކްސިކޯގެ ކޯޗުކަމާ ޖަވިއޭ އަހީރޭ ތިން ވަނަ ފަހަރަށް ހަވާލުވާން ތައްޔާރުވަމުން އަންނައިރު، އޭނާގެ ކޯޗިން ޓީމަށް މާކުއޭޒް ގެނައުމުގެ އެންމެ ބޮޑު ބޭނުމަކީ، މެކްސިކޯ ފުޓްބޯޅައިގެ ތަޖުރިބާ ބޮޑު ނަމެއް ޓީމުގައި މަސައްކަތް ކުރަން ފުރުސަތު ދިނުމާއި އޭނާގެ އެހީތެރިކަން ހޯދުމެވެ.
މާކުއޭޒް ވަނީ މެކްސިކޯ ޓީމަށް ފީފާ ވޯލްޑް ކަޕްގެ ފަސް މުބާރާތެއްގައި ކުޅެދީފަ އެވެ. މާކުއޭޒް ވަނީ މެކްސިކޯ ޓީމަށް 147 މެޗު ކުޅެދީފަ އެވެ.
މެކްސިކޯގެ ކޯޗުގެ މަގާމު ހުސްވީ ދާދި ފަހުން، ނިމުނު ކޮޕަ އެމެރިކާ ފުޓްބޯޅަ މުބާރާތުގައި އެ ޓީމުގެ ދަށް ނަތީޖާތަކަށް ފަހު ކޯޗަކަށް ހުރި، ޖޭމީ ލޮޒާނޯ ވަކިކުރުމުންނެވެ. ލޮޒާނޯ ވަކިކުރީ މި ފަހަރުގެ ކޮޕަ އެމެރިކާ އާއި 2022 ވަނަ އަހަރުގެ ވޯލްޑް ކަޕަށް ކަނޑައެޅި ޓާގެޓްތައް ހާސިލްނުވުމުންނެވެ.
އަހީރޭ، މެކްސިކޯ ކޯޗިން ޓީމު ވަރުގަދަ ކުރާ އެންމެ ބޮޑު ބޭނުމަކީ ދެ އަހަރު ތެރޭގައި، އެ ގައުމު ހިމެނޭ ގޮތަށް ހޯސްޓް ކުރަން ތައްޔާރުވާ ފީފާ ވޯލްޑް ކަޕަށް ޓީމު ވަރުގަދަ ކުރުމުގެ ގޮތުންނެވެ. މެކްސިކޯ އިން ފީފާ ވޯލްޑް ކަޕް ހޯސްޓްކުރަނީ އެމެރިކާ އާއި ކެނަޑާއާ ގުޅިގެންނެވެ.
