އެމެރިކާގެ ރިޔާސީ އިންތިހާބުގައި ޑިމޮކްރެޓްސްގެ ކެންޑިޑޭޓަކަށް ކަމަލާ ހެރިސް އެންޑޯޒްކުރަން އެ ގައުމުގެ ރައީސް ޖޯ ބައިޑެންގެ އިތުރުން ޑިމޮކްރެޓްސްގެ ލީޑާޝިޕްގެ ގިނަ ބަޔަކު ހާމަކޮށްފި އެވެ.
ޑިމޮކްރެޓްސްގެ ކެންޑިޑޭޓަކަށް ކަމަލާ އެންޑޯޒްކުރަން އެ ޕާޓީގެ ގިނަ ބަޔަކު ނިންމާފައި ވަނީ ރިޔާސީ އިންތިހާބުގެ ރޭހުން ބައިޑެން ފަހަތަށް ޖެހެން ނިންމުމާ ގުޅިގެންނެވެ. ނަމަވެސް މިހާތަނަށް ޑިމޮކްރެޓްސްއިން ރަސްމީކޮށް ކަމަލާ އެންޑޯޒްކޮށްފައެއް ނުވެ އެވެ.
ބައިޑެން "އެކްސް" ގައި ކުރެއްވި ޕޯސްޓެއްގައި ވިދުވީ ޑިމޮކްރެޓްސްގެ ކެންޑިޑޭޓަކަށް ކަމަލާ އެންޑޯޒްކުރަން ނިންމާފައިވާ ކަމަށާއި އެކަމަނާއަށް ފުރިހަމައަށް ތާއީދުކުރާ ކަމަށެވެ.
ކަމަލާ އެންޑޯޒްކުރަން ނިންމި މީހުންގެ ތެރޭގައި ރިޔާސީ އިންތިހާބުގެ ރޭހުން ބައިޑެން ވަކިވުމަށް ގޮވާލި ޑިމޮކްރެޓްސްގެ ކޮންގްރެސްގައި ހިމެނޭ ގިނަ ބަޔަކު ހިމެނެ އެވެ.
ކަމަލާގެ އިތުރުން ޑިމޮކްރެޓްސްގެ ކެންޑިޑޭޓަކަށް އެ ޕާޓީގެ އެކި ސްޓޭޓްތަކުގެ ގަވަރުނަރުންނާއި ސެނެޓަރުންގެ ޝައުގުވެރިކަން ހުރިކަން އަންނަނީ ހާމަކުރަމުންނެވެ. ޑިމޮކްރެޓުން ކުރިއަށް އޮތް ދުވަސްތަކުގައި ޓިކެޓު ރަސްމީކޮށް ދޭނެ މީހަކު ނިންމާނެ އެވެ.
އެމެރިކާގެ ރިޔާސީ އިންތިހާބު ބޭއްވުމަށް ހަމަޖެހިފައި ވަނީ ނޮވެބްަރު 5، ގަ އެވެ. އިންތިހާބުގައި ޑިމޮކްރެޓުގެ ކެންޑިޑޭޓާ ދެކޮޅަށް ނިކުންނާނީ ރިޕަބްލިކްގެ ކެންޑިޑޭޓް ޑޮނަލްޑް ޓްރަމްޕް އެވެ.
ބައިޑެންގެ ސިއްހީ ހާލަތާމެދު އާންމުންގެ އިތުރުން ޑިމޮކްރެޓުންގެ ގިނަ ބައެއްގެ ކަންބޮޑުވުންތަކެއް ހުއްޓެވެ. އެއާއެކު، އެކި ޕޯލްތަކުން ވެސް ބައިޑެންގެ މައްޗަށް ޓްރަމްޕް ވަނީ ކުރިހޯދާފަ އެވެ.
