ޕެރިސް (ޖުލައި 21) - ފްރާންސްގެ ކްލަބް، ލިޔޯންގެ ވެރިޔާ، ޖޯން ޓެކްސްޓާ، ބްރެޒިލްގެ މީޑިއާ އަކަށް ދިން އިންޓަވިއުއެއްގައި ފްރާންސްގެ ޗެމްޕިއަން، ޕީއެސްޖީއާ ބެހޭގޮތުން ދެއްކެވި ވާހަކަތަކުގެ މައްސަލައިގައި، އޭނާ އަށް ޕީއެސްޖީން އިންޒާރުދީފި އެވެ.
ބްރެޒިލްގެ މީޑިއާއެއް ކަމަށްވާ ގްލޯޯބޯ އަށް ދިން އިންޓަވިއުއެއްގައި ޓެކްސްޓާ ވިދާޅުވީ، ލިޔޯނުން ފްރާންސްގައި ކާމިޔާބު ހޯދަން ވާދަކުރަން ޖެހޭ ޓީމު ހިންގަނީ ވެރިއެއް ނޫން ކަމަށާއި ގައުމަކުން ކަމަށެވެ.
ޓެކްސްޓާ، އެ އިޝާރާތްކުރެއްވީ ޕީއެސްޖީ އަށެވެ. ޕީއެސްޖީ، 2011 ވަނަ އަހަރުން ފެށިގެން ހިންގަމުން އަންނަ، ގަތަރު ސްޕޯޓްސް އިންވެސްޓްމަންޓް ގްރޫޕަކީ ގަތަރުގެ އިންވެސްޓްމަންޓް އޮތޯރިޓީ (ގަތަރުގެ ސޮވެރިން ފަންޑް)އާ ގުޅުން އޮތް ކުންފުންޏެކެވެ.
ލިޔޯން ހިންގަމުން އަންނަ ޓެކްސްޓާގެ ކުންފުނި، އީގަލް ފުޓްބޯލް ހޯލްޑިންސް ގްރޫޕަކީ، އިނގިރޭސި ޕްރިމިއާ ލީގުގެ ކްލަބް، ކްރިސްޓަލް ޕެލަސްގެ މެޖޯރިޓީ ހިއްސާދާރު ވެސް މެ އެވެ.
ޕީއެސްޖީގެ ޖެނެރަލް ސެކްރެޓަރީ، ވިކްޓޯރިއާނޯ މެލޭރޯ ސޮއިކުރައްވައި، ލިޔޯނަށް ފޮނުވި ސިޓީއެއްގައިވަނީ، ޕީއެސްޖީގެ އަގުވެއްޓޭގޮތަށް ލިޔޯންގެ ރައީސް، ޓެކްސްޓާ ދެއްކެވި ހަގީގަތެއް ނެތް ވާހަކަ ކުށްވެރިކޮށް، އެ ވާހަކަތަކުގެ ސަބަބުން ޕީއެސްޖީއާ ގުޅުން ހުރި އެންމެންގެ އަގުވެއްޓޭފަދަ ހާލަތެއް ކުރިމަތިވެފައިވާ ކަމަށެވެ. ލިޔޯނަކީ ވެސް އެންމެ ރަނގަޅަށް ހިންގާ ކްލަބެއް ނޫންކަން ތަހުގީގީ އިދާރާތަކުގެ ރިޕޯޓްތަކުން ފެންނަން އެބަހުރިކަން އެ ސިޓީގައި ފާހަގަކޮށްފައިވާއިރު، ޕީއެސްޖީގެ އަގުވެއްޓޭގޮތަށް ދެން ވާހަކަ ތަކުރާރުކޮށްފިނަމަ، ގާނޫނީ އިމުގެ ތެރެއިން ކުރިއަށްދާނެ ކަމަށް ވެސް ބުނެފައިވެ އެވެ.
ބްރެޒިލްގެ ކްލަބް، ބޮޓަފޯގޯގެ މައި ހިއްސާދާރަކަށް ވެސް ހުންނެވި، ޓެކްސްޓާއާ ދެކޮޅަށް، ޕީއެސްޖީން ގާނޫނީ ފިޔަވަޅު އަޅާއިރު، އެކަން ބްރެޒިލާއި ފްރާންސްގެ ކޯޓުތަކުގައި ވެސް ކުރިއަށްގެންދާނެ ކަމަށް ވިކްޓޯރިއާނޯ ފޮނުއްވި ސިޓީގައިވެ އެވެ.
ފްރާންސްގެ ފުޓްބޯޅައިގެ މާލީ ކަންކަން ތަހުގީގު ކުރުމުގައި، ހަރަކާތްތެރިވާ، ޑީއެންސީޖީން މިދިޔަ އަހަރު ޖުލައި މަހު ނެރުނު މުސާރައިގެ ލިޔެކިޔުންތަކުއް ލިޔޯންގައި ހުރީ އެންމެ ރަނގަޅަށް ނޫންކަން ވަނީ ފާހަގަކޮށްފަ އެވެ. އަދި ލިޔޯނުން މާލީ ކަންކަން ހަމަޔަކަށް އަޅުވަން ފުރުސަތު ދިނުމުން، މިދިޔަ އަހަރު ޑިސެމްބަރު މަހު، ލިޔޯނުން ވަނީ، ޑީއެންސީޖީން ލަފާދީފައިވާ ގޮތަށް ކްލަބްގެ ބަޖެޓް ހަމަޔަކަށް އަޅުވައިފަ އެވެ.
