މޯލްޑިވްސް އިސްލާމިކް ބޭންކް (އެމްއައިބީ) ގެ "ފައިސާމޯބައިލް" އަށް ބޮޑެތި އަޕްޑޭޓްތަކެއް ގެނެސް، "ފައިސާމޯބައިލް އެކްސް" މިއަހަރުގެ ހަތަރުވަނަ ކުއާޓަރުގައި ގެންނަން ނިންމައިފި އެވެ.
އެމްއައިބީން ފައިސާމޯބައިލްއަށް ގެންނަ އަޕްޓޭޑްތައް އިއުލާންކުރީ ބުރާސްފަތި ދުވަހު އެ ބޭންކުން "ބްރޭކިން ބެރިއާސް އިން ބިޒްނަސް ބޭންކިން" ގެ ނަމުގައި ބޭއްވި ހަފްލާއެއްގަ އެވެ.
ފައިސާމޯބައިލް އެކްސް:
އެމްއައިބީން ބުނީ ފައިސާމޯބައިލް އެކްސްގެ ތައާރަފްކުރަނީ ކަސްޓަމަރުންގެ ހިޔާލުތައް ހޯދުމަށްފަހު ކަސްޓަމަރުން ބޭނުންވާ ގޮތަށް ކަމަށެވެ.
އެގޮތުން އެޕް މެދުވެރިކޮށް ސްވިފްޓް ޓްރާންސްފާ، ފަވަރަ ޓްރާންސްފާ، ބަލްކް ޓްރާންސްފާ އަދި ޝެޑިއުލް ޓްރާންސްފާ ކުރޭވެނެ ކަމަށް އެ ބޭންކުން ބުނެ އެވެ.
"ފައިސާމޯބައިލް މެދުވެރިކޮށް ޕާސަނަލް ކާޑާއި ބިޒްނަސް ކާޑުތައް މެނޭޖްކުރެވޭނެ. ކާޑުތައް އެކްޓިވޭޓްކޮށް ޕިން ބަދަލު ކުރުމަށް ވެސް އެޕުން ފުރުސަތު ލިބޭނެ. އަދި އެކްސްޕެންސް ކާޑަށް ޓޮޕްއަޕްވެސް ކުރެވޭނެ،" އެމްއައިބީން ބުނެ އެވެ.
އެޕް މެދުވެރިކޮށް ފައިސާނެޓުން ލިބޭ ހުރިހާ ހިދުމަތެއް ލިބޭނެކަން ފާހަގަކޮށް އެމްއައިބީން ބުނީ އޭގެއިތުރުން ޕާސެނަލް އެކައުންޓުން ބިޒްނަސް އެކައުންޓަށް ސްވިޗް ކުރެވޭނެ ކަމަށެވެ.
އެޕްގެ ޑޭޝްބޯޑް މެދުވެރިކޮށް ހުރިހާ އެކައުންޓެއް ފެނުމުގެ އިތުރުން، ޕެންޑިން ޓްރާންސެކްޝަންސް އެޕްރޫކޮށް، ކުއިކް އެކްސެސް މެނޫ ކަސްޓަމައިޒް ކުރެވެ އެވެ.
ފައިސާނެޓް އައިޑީ:
ފައިސާނެޓް އައިޑީ މެދުވެރިކޮށް ޑިޖިޓަލްކޮށް އައިޑެންޓިޓީ ވެރިފައިކޮށް، އެޕް މެދުވެރިކޮށް ބިޒްނަސް ކަސްޓަމަރުންނަށް އެކި ރިކުއެސްޓްތަކާއި އެޕްލިކޭޝަންތައް ހުށަހެޅެ އެވެ.
އެމްއައިބީން ބުނީ ކަސްޓަމަރުންނަށް ފައިސާނެޓް އައިޑީ މެދުވެރިކޮށް ކަސްޓަމަރުންނަށް ރައްކާތެރިކަން ލިބޭނެ ކަމަށާއި އެ ބޭންކުން މިހާތަނަށް ވެސް ކަސްޓަމަރުންނަށް ރައްކާތެރިކަން ކަށަވަރުކޮށްދީފައިވާ ކަމަށެވެ.
ފައިސާނެޓް އައިޑީ މެދުވެރިކޮށް ފައިސާމޯބައިލް އެކްސްއަށް ލޮގިން ކުރެވެ އެވެ.
އެޕްތައް ލޯންޗުކުރާއިރު އިތުރު ފީޗާތައް ވެސް ފައިސާނެޓް އައިޑީގެ އިތުރުން ފައިސާމޯބައިލް އެކްސްއަށް ގެންނާނެ ކަމަށް އެމްއައިބީން ބުނެ އެވެ.
އެމްއައިބީން ވަނީ އެ ބޭންކުގެ ބިޒްނަސް އެކައުންޓުތައް ފުލީ ޑިޖިޓަލްކޮށް ހުޅުވޭނެ އިންތިޒާމު ހަމަޖައްސައި، ޝަރިއާ ކޮމްޕްލަޔަންޓް ސްޓްރަކްޗާގެ ދަށުން އޯވާޑްރާފްޓް ކުރެވޭ ގޮތް ހަދާފަ އެވެ.
