މޯލްޑިވްސް އިސްލާމިކް ބޭންކް (އެމްއައިބީ) ގެ ބިޒްނަސް ބޭކިންގެ ހިދުމަތްތައް ފުޅާކޮށް އެކައުންޓު ހުޅުވުން ޑިޖިޓަލް ކުރުމުގެ އިތުރުން އޯވާޑްރާފްޓް ފެސިލިޓީގެ ހިދުމަތް ތައާރަފްކޮށްފި އެވެ.
އެމްއައިބީން "ބްރޭކިން ބެރިއާސް" ގެ ނަމުގައި މީރުމާ މާލަމްގައި މިރޭ ބޭއްވި ހަފްލާއެއްގައި އެ ކުންފުނިން ބިޒްނަސް ބޭންކިންއަށް މުޅި އަލަށް ތައާރަފްކުރި ހިދުމަތްތައް ލޯންޗުކޮށްދެއްވީ އިކޮނޮމިކް މިނިސްޓަރު މުހައްމަދު ސައީދު އެވެ.
އެ ބޭންކުން އަލަށް ތައާރަފްކުރި ހިދުމަތުގެ ދަށުން ވިޔަފާރިތަކަށް ބޭންކް އެކައުންޓު ހުޅުވުމުގެ ހިދުމަތް އެއްކޮށް ޑިޖިޓަލްކޮށް، ރައްކާތެރިކަމާއެކު އެކައުންޓު ހުޅުވެ އެވެ.
އެމްއައިބީން ބިޒްނަސް ބޭންކިންގެ ކަސްޓަމަރުންނަށް އޯވާޑްރާފްޓް ކުރެވޭ ގޮތް ހަމަޖެއްސީ ޝަރިއާ ކޮމްޕްލަޔަންޓް ސްޓްރަކްޗާގެ ދަށުންނެވެ.
އޭގެއިތުރުން ބިޒްނަސް ބޭންކު ހުޅުވާ ގަޑިވެސް ހެނދުނު 8:30 އިން ހަވީރު 4:00 ޖަހަންދެން އެ ބޭންކުން ވަނީ އިތުރުކޮށްފަ އެވެ.
އެމްއައިބީގެ ބިޒްނަސް ބޭކިންގެ އިވެންޓުގެ ތެރެއިން: އެމްއައިބީން ވަނީ ބިޒްނަސް ކަސްޓަމަރުންނަށް އޯވާޑްރާފްޓްގެ ފެސިލިޓީ ތައާރަފްކޮށްފައި -- ފޮޓޯ: މިރާން ނާޝިމް / އަދަދު
އެމްއައިބީން އަލަށް ތައާރަފްކުރި ހިދުމަތްތައް:
- ބިޒްނަސް އެކްސްޕެންސް ކާޑު - ފަސޭއިން ޕެޓީކޭޝް މެނޭޖުކޮށް، ޓޮޕްއަޕް ކުރެވޭ ގޮތް ހެދުން.
- ވިޔަފާރިތަކަށް އެމްއެމްއޭގެ "ފަވަރަ" އިން ބަލްކް ޓްރާންސްފާގެ ހިދުމަތް ދޭން ފެށުން.
- ވިޔަފާރިތަކަށް "ފަވަރަ" އިން ހުރިހާ ބެންކަކަށް ފައިސާ ދެއްކެން ފެށުން.
- ވިޔަފާރިތަކަށް މުސާރަ ކޯޑު މެދުވެރިކޮށް، މުސާރަތައް ކޮންމެ ބޭންކަކަށް ޖަމާކުރެވެން ފެށުން.
- ޓްރާންސެކްޝަންތައް ޝެޑިއުލްކޮށްގެން ކުރެވެން ފެށުން.
އެމްއައިބީގެ ހުރިހާ ކަސްޓަމަރުންނަށް ވެސް ދޭ ގިނަ ހިދުމަތްތަކަކީ ޑިޖިޓަލް ހިދުމަތްތަކެވެ. އެ ބޭންކުން އަންނަނީ އާ ހިދުމަތްތައް ތައާރަފްކޮށް، އިތުރަށް ފުޅާކުރަމުންނެވެ.
އެމްއައިބީގެ ޑިޖިޓަލް ހުރިހާ ޕްލެޓްފޯމެއްގެ މަސައްކަތްތައް ކޮށްފައިވަނީ ދިވެހިންނެވެ. އެގޮތުން އެމްއައިބީގެ ހުރިހާ ޑިޖިޓަލް ޕްލެޓްފޯމްތަކުން ވެސް ފެނިގެންދަނީ ދިވެހިންގެ އީޖާދުތަކެވެ.
