އެއާ ކާގޯއިން ވަގަށް އެތެރެކުރި ސިނގިރޭޓުތަކެއްގެ މައްސަލައިގައި ބައިވެރިވުން އޮތް ކަމަށް ބެލެވޭ ކަސްޓަމްސްގެ މުވައްޒަފަކު ސަސްޕެންޑް ކޮށްފައިވާ ކަމަށް އެ އިދާރާއިން މިއަދު ހާމަކޮށްފި އެވެ.
ކަސްޓަމްސްއިން މި މައްސަލައާ ގުޅޭ ސީދާ ތަފުސީލުތައް ނުދިން ނަމަވެސް، ކަސްޓަމްސްގެ އޮފިޝަލަކު ވަނީ ކަން ހިނގައިދިޔަ ގޮތް ރައްޔިތުންގެ މަޖިލީހުގެ މާލިއްޔަތު ކޮމިޓީގެ މެމްބަރުންނާ ހިއްސާކުރައްވާފަ އެވެ.
"އެއާ ކާގޯއިން ވެސް ހަމަ ސިނގިރޭޓު، އަތުލައިގަތިން. އަޅުގަނޑުމެން އޭތި، ކުޑަކޮށް އެއްބައި އެއްޗެހި ދޫވެސް ކޮށްލިން. މިހާރު އެއީ ޕޮއިންޓުން ކެޕްޗާކޮށްފިއްޔާ އަޅުގަނޑުމެންނަކަށް ނޭނގޭ އެއީ ކޮން ބައެއްގެ ހިއްސާވާ އެއްޗެއް ކަމެއް. އެ ހިސާބުން އެ ކަންތަކުގައި އެ ވަގުތު އެތާ އުޅޭ މީހުން އެކަނި އަޅުގަނޑުމެންނަށް އެނގޭނީ،" އޮފިޝަލް ބުންޏެވެ.
"އެހެންވީމާ، އަޅުގަނޑުމެން އޭގެ ތެރެއިން އެއްބައި އެއްޗެހި މާލެ ތެރެއަށް ދޫކޮށްލައިގެން އޭތި ފޮލޯކޮށްގެން، އިންޓެލިޖެންސާ އެއްޗެހި ހޯދައިގެން އަޅުގަނޑުމެންނަށް މި އިނގުނީ އެ އެއްޗެހި އެއީ ކޮން ބަޔެއް ކުރާ އޮޕަރޭޝަނެއްތޯ، ކޮން ބަޔެއްތޯ މީގައި ގުޅިފައި މިހުރީ،"
ވަގަށް ސިނގިރޭޓުތައް އެތެރެކުރުމުގައި ކަސްޓަމްސްގެ މުވައްޒަފުގެ ބައިވެރިވުން އޮތް ކަން ފާހަގަކުރެވުނީ މި އޮޕަރޭޝަންގެ ތެރެއިންނެވެ. ކަސްޓަމްސްގެ އޮފިޝަލް ބުނީ އެ މުވައްޒަފަކީ އެ މުދާ ސްކޭން ކުރަން ހުރި މުވައްޒަފު ކަމަށެވެ.
މިފަހަކަށް އައިސް ވަގަށް އެތެރެކުރަން މަސައްކަތްކުރާ ސިނގިރޭޓު ކޮންޓެއިނަރުތައް ކަސްޓަމްސްއިން އަތުލައިގަންނަ މިންވަރު އަންނަނީ އިތުރުވަމުންނެވެ. މިފަހުން ވެސް ވަގަށް އެތެރެކޮށްފައިވާ 173 ކާޓަންގެ ސިގިނރެޓު އަތުލައިގެންފައިވެ އެވެ.
އެ ސިނގިރެޓުތަކުގެ މާކެޓު އަގަކީ 1.6 މިލިއަން ރުފިޔާ ކަމަށް ކަސްޓަމްސް އިން ބުނެ އެވެ. އަދި އިމްޕޯޓް ޑިއުޓީގެ ގޮތުގައި ވެސް 5.6 މިލިއަން ރުފިޔާ ދައްކަންޖެހޭނެ ކަމަށް ކަސްޓަމްސް އިން ބުނެ އެވެ.
ކޮމިޓީގައި މިއަދު ހިއްސާކުރީ މި މައްސަލައާ ގުޅޭ މައުލޫމާތު ކަމެއް ނުވަތަ ނޫން ކަމެއް ޔަގީނެއް ނޫނެވެ.
