އެފްއެސްއެމް އިން ގއ. މާމެންދޫ އަދި އެ އަތޮޅު ނިލަންދޫ އަށް ގެންދިޔަ ޕެޓްރޯލުގައި ތެލަށްވުރެ ގިނައިން ފެން ހުރި މައްސަލައެއް ފެންމަތިވެއްޖެ އެވެ.
އަދަދު ނޫހާ ވާހަކަ ދައްކަމުން މާމެންދޫގައި ހަމައެކަނި ޕެޓްރޯލްގެ ވިޔަފާރި ކުރަމުން ގެންދާ ވިޔަފާރިވެރިޔާ ބުނީ ޕެޓްރޯލުގައި ފެން ހުރިކަން އެނގުނީ ދޯންޏަކަށް އަޅައިގެން ދަތުރެއް ކުރިއިރު، އިންޖީނުންް އެކަން އެލާޓް ކުރުމުން ކަމަށެވެ.
ފަހުން ބެލިއިރު، އެހެން ފީފާތަކުގައި ވެސް ހުރީ ގިނައިން ފެން ކަމަށް އޭނާ ބުންޏެވެ. މި ނޫހަށް ފޮނުވާފައިވާ ވީޑިއޯތަކުން ވެސް ތެލުގައި ގިނައީ ފެންކަން ފާހަގަވެ އެވެ.
އެފްއެސްއެމް އިން މިދަތުރުގައި ޕެޓްރޯލް އަޅައިފައިވަނީ މާމެންދޫ، ނިލަންދޫ އަދި އެ އަތޮޅު ވިލިނގިިއްޔަށެވެ. ނަމަވެސް ޕެޓްރޯލުގައި ތެލަށްވުރެ ފެން ގިނަވެގެން މިއުޅެނީ މާމެންދޫ އާއި ނިލަންދޫއަށް އެޅި ޕެޓްރޯލުގަ އެވެ.
ނިލަންދޫގައި ވެސް ޕެޓްރޯލްގެ ވިޔަފާރި ކުރައްވާ ބޭފުޅާ ވެސް ވިދާޅުވީ މިފަހަރު ރީފިލް ކުރި ޕެޓްރޯލުގައި ފެން ހުރި ކަމަަށެވެ. މިރަށަށް އަޅައިފަ ވަނީ ޖުމްލަ 1000 ލީޓަރެވެ. އެއީ ގާތްގަނޑަކަށް ފަސް ފީފާ ކަމަށް އޭނާ ބުންޏެވެ. އަދި މީގެއިތުރުން ޕެޓްރޯލުގައި ފެން ހުރިކަން ފާހަގަ ވެގެން އެކަން ބެލިއިރު ޕެޓްރޯލުގެ ގޮތުގައި ސަލާމަތް ކުރެވިފައި ވަނީ ދެ ފީފާ ކަމަށް ވެސް އޭނާ ބުންޏެވެ.
އެކަމާ ގުޅޭ ގޮތުން އެފްއެސްއެމް އާއި ސުވާލުކުރުމުން ބުނީ އެކަހަލަ އެއްވެސް މައްސަލައެއް އެތަނަށް ލިބިފައިނުވާ ކަމަށާއި ނަމަވެސް އެފަދަ މައްސަލައެއް އުޅޭ ނަމަ ވަރަށް މުހިންމު ކަމެއްގެ ގޮތުގައި ބަލާނެ ކަމަށެވެ.
