އެމްއެމްއޭގެ ގަވަރުނަރު އަލީ ހާޝީމް ވަކިކުރަން ރައީސްއަށް ލަފާ ދޭން ރައްޔިތުންގެ މަޖިލީހުން ހިންގާ މައްސަލައިގައި ޖަވާބުދާރީވާން ، އާލާސްކަންފުޅާ އުޅުއްވާތީ މިއަދު ހާޒިރުވެވެން ނެތް ކަން މާލިއްޔަތު ކޮމިޓީއަށް އޭނާ އަންގަވައިފި އެވެ.
ގަވަރުނަރުގެ ޒިންމާ އަދާނުކުރެވޭ ކަމަށް ބުނެ ހާޝިމް ވަކިކުރަން ލަފާ ދިނުމުގެ މައްސަލައިގައި ކޮމިޓީގައި މިއަދު އޮތީ އޭނާއަށް ޖަވާބުދާރީވާން ފުރުސަތު ދިނުމެވެ. މިއީ މަޖިލީހުގެ ގަވާއިދުގެ ދަށުން އޭނާއަށް ދޭން ޖެހޭ ފުރުސަތެއް، އަދި ކޮންމެހެން ފުރިހަމަ ކުރަން ޖެހޭ އިޖުރާއަތެކެވެ.
ކޮމިޓީއަށް ހާޒިރުވެވަޑައި ނުގެންނެވި ނަމަވެސް، ހާޝިމް ވަނީ އޭނާއަށް ޒިންމާ އަދާނުކުރެވޭނެ ކަމަށް މަޖިލީހުން ފާހަގަަކުރި ކަންކަމަށް ޖަބާވުދާރީވެ، މަޖިލީހަށް ލިޔުމުން ޖަވާބެއް ފޮނުއްވާފަ އެވެ.
ހާޝިމްއަށް ޒިންމާ އަދާނުކުރެވޭ ކަމަށް މަޖިލީހުން ބަލަމުންދާ މައްސަލައިގައި ފާހަގަކޮށްފައިވާ ކަންކަމަކީ:
- ބޭންކުތަކުން ލޯނު ދޫކުރާ މިންވަރު ހިފަހަައްޓަން ނުސީދާކޮށް ބާރުއެޅުއްވުން
- ޑޮމެސްޓިކް މާކެޓު ރަނގަޅަށް ރެގިއުލޭޓު ނުކުރެވުން
- މާލީ އަދި ފައިސާގެ ކުށްތައް ހުއްޓުވަން ގަވާއިދުތައް އަދާހަމަ ނުކުރެވުން
- އެމްއެމްއޭން މި ސަރުކާރަށް ދޭން ޖެހޭ ލަފާ ނުދިނުން
- ގަވަރުނަރުގެ މަސްއޫލިއްޔަތުތައް އަދާނުކުރެވުން
ގަވަރުނަރުގެ މަގާމުން ހާޝިމް ވަކިކުރަން ރައީސަށް ލަފާއެރުވުމުގެ މައްސަލަ ރައްޔިތުންގެ މަޖިލިހަށް ހުށަހެޅުއްވީ މަޖިލިހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ނާޒިމެވެ.
