އެމެރިކާގެ ކުރީގެ ރައީސް ޑޮނަލްޑް ޓްރަމްޕަށް ބަޑިން ދިން ހަމަލާއާ ގުޅިގެން، ސީކްރެޓް ސާވިސްއިން ފުލުހުން ގޯސްކޮށްފި އެވެ.
ބަޑި ޖެހި އިރު ޓްރަމްޕު ހުންނެވީ ޕޯޑިއަމުގައި ވާހަކަ ދައްކަވާށެވެ. ބަޑީގެ އަޑު އިވުމާއެކު ޓްރަމްޕު ޕޯޑިއަމް ކައިރިއަށް ތިރިވި އެވެ. އަދި ތެދުވެވަޑައިގެންނެވިއިރު ކަންފަތުން ލޭ އާދެ އެވެ. އެ ހަމަލާގައި އެއްވުމުގައި ބައިވެރިވި އެކަކު މަރުވި އެވެ.
ޓްރަމްޕަށް ހަމަލާދިނީ ތޯމަސް މެތިއު ކްރޫކްސް، 20، ކަމަށް އެފްބީއައި އިން ވަނީ ހާމަކޮށްފަ އެވެ. އޭނާއަށް ސީކްރެޓް ސާވިސްއިން ވަނީ ވަގުތުން ބަޑިން ހަމަލާދީ މަރާލައިފަ އެވެ.
ދަ ނިއުޔޯކް ޕޯސްޓުން ބުނީ ޓްރަމްޕަށް ހަމަލާދިން ސަރަހައްދަކީ ސީކްރެޓް ސާވިސްގެ ޕެރިމީޓާގައި ހިމެނޭ ތަނެއް ނޫން ކަމަށާއި އެއީ ފުލުހުންގެ ބެލުމުގެ ދަށުގައި އޮތް ސަރަހައްދެއް ކަމަށް ސީކްރެޓް ސާވިސްއިން ބުނެފައިވާ ކަމަށެވެ.
ނަމަވެސް މުޅި ސަރަހައްދުގެ ސަލާމަތާއި ރައްކާތެރިކަން ސީކްރެޓް ސާވިސްއިން ކަށަވަރު ކުރަން ޖެހޭނެ ކަމަށް ގިނަ ބަޔަކު އަންނަނީ ބުނަމުންނެވެ. އެކަމާ ގުޅޭ ގޮތުން ސޯޝަލް މީޑިއާގައި ސީކްރެޓް ސާވިސްގެ ގާބިލުކަމާމެދު ވެސް އަންނަނީ ގިނަ ބަޔަކު ސުވާލު އުފައްދައި، ފާޑު ކިޔަމުންނެވެ.
މި މައްސަލަ އެފްބީއައިއިން އަންނަނީ ތަހުގީގު ކުރަމުންނެވެ. ހަމަލާއާ ގުޅޭ އެއްވެސް މައުލޫމާތެއް ހުރިނަމަ، ހިއްސާކޮށްދިނުމަށް ވެސް އެފްބީއައި އިން ވަނީ އެދިފަ އެވެ.
