މުމްބާއި، އިންޑިއާ (ޖުލައި 14) - އިންޑިއާގެ އިތުރުން މުޅި ދުނިޔެ އިން ވެސް ފާހަގަކޮށްލެވޭ އެންމެ މުއްސަނދި އެއް މަހުޖަނު، މުކޭޝް އަމްބާނީގެ އެންމެ ހަގު ދަރިފުޅު، އަނަންތު އަމްބާނީގެ ކައިވެނި ހަފުލާގައި ފީފާގެ ރައީސް، ޖިއާނީ އިންފަންޓީނޯ ބައިވެރިވެވަޑައިގެންފި އެވެ.
ޖިއޯ ވޯލްޑް ކޮންވެންޝަން ސެންޓަރުގައި ބޭއްވި އަނަންތު އަމްބާނީ އާއި ރާދިކާ މާޗަންޓްގެ ކައިވެނި ހަފްލާ އަށް ދުނިޔޭގެ މަޝްހޫރު އެކި ފަރާތްތައް މެހެމާނުންގެ ގޮތުގައި ބައިވެރިވެވަޑައިގެންނެވިި އެވެ. އެ މެހެމާނުންގެ ލިސްޓުގައި ފީފާގެ ރައީސް އިންފަންޓީނޯ ހިމެނުމުން، އެ ކަމަށް އިންޑިއާ މީޑިއާގެ ސަމާލުކަން ހުއްޓުނެވެ.
އަދި އެ ހަފްލާގެ ތެރެއިން، ބޮލީވުޑް ތަރި، ރަންވީރު ސިންގް، ފީފާގެ ރައީސް، އިންފަންޓީނޯއާ އެކު ނަށާ ވީޑިއޯ އެއް ސޯޝަލް މީޑިއާގައި ވަނީ ވައިރަލްވެފަ އެވެ.
ސޯޝަލް މީޑިއާގައި އިންފަންޓީނޯ ކުރި ޕޯސްޓެއްގައި ބުނެފައިވަނީ، އަނަންތު އާއި ރާދިކާގެ ކައިވެނި ހަފްލާގައި ބައިވެރިވުމަށް ލިބުނު ދައުވަތާ މެދު ވަރަށް ބޮޑަށް އުފާކުރާ ކަމަށެވެ. އަދި އެކަމަށްޓަކައި، މުކޭޝް އަމްބާނީ އާއި އޭނާގެ އަންހެނުން، ނީތާ އަށް ޝުކުރު އަދާކުރާ ކަމަށެވެ.
މީގެ އިތުރުން، އިންފަންޓީނޯ ވަނީ އެކި ދާއިރާތަކުގެ ލެޖެންޑުންނާ މި ހަފްލާ ތެރެއިން ބައްދަލުކުރުމުގެ ފުރުސަތު ލިބުމުން އެކަމާ ވަރަށް ބޮޑަށް އުފާކުރާކަމަށް ވެސް ވިދާޅުވެފަ އެވެ. އަދި ހާއްސަކޮށް، ދާދި ފަހުން އިންޑިއާގެ ގައުމީ ޓީމުން ރިޓަޔާކުރި ލެެޖެންޑް، ސުނިލް ޗެތުރީއާ ބައްދަލުވުމަކީ ވެސް ވަރަށް ބޮޑު ހިތްހަމަޖެހުމެއް ކަމަށް އިންފަންޓީނޯ ވަނީ ހާމަކުރައްވައިފަ އެވެ.
