ރާއްޖޭގެއި ކަސްރަތާއި ދުވުމުގެ ހަރަކާތްތައް އިންތިޒާމްކުރާ "އައި ރަނާސް" ގެ ފަރާތުން ބާއްވާ "މޯލްޑިވްސް ހާފް މެރަތަން 2024" ގެ މެޑިކަލް ޕާޓްނަރުގެ ގޮތުގައި ޓްރީ ޓޮޕް ހޮސްޕިޓަލާއެކު ސޮއިކޮށްފި އެވެ.
މިއަދު އޮތް މި ދުވުމުގައި ސިއްހީ ހިދުމަތާއި ފަސްޓް އެއިޑް ފޯރުކޮށްދިނުމަށް ޓްރީޓޮޕްގެ އެމްބިއުލާންސް އަދި ޑޮކްޓަރުން ހަރަކާތްތެރިވާނެ އެވެ.
މެޑިކަލް ޕާޓްނާގެ ހައިސިއްޔަތުން، ޓްރީޓޮޕުން އިއްޔެ ބޭއްވި މޯލްޑިވްސް ހާފް މެރަތަން އެކްސްޕޯގައި ވަނީ ދުވުންތެރިންނަށް ހިލޭ ބޭސިކް ހެލްތް ޗެކަޕްގެ ހިދުމަތް ފޯރުކޮށްދީފަ އެވެ.
ޓްރީޓޮޕްގެ ސީއީއޯ ޑރ. ސްރިވަޓްސަން ސްރިދާރް ޖީ ވިދާޅުވީ މުޖުތަމައުގެ ސިއްހީ ދުޅަހެޔޮކަމަށް ހޭލުންތެރިކަން އިތުރުކޮށް "ހެލްތީ ލައިފްސްޓައިލް" ޕްރޮމޯޓް ކުރާ މިފަދަ ހަރަކާތްތަކަށް އެ ހޮސްޕިޓަލުން މަރުހަބާ ކިޔާ ކަމަށާއި ކުރިއަށް އޮތްތަނުގައި ވެސް މިފަދަ ހަރަކާތްތަކަށް އެއްބާރުލުން ދޭނެ ކަމަށެވެ.
ޓްރީ ޓޮޕުން މީގެ ކުރިން ވެސް ރާއްޖޭގެ މަޝްހޫރު ދުވުންތަކާއި، އެހެނިހެން ހަރަކާތްތަކަށް ފަސްޓް އެއިޑް އަދި މެޑިކަލް ސަޕޯޓް ފޯރުކޮށްދީފަ އެވެ.
މޯލްޑިވްސް ހާފް މެރަތަން އަކީ "އައި ރަނާސް" ގެ ފަރާތުން މުޖުތަމައުގައި ސިއްހީ ހޭލުންތެރިކަން އިތުރުކޮށް، ދުޅަހެޔޮ ސިއްހަތެއް ޕްރޮމޯޓު ކުރުމަށް ބާއްވާ ހާއްސަ ދުވުމެކެވެ.
ދުވުމުގައި ހިމެނޭ ކެޓަގަރީތައް؛
- ހާފް މެރަތަން: 21 ކިލޯމީޓަރު
- 15 ކިލޯމީޓަރު
- 10 ކިލޯމީޓަރު
- ފަސް ކިލޯމީޓަރު ފަން ރަން
- އިންލައިން ސްކޭޓިން
- ވީލްޗެއާ ރޭސް، ފަސް ކިލޯމީޓަރު
ޓްރީ ޓޮޕަކީ ރާއްޖޭގެ ގިނަ ބައެއްގެ އިތުބާރު ހޯދާފައިވާ ޒަމާނީ ފެންވަރަށް ސިއްހީ ހިދުމަތް ފޯރުކޮށްދެމުން އަންނަ ހޮސްޕިޓަލެކެވެ. އެގޮތުން މިހާރުވެސް އެ ހޮސްޕިޓަލުން އަންނަނީ އެންމެފަހުގެ ވަސީލަތްތަކާ އެކު ތަފާތު ހިދުމަތްތައް ތައާރަފު ކުރަމުންނެވެ.
