ނިއުޔޯކް ސިޓީ (ޖުލައި 10) - ކޮޕަ އެމެރިކާ ފުޓުބޯޅަ މުބާރާތުގެ ސެމީ ފައިނަލުގައި ކެނަޑާގެ މައްޗަށް 2-0 ގެ ނަތިޖާ އަކުން ކުރިހޯދާ އާޖެންޓީނާ ފައިނަލަށް ދަތުރުކޮށްފި އެވެ.
މިއީ، އާޖެންޓީނާ އިން މިދިޔަ އަށް ކޮޕަ އެމެރިކާގެ ތެރެއިން ފައިނަލަށް ދިޔަ ހަ ވަނަ ފަހަރެވެ. އާޖެންޓީނާ އަކީ މި މުބާރާތް އެންމެ ފަހުން ކާމިޔާބުކުރި ޓީމު ވެސް މެ އެވެ.
މި މެޗުގެ ހަތްވަނަ މިނެޓުގައި ކެނެޑާގެ ޖެކޯބް ޝެޕަލްބާގް އަށް ވަނީ ގޯލު ޖަހަން ރަނގަޅު ފުރުސަތެއް ލިބި ބޭކާރުވެފަ އެވެ. އާޖެންޓީނާގެ އޭރިއާ ތެރެއިން އެ ޓީމުގެ ކުޅުންތެރިއެއް ކައިރިން ނައްޓާލުމަށްފަހު ޝެޕަލްބާގް ފޮނުވާލި ބޯޅަ ދިޔައީ އަރިމަތީ ދަނޑިކައިރިން ބޭރަށެވެ.
އޭގެ ފަހުން މެޗުގެ 12 ވަނަ މިނެޓުގައި އާޖެންޓީނާގެ ތަރި ލިއޮނަލް މެސީ އޭރިއާ ބޭރުން ފޮނުވާލި ބާރު ހަމަލާ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.
މެޗުގައި އާޖެންޓީނާ އިން ލީޑު ނެގީ 23 ވަނަ މިނެޓުގައި އެވެ. ކެނެޑާގެ ޑިފެންޑަރުންނަށް ހެދުނު ބޮޑު ގޯހެއްގެ ފައިދާ ނަގާ މި ގޯލު އާޖެންޓީނާ އަށް ޖަހައިދިނީ ހޫލިއަން އަލްވަރޭޒް އެވެ.
މެޗުގެ 34 ވަނަ މިނެޓުގައި އާޖެންޓީނާ އަށް ލީޑު ފުޅާކޮށް ދޭން އެންހެލް ޑި މާރިއާ އަށް ލިބުނު ފުރުސަތުގައި އޭނާ ކެނެޑާގެ ކީޕަރު މެކްސިމް ކަޕޯ ބޯމަތިން ހިއްލާލި ބޯޅަ ދިޔައީ ގޯލުގެ ހުރަސް ދަނޑިމަތިން ބޭރަށެވެ.
ފުރަތަމަ ހާފު ނިމުމުގެ ކުރިން މެސީ އަށް ވެސް ވަނީ އާޖެންޓީނާގެ ލީޑު ފުޅާ ކުރުމަށް ރަނގަޅު ފުރުސަތެއް ލިބި ބޭކާރުވެފަ އެވެ. ކެނަޑާގެ ދެ ކުޅުންތެރިން ކައިރިން ނައްޓާލުމަށްފަހު މެސީ ކަނާތު ފައިން ފޮނުވާލި ހަމަލާ ދިޔައީ ގޯލުގެ އަރިމަތީ ދަނޑިކައިރިން ބޭރަށެވެ.
ދެ ވަނަ ހާފު ފަށައިގެން ފަސް ވަނަ މިނެޓުގައި އާޖެންޓީނާ އަށް ލީޑު ފުޅާ ކޮށްދިނީ މެސީ ޖަހައިދިން ގޯލުންނެވެ. މިއީ, އެންޒޯ ފެނާންޑޭޒް ފޮނުވާލި ހަމަލާ އަކުން ލިބުނު ފުރުސަތެއްގައި މެސީ ޖެހި ގޯލެކެވެ.
ގިނަ ފައުލުތަކެއް ފެނިގެންދިޔަ މި މެޗުގެ ދެ ވަނަ ހާފު ނިމެން މިނެޓަކަށްވެފައި ހުއްޓަ ކެނަޑާގެ ޓާނީ އޮލޭވްސޭ އަށް ވަނީ ކައިރި ކައިރީގައި ލަނޑު ޖަހަން ރަނގަޅު ދެ ފުރުސަތު ލިބި ބޭކާރުވެފަ އެވެ. އޭނާ ފުރަތަމަ ފޮނުވާލި ހަމަލާ އާޖެންޓީނާގެ ކީޕަރު މާޓިނޭޒް ދިފާއުކުރިއިރު, ދެވަނަ ހަމަލާ ދިޔައީ ގޯލާ އަމާޒުނުވެ ބޭރަށެވެ.
