އިދިކޮޅު އެމްޑީޕީއިން ބުރާސްފަތި ދުވަހުގެ ރޭ ބޭއްވި ޖަގަހަ ޖަލްސާއެއް ފެށުމުގެ ގޮތުން ގުރުއާން ކިޔެވުމުން، ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) ގެ މުވައްޒަފަކު ވަޒީފާއިން ވަކިކޮށްފައި ވާތީ އެމްޑީޕީން އެކަން ކުށްވެރިކޮށްފި އެވެ.
އެޗްޑީސީގެ ނިންމުން، "ހަރުއަޑުން ކުށްވެރިކޮށް" އެމްޑީޕީން މިއަދު ނެރުނު ބަޔާނެއްގައި ބުނީ ސިޔާސީ ޕާޓީއެއްގައި ހަރަކާތްތެރިވުމާއި ސިޔާސީ ހަރަކާތްތަކުގައި ބައިވެރިވެ އުޅުމަކީ ގާނޫނުއަސާސީން ކަށަވަރުކޮށްދީފައިވާ އަސާސީ ހައްގެއް ކަމަށެވެ.
އަދި، ދި އެ އަސާސީ ހައްގުގެ ބޭނުން ހިފުމަށް އެއްވެސް ޒާތެއްގެ ބިރުވެރިކަމެއް، ބިރުދެއްކުމެއް އަދި އެއްވެސް ފިޔަވަޅެއްވެސް އެޅުމަކީ ގާނޫނުއަސާސީއާ ކަނޑައެޅިގެން ހިލާފު ކަމެއް ކަމަށްވެސް މިދިޔަ ދައުރުގައި ވެރިކަންކުރި އެމްޑީޕީގެ ބަޔާނުގައި ބުންޏެވެ.
"ސަރުކާރުގެ އެއްވެސް ވަޒީފާއެއް އަދާކުރާ އެއްވެސް މުވައްޒަފަކު ވަކި ސިޔާސީ ޕާޓީއަކަށް ނިސްބަތްވާތީ ނުވަތަ ތާއީދުކުރާތީ ނުވަތަ ހަރަކާތެއްގައި ބައިވެރިވާތީ ވަޒީފާގެ ބިރުވެރިކަން ނޯންނާނެކަމަށް ރައީސް ޑރ. މުއިއްޒު ރިޔާސީ ކެމްޕެއިންގައި ވަނީ ވައުދެވެވަޑައިގެންފަ،" އެމްޑީޕީގެ ބަޔާނުގައިވެ އެވެ.
ނަމަވެސް، ރައީސްގެ އެ ވައުދާ ހިލާފުވެ ސަރުކާރުގެ މުވައްޒަފުންނަށް ވަޒީފާގެ ބިރުދައްކަމުން އަންނަކަމަށާއި އެކަން އެ ޕާޓީން ހަރުކަށި އިބާރާތުން ކުށްވެރިކުރާ ކަމަށްވެސް އިދިކޮޅުން ބުނެފައިވެ އެވެ.
ވަޒީފާއިން ވަކިކުރީ އެޗްޑީސީގެ އޮޕަރޭޝަންސް އޮފިސަރު އަހުމަދު ޝާއިން އެވެ. އެ ކުންފުނިން އޭނާއަށް ފޮނުވި ޗިޓުގައި ބުނެފައިވަނީ ވަޒީފާއިން ވަކިކުރީ ތިން ދުވަހަކު ވަޒީފާއަށް ނުނިކުތުމާ ގުޅިގެން ކަމަށެވެ. ޗިޓު ފޮނުވާފައިވަނީ މިއަދު އެވެ.
އެކަމާ ގުޅިގެން އެޗްޑީސީގެ މީޑިއާގެ ބަހެއް ހޯދުމަށް ކުރި މަސައްކަތް ކާމިޔާބު ނުވި ނަމަވެސް އެ ކުންފުނީގެ އޮފިޝަލަކު ވިދާޅުވި ގޮތުގައި އޭނާ ވަކިކުރީ ގުރުއާން ކިޔަވައިގެން ނޫން ކަމަށާއި އޭނާ ވަކިކުރީ ހާޒިރީ މައްސަލަތަކުގެ ސަބަބުން ކަމަށެވެ. އަދި, އޭނާއަކީ އެ ކުންފުނީގެެ ދާއިމީ މުވައްޒަފެއް ނޫން ކަމަށް ވެސް އޮފިޝަލު ވިދާޅުވި އެވެ.
