މިއުނިކް (ޖުލައި 9) - ޔޫރޯ ފުޓްބޯޅަ މުބާރާތުގެ ސެމީ ފައިނަލުގައި މިރޭގެ މެޗަށް ނުކުންނަޓީއިރު، ސްޕެއިން ދެކެ ފްރާންސް އިން ޖެހިލުމެއްނުވާ ކަމަށް އެ ޓީމުގެ ވައިސް ކެޕްޓަން، އެންޓޮއިން ގްރީޒްމަން ބުނެފި އެވެ.
ފްރާންސް އިން މި ފަހަރުގެ ޔޫރޯ ފުޓްބޯޅަ މުބާރާތުގެ ސެމީ ފައިނަަލަށް ދަތުރުކުރިއިރު، އެ ޓީމަކީ މުބާރާތުގެ ތާރީހުގައި ވެސް އޯޕަން ޕްލޭއިން އަމިއްލަ ޓީމުގެ ކުޅުންތެރިއަކު ލަނޑެއް ނުޖެހި ސެމީ އަށް ދަތުރުކުރި ފުރަތަމަ ޓީމެވެ. އަނެއްކޮޅުން، ސްޕެއިނަކީ ސެމީ ފައިނަލުގައި ކުޅޭ ހަަތަރު ޓީމުގެ ތެރެއިން ސައްތަ އިން ސައްތަ ރެކޯޑަކާ އެކު އެ ހިސާބަށް ދިޔަ ފުރަތަމަ ޓީމެވެ.
ސްޕެއިނަކީ މިރޭގެ މެޗުގެ ފޭވަރިޓުންގެ ގޮތުގައި ވާހަކަ ދައްކަމުން އަންނައިރު، ފްރާންސްގެ ތަރި ގްރީޒްމަން ބުނީ އެ ކަމަށް ނުވިސްނާ ކަމަށެވެ.
"ސްޕެއިނުގައި އެ އޮތީ ވަރުގަދަ ޓީމެއް. އެކަމަކު އަހަރެމެން ޖެހިލުންވާންޖެހޭ ސަބަބެއް ނެތް. އަމިއްލަ ނަފްސާ މެދު އިތުބާރު އެބައޮތް، ފައިނަލަށްދާން ކުރެވޭނެ ހުރިހާ މަސައްކަތެއް އަހަރެެމެން ކުރާނަން،" ގްރީޒްމަން ބުންޏެވެ.
"އެންމެ މެޗެއް މި އޮތީ ފައިނަލާ ދެމެދު. ވަރަށް ހާއްސަ ކަމެއް ހަގީގަތުގައި ސެމީ ފައިނަލަށް ދެވުމަކީ ވެސް. މިހާރު އޮތް ފްރާންސް ޓީމު ވަރަށް ޝައުގުވެރި، އެއީ މި ޓީމަށް މޮޅުވެވޭނެ ކަމަށް އެންމެން ވެސް ގަބޫލުކުރެވޭ،"
ފްރާންސުން ސްޕެއިނާ ދެކޮޅަށް ކުޅުނު 13 މެޗުން މޮޅުވެފައިވާއިރު، ހަތް މެޗުން އެއްވަރުވި އެވެ. އަދި 16 މެޗުން ވަނީ ބަލިވެފަ އެވެ. އެންމެ ފަހުން މި ދެ ޓީމު ކުޅުނީ 2021 ވަނަ އަހަރުގެ ނޭޝަންސް ލީގުގެ ފައިނަލުގަ އެވެ. އެ މެޗުން، ފްރާންސް ވަނީ 2-1 އިން މޮޅުވެފަ އެވެ.
ސްޕެއިނާއި ފްރާންސް ކުޅޭ ސެމީ ފައިނަލް އޮތީ މިރޭ 12 ޖަހާއިރު އެވެ.
