ވ. ބޮޑުފިނޮޅު ވިއްކާލުމުން ވ. އަތޮޅު ކައުންސިލުން މިއަދު ކަންބޮޑުވުން ފާޅުކޮށްފި އެވެ.
ވ. އަތޮޅު ތިނަދޫއާ އެއް ބިތެއްގައި، އެ ރަށާ 7.7 ކިލޯމީޓަރު ދުރުގައި އޮތް އެ ފިނޮޅު ވިއްކާލީ 729،000 ޑޮލަރަށް (11.2 މިލިއަން ރުފިޔާ) އަށް ރާއްޖޭގައި އެންމެ ފުޅާ ދާއިރާގެ ލޯކަލް ޓޫރިޒަމް ހިންގާ ކާނި ހޮޓެލްސްއަށެވެ.
ޓޫރިޒަމް މިނިސްޓަރު ފައިސަލް ނަސީމްއަށް ފޮނުއްވި ސިޓީއެއްގައި ވ. އަތޮޅު ކައުންސިލުން ބުނީ އެތަން ވިއްކާލީ ކައުންސިލާ މަޝްވަރާ ކުރުމެއްނެތި ގާނޫނާ ހިލާފަށް ކަމަށެވެ.
ވ. އަތޮޅަކީ ލޯކަލް ޓޫރިޒަމް ހަލުވި ކަމާއެކު ކުރިއަރަމުންދާ އަތޮޅެއްކަން ފާހަގަކޮށް އަތޮޅު ކައުންސިލުން ބުނީ އެ އަތޮޅުގެ ގުދުރަތީ ވަސީލަތްތަކަކީ އަތޮޅުގެ ގެސްޓްހައުސްތަކާއި، ބައެއް ރިސޯޓުތަކާއި އަދި ސަފާރީތަކުން ފުޅާ ދާއިރާއެއްގައި ފަތުރުވެރިކަމުގެ އެކި ބޭނުންތަކަށް ބޭނުންކުރާ ވަސީލަތްތަކެއް ކަމަށެވެ.
"އަތޮޅުގެ ފަޅު ރަށްތައް ރިސޯޓް ވިޔަފާރިއަށް ދޫކޮށްފައިވުމުން އެކްސްކާޝަން އަދި ޕިކްނިކް ދިޔުމަށް އެކަށޭނެ ތަނެއް އަތޮޅުގައި ނެތްހިނދު އަދި ތިޔަ މިނިސްޓްރީން ވިއްކާލި ކަމަށް މި ކައުންސިލަށް ނުރަސްމީކޮށް މައުލޫމާތު ލިބިފައިވާ ފިނޮޅަކީ މި ދެންނެވި ވިޔަފާރިތަކުން ކޮންމެ ދުވަހަކު އެކްސްކާޝަން ދިޔުމަށް ބޭނުންކުރަމުންދާ މަދު ތަންތަނުގެ ތެރެއިން އެންމެ ގިނައިން ބޭނުންކުރަމުންދާ ފިނޮޅު،" އެ ކައުންސިލުން ބުންޏެވެ.
އެކަމަކީ އަތޮޅުގެ ފަތުރުވެރިކަމުގެ ވިޔަފާރިތަކާއި އަދި ޖުމްލަކޮށް އަތޮޅުގެ ހުރިހާ ރައްޔިތުންގެ ހުރިހާ ރައްޔިތުންގެ މަސްލަހަތު ހިމެނޭ ކަމަކަށް އެކަންވީ ހިނދު އެ ފިނޮޅު ކުއްޔަށް ދިނުމަކީ ހަމަނުޖެހުމާއި ފަސާދައަށް ހުޅުވިގެންދާ ދޮރަކަށް ވުމުގެ ފުރުސަތު ބޮޑުވުމުން، އެކަން އެގޮތަށް ނުކުރުމަށް ވަނީ ސިޓީގައި އެދިފަ އެވެ.
އެ ކައުންސިލުން ވަނީ އަތޮޅުން ފަޅުތައް ދޫކުރުމާއި އެކަމުގެ އެއްވެސް މައުލޫމާތެއް އަތޮޅު ކައުންސިލާއި، މިނިސްޓްރީން ހިއްސާކޮށްފައި ނުވާތީ ވެސް ކަންބޮޑުވުން ފާޅުކޮށްފަ އެވެ.
