އުރީދޫ މޯލްޑިވްސްގެ ދައުވަތަކަށް މަޝްހޫރު ގިނަ ކްލަބްތަކަށް ކުޅެފައިވާ އޮގަސްޓީން އަޒުކާ "ޖޭ ޖޭ" އޮކޯޗާ، 50އ, ރާއްޖެ މިއަދު އައިސްފި އެވެ.
އޮކޯޗާއަށް ވެލާނާ އިންޓަނޭޝަނަލް އެއާޕޯޓުން މަރުހަބާ ކިޔާފައި ވަނީ އުރީދޫގެ އެމްޑީ އަދި ސީއީއޯ ހާލިދު އަލް ހަމާދީގެ އިތުރުން އުރީދޫގެ އިސްވެރިންނާއި ބައެއް ސްޓާފުންނެވެ.
ޖުލައި 1، އިން ޖުލައި 6، ގެ ނިޔަލަށް ރާއްޖެ އަންނަ އޮކޯޗާ ރާއްޖެ އައިސްފައި ވަނީ އުރީދޫގެ ޕްރީމިއަމް ޕާޓްނަރު ޕީއެސްޖީއާ އޮތް ޕާޓްނާޝިޕްގެ ދަށުންނެވެ.
އޮކޯޗާ ޕީއެސްޖީ އެކަޑަމީ ކޯޗިން ކްލިނިކާއެކު މިއަދު ހަވީރު މާލެ ސިންތެޓިކް ޓްރެކުގައި ހަރަކާތެއް ބޭއްވުމަށް ވަނީ ހަމަޖެހިފަ އެވެ.
ޖޭޖޭ އޮކޯޗާ ރާއްޖެ އައުން: އޭނާއަށް އުރީދޫގެ ޓީމުން ވަނީ ހޫނު މަރުހަބާއެއް ކިޔާފައި -- ފޮޓޯ: މިރާން ނާޝިމް
އޭގެއިތުރުން, އަންނަ ހޯމަ ދުވަހު ގަލޮޅު ދަނޑުގައި ފުޓްސަލް މެޗެއް ކުޅުމުގެ އިތުރުން އޮޓޯގްރާފް ސެޝަންއެއް ވެސް ކުރިއަށް ގެންދިޔުމަށް ވަނީ ރާވާފަ އެވެ.
އެފްރިކާގެ އިތުރުން ނައިޖީރިއާގައި ވެސް އުފެދުނު އެންމެ މޮޅު އެއް ކުޅުންތެރިޔާގެ ލަގަބު ހޯދާފައިވާ އޮކޯޗާ ވަނީ 2003 އަދި 2004 ގައި ބީބީސީގެ އެފްރިކާގެ އެންމެ މޮޅު ކުޅުންތެރިޔާގެ މަގާމު ހޯދާފަ އެވެ.
ނައިޖީރިއާގެ އެންމެ މޮޅު ފުޓުބޯޅަ ކުޅުންތެރިޔާގެ މަގާމު ހަތް ފަހަރު ހޯދާފައިވާ އޮކޯޗާ ވަނީ ގައުމީ ޓީމަށް 73 މެޗު ކުޅެ 14 ލަނޑު ކާމިޔާބުކޮށް، 1994 ގެ އެފްރިކަން ކަޕް އޮފް ނޭޝަންސް އަދި 1996 ގެ ސަމާ އޮލިމްޕިކްސް ނައިޖީރީއާ ކާމިޔާބުކުރި ނައިޖީރިއާ ޓީމުގައި ހިމެނިފަ އެވެ.
