މިލާން (ޖޫން 30) - މި ފަހަރުގެ ޔޫރޯ ފުޓްބޯޅަ މުބާރާތާ އެންމެ ފަހުގެ ޗެމްޕިއަނުންގެ ގޮތުގައި ކުރިމަތިލައި، ގަދަ 16 ޓީމުގެ ބުރުން އިޓަލީ ކެޓި ނަމަވެސް އެ ޓީމުގެ ކޯޗުގެ މަގާމުން ލޫސިއާނޯ ސްޕަލެއްޓީ ވަކިނުކުރަން އިޓަލީގެ ފުޓްބޯޅަ ފެޑެރޭޝަނުން ނިންމައިފި އެވެ.
އިޓަލީ މި ފަހަރުގެ ޔޫރޯގައި ކުޅުނު ހަތަރު މެޗުގެ ތެރެއިން މޮޅުވީ ފުރަތަމަ މެޗުގައި އަލްބޭނިއާ އަތުންނެވެ. ދެ ވަނަ މެޗުގައި ސްޕެއިން އަތުން ބަލިވިއިރު، ތިން ވަނަ މެޗުގައި ފަހު ވަގުތު ވަނީ ކްރޮއޭޝިއާއާ އެއްވަރުވެފަ އެވެ.
ގަދަ 16 ޓީމުގެ ބުރުގައި އިޓަލީގެ ފަރާތުން އާދައިގެ ކުޅުމެއް ފެނުނުއިރު، ސްވިޒަލެންޑް އަތުން ވަނީ 2-0 އިން ބަލިވެފަ އެވެ. ޔޫރޯގައި އެންމެ ފަހުން ދެ ފަހަރު ވެސް އެންމެ ފަހުގެ ޗެމްޕިއަން ކެޓީ ގަދަ 16 ޓީމުގެ ބުރުންނެވެ. އެކަމަކު، އިޓަލީގެ ފަރާތުން ފެނުނު ދަށް ކުޅުމާ ހެދި ސްޕަލެއްޓީ އަށް މަގާމުގައި ދެމިހުރެވިދާނެތޯ ވަނީ ސުވާލު އުފެދިފަ އެވެ.
މިދިޔަ އަހަރުގެ އޮގަސްޓް މަހު، ތިން އަހަރުގެ ކޮންޓްރެކްޓެއްގައި ސޮއިކުރި ސްޕަލެއްޓީ އަށް މަގާމުގައި ދެމިހުންނަށް ޕްރެޝަރެއް ނެތް ކަމަށް ހާމަކުރެއްވީ އިޓަލީގެ ފުޓްބޯޅަ ފެޑެރޭޝަނުގެ ރައީސް، ގަބްރިއެލް ގްރަވީނިއާ އެވެ. އޭނާ ވިދާޅުވީ، ސްޕަލެއްޓީއާ އެކު، 2026 ވަނަ އަހަރުގެ ވޯލްޑް ކަޕްގެ ނިޔަލަށް ހަދާފައި އޮތް ކޮންޓްރެކްޓާ އެއްގޮތަށް އަދިވެސް ކުރިއަށްދާން ނިންމާފައިވާ ކަމަށެވެ.
ނަޕޯލީ އާއި ރޯމާގެ ކުރީގެ ކޯޗު، ސްޕަލެއްޓީ، އިޓަލީއާ ހަވާލުވި ފަހުން، އެ ޓީމުން ކުޅުނު 14 މެޗުގެ ތެރެއިން ހަތް މެޗުން ވަނީ މޮޅުވެފަ އެވެ. ހަތަރު މެޗުން އެއްވަރުވިއިރު، ތިން މެޗުން ވަނީ ބަލިވެފަ އެވެ.
ސްވިޒަލެންޑް އަތުން ބަލިވި މެޗަށް ފަހު ސްޕަލެއްޓީ ބުނީ، އިޓަލީގައި އަދި މަސައްކަތްކުރަނީ އެންމެ މޮޅު "ސްޕަލެއްޓީ" އެއް ނޫން ކަމަށެވެ. އަދި އޭނާގެ އެންމެ ރަނގަޅު މަސައްކަތް އިޓަލީގައި ފެންނާނެ ކަމަށް ސްޕަލެއްޓީ ވަނީ ބުނެފަ އެވެ.
އިޓަލީގެ ކެޕްޓަން، ގޯލްކީޕަރު، ޖިއަންލުއީޖީ ޑޮނަރުންމާ ވަނީ އެ ޓީމުގެ ފަރާތުން ފެނުނު ދަށް ކުޅުމަށް ސަޕޯޓަރުންގެ ކިބައިން މައާފަށް އެދިފަ އެވެ. އެކަމަކު، ޑޮނަރުންމާގެ އެ މައާފަށް އިޓަލީ ސަޕޯޓަރުންގެ ފަރާތުން މާބޮޑު އެއްބާރުލުމެއް ނުލިބުނެވެ.
