މި ފަހަރުގެ ޔޫރޯ ފުޓްބޯޅަ މުބާރާތުގައި އިޓަލީން އެންމެ ގިނަ ބަޔެއްގެ ލޮލުގައި އަޅައިގަތް ކުޅުންތެރިއަކީ، 22 އަހަރުގެ ޑިފެންޑަރު، ރިކާޑޯ ކަލަފިއޯރީ އެވެ. އިޓަލީގެ އެޓޭކާއި ޑިފެންސްގައި ވެސް މުހިންމު ރޯލެއް އަދާކުރި ކަލަފިއޯރީ ވަނީ މިރޭ ގަދަ 16 ބުރުގައި ސްވިޒަލެންޑް މެޗަށް ސަސްޕެންޑްވެފަ އެވެ. އެއީ ގްރޫޕް ސްޓޭޖުގައި ރީނދޫ ކާޑު ހަމަވުމުންނެވެ.
ގްރޫޕް ސްޓޭޖުގައި އިޓަލީން ދެ ވަނަ މެޗުގައި ސްޕެއިން އަތުން ބަލިވީ، ކަލަފިއޯރީ އަތުން ބައިކޮޅަށް ވަން ގޯލަކުންނެވެ. އެކަމަކު، ގްރޫޕް ސްޓޭޖުގެ ފަހު މެޗުގައި، ކްރޮއޭޝިއާ 1-0 އިން ކުރީގައި އޮއްވައި، އިޓަލީން ފަހު ސިކުންތުގައި އެއްވަރުކުރި ގޯލު، މަޓެއާ ޒަކާނިއޭ ޖެހީ ކަލަފިއޯރީ ތަނަވަސްކޮށްދިން ފުރުސަތެއްގަ އެވެ. ފަހަތުގައި ހުރެފައި ބޯޅަ ހިފަައިގެން، ކްރޮއޭޝިއާ މެދުތެރެއިން ދިއުމަށް ފަހު، ކަލަފިއޯރީ ޖައްސާލި ބޯޅަ ޒަކާނިއޭ ވަނީ މަތީ ކަނަށް ފޮނުވާލައިފަ އެވެ.
މި ފަހަރުގެ ޔޫރޯގައި މިހާތަނަށް ބަލިނުވެ އޮތް ސްވިޒަލެންޑް ފަދަ ޓީމަކާ ދެކޮޅަށް އިޓަލީން ނޮކައުޓް މެޗަކަށް ނުކުންނައިރު، ކަލަފިއޯރީ ނެތުމަކީ އިޓަލީ ޓީމަށް މައްސަލައެއް ކަމަށް ބުނެ، މެޗުގެ ކުރިން މީޑިއާ އިން ވަނީ އިޓަލީގެ ކޯޗު ލޫޝިއާނޯ ސްޕަލެއްޓީއާ ސުވާލުކޮށްފަ އެވެ.
މި ފަހަރުގެ ޔޫރޯގެ މެޗެއްގެ ތެރެއިން ކަލަފިއޯރީ ބޯޅަ ހިފައިގެންދަނީ.
"އަނެއްހެން ސީދާ އެއްޗެއް ނުބުނާނަން. އަހަރެން ދެކޭގޮތުގައި އިޓަލީ ޓީމުގެ ހުރިހާ ކުޅުންތެރިން ވެސް މުހިންމު. ކަލަފިއޯރީ އަންނަނީ މޮޅު ކުޅުމެއް ދައްކަމުން، ދެން އޭނާ ނުލައި ކުޅެން ބަލާއިރު ދެން ހުރި ޖިއަންލޫކާ (މަންޗިނީ) އަކީ ވެސް ތަޖުރިބާހުރި މޮޅު ކުޅުންތެރިއެއް، ރަނގަޅުވާނެ،" ސްޕަލެއްޓީ ބުންޏެވެ.
ރޯގާޖެހިފައިވާތީ، އިޓަލީގެ އަނެއް ޑިފެންޑަރު، އަލެސަންދްރޯ ބަސްޓޯނީ ވެސް ޕްރެކްޓިސްތަކުގައި ރަނގަޅަށް ބައިވެރިނުވެ އެވެ. ސްޕަލެއްޓީ ބުނީ، ބަސްޓޯނީ މެޗުގައި ކުޅޭނެ ކަމަށެވެ.
އިޓަލީގެ ބޮލޯނިއާ އަށް ކުޅެމުން އަންނަ ކަލަފިއޯރީ ގައުމީ ޓީމަށް ކުޅެން ފެށީ މި ދިޔަ މަަހުގަ އެވެ. ސްޕަލެއްޓީގެ ހާއްސަ އެދުމަކަށް އިޓަލީގެ ޕްރިލިމިނަރީ ޔޫރޯ ސްކޮޑުގެ ޕްރެކްޓިހަށް އައި ކަލަފިއޯރީ ވަނީ ފުރަތަމަ އެގާރައިން ޖާގަ ޔަގީންކޮށްފަ އެވެ. އުމުރުން 22 އަހަރުގައި ޔޫރޯގެ މެޗެއް ފަށައި، ކަލަފިއޯރީ ވެފައި ވަނީ ޕައޮލޯ މަލްޑިނީ އަށް ފަހު، ޔޫރޯގައި އިޓަލީ އަށް ކުޅެދިން އެންމެ ޒުވާން ކުޅުންތެރިޔާ އަށެވެ.
ޔޫރޯގައި ދައްކާ ކުޅުމަށް ބަލާއިރު، މި ވަގުތު އެންމެ ޑިމާންޑް ބޮޑު ކުޅުންތެރިންގެ ތެރޭގައި ކަލަފިއޯރީ ހިމެނެ އެވެ. ކަލަފިއޯރީ އަކީ ވިއްކާ ކުޅުންތެރިއެއް ނޫން ކަަމަށް ބޮލޯނިއާ އިން ފުރަތަމަ ބުނި ނަމަވެސް މިހާރު އެކަން ބަދަލުވެއްޖެ އެވެ. ރަނގަޅު އަގެއްގައި ކަލަފިއޯރީ ވިއްކާލަން ބޮލޯނިއާ އިން އޮތީ ތައްޔާރަށެވެ. އޭނާ ހޯދުމުގެ ރޭހުގައި އިޓަލީގެ ޔުވެންޓަސް، ޖަރުމަނުގެ ބަޔާން މިއުނިކް، އިންގްލެންޑްގެ ލިވަޕޫލް އަދި ސްޕެއިންގެ ރެއާލް މެޑްރިޑުން އަންނަނީ ވާދަކުރަމުންނެވެ.
ކަލަފިއޯރީ ނެތި، އިޓަލީން ގަދަ 16 ބުރުގައި މިރޭ ސްވިޒަލެންޑާ ބައްދަލުކުރާނީ މިރޭ 9 ޖަހާއިރު އެވެ.
