ޝަރީއަތް ނިމެންދެން މާފުށީ ޖަލުގައި ބަންދުކޮށްފައި ހުރި ގައިދީއަކު އިއްޔެ މަރުވި ކަމަށް ރިޕޯޓުކުރި އެވެ.
ޖަލުގައި ބަންދުކޮށްފައި ހުއްޓާ މަރުވީ ށ. ފުނަދޫ ޒަމާނީ ވިލާ މުހައްމަދު ޖަމީލް 45, ކަމަށް ކަރެކްޝަންސް އިން ވަނީ ބުނެފަ އެވެ.
ކަރެކްޝަނުން ބުނީ ޖަމީލް ގޮޅިން ބޭރަށް ނުނިކުމެ، ހަރަކާތް ނުކޮތް ގިނައިރު އޮތްކަން ފާހަގަ ކުރެވިގެން މާފުށީ ޖަލުގެ މެޑިކަލް ސެންޓަރަށް ގެންގޮސް ސީޕީއާރް ދީ، އެއްވެސް ބަދަލެއް ނައުމާ ގުޅިގެން، 12:13 ހާއިރު މާފުށީ ސިއްހީ މަރުކަޒަށް ގެންގޮސް އޭނާއަށް ފަރުވާ ދޭން ފެށި ކަމަށާއި, ޖަމީލްގެ ހިތް ހުއްޓިގެން މަރުވިކަމަށް ޑޮކްޓަރު ކަނޑައެޅީ 12:45 ގައި ކަމަށެވެ.
އޭނާ ބަންދުކޮށްފައި ހުރީ ނުރައްކާތެރި އަދި ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ މައްސަލައެއްގައި ޝަރީއަތް ނިމެންދެނެވެ. އޭނާއަކީ ނަފްސާނީ ބައްޔަކަށް ފަރުވާކުރަމުން އައި މީހެއް ވެސްމެ އެވެ.
ޖަމީލުގެ ހަށިގަނޑު އާއިލާއާ ހަވާލުކުރިއިރު، އޭނާގެ މޫނުމަތީގައި ނޫފައިގެންފައިވާ ދެ ނަތަކާއި ކޮންމެވެސް ވަރަކަށް މަށައިގެން ގޮސްފައިވާ ތަނެއް ހުރުމުން، އޭނާ މަރުވީ އަނިޔާގެ ސަބަބުން ކަމަށް ބައެއް މީހުން ތުހުމަތުކުރި އެވެ.
ސޯޝަލް މީޑިއާގައި އެތައް ބަޔަކު އެ ތުހުމަތުތައް ކުރަމުން ދަނިކޮށް އެކްސްގައި ކުރެއްވި ޕޯސްޓެއްގައި އިހުސާން ވިދާޅުވީ އެ މައްސަލައިގެ ފުރިހަމަ ތަހުގީގެއް ކުރަން ފުލުހުންނަށް އަންގަވާފައިވާނެ ކަަމަށެވެ.
ޖަމީލްގެ އާއިލާއިން މަސައްކަތް ކުރަމުން ދިޔައީ އޭނާގެ ހަށިގަނޑު ވީހާވެސް އަވަހަށް ވަޅުލުމަށެވެ. އެގޮތުން ރޭ 12:00 ޖެހިއިރު ވަޅުލާން ފުރަތަމަ ނިންމުމަށްފަހު، ފަހުން ފަތިސް ނަމާދަށްފަހު ވަޅުލާން ނިންމި އެވެ.
ނަމަވެސް ރޭ މެންދަމު ފުލުހުން އަލުން ހަށިގަނޑު ގެންދަން މަސައްކަތް ކުރި އެވެ. އޭރު އޮތީ ހިނަވައި ކަފުންކޮށްފަ އެވެ.
އާއިލާއާ ދެކޮޅަށް ގަބުރު ގެންދަން ފުލުހުން މަސައްކަތްކުރުމަށްޓަކައި ހުޅުމާލޭ ސަހަރާ ސަރަހައްދަށް ގިނަ އަދަދެއްގެ އެސްއޯ ފުލުހުން ދިޔަ އެވެ. ނަމަވެސް ހަށިގަނޑު ފުލުހުންނާ ހަވާލުކުރަން އާއިލާއިން ދެކޮޅު ހަދައި ހިނަވާގެ ތަޅުލި އެވެ.
ފަތިސް ނަމާދަށް ފަހު، ހޯމް މިނިސްޓަރު އަލީ އިހުސާން އާއި ޕޮލިސް ކޮމިޝަނަރު އަލީ ޝުޖާއު ސަހަރާއަށް ވަޑައިގެން އާއިލާއާ ވާހަކަ ދެއްކެވި އެވެ. ހޯމް މިނިސްޓަރު ވެސް ފުރަތަމަ ވިދާޅުވީ ތަހުގީގަށް ހަށިގަނޑު ގެންދަން ފުލުހުން ބޭނުންވާ ކަމަށެވެ. ނަމަވެސް، އާއިލާއިން އެކަމަށް ދެކޮޅު ހެދުމުން، ކުރެއްވި ފޯނުކޯލަކަށް ފަހު، އެ ނިންމުން ބަދަލުކޮށް ވަޅުލުމުގެ ހުއްދަ ދެއްވި އެވެ.
ޖަމީލް ވަޅުލީ އިރުއެރި ފަހުންނެވެ.
ޖަމީލުގެ މަރާ ގުޅިގެން ކަރެކްޝަނަލް ސާވިސް އިން މީޑިއާއަށް ކުރިން ބުނީ ޖަމީލް ގޮޅިން ބޭރަށް ނުނިކުމެ، ހަރަކާތް ނުކޮތް ގިނައިރު އޮތްކަން ފާހަގަ ކުރެވިގެން މާފުށީ ޖަލުގެ މެޑިކަލް ސެންޓަރަށް ގެންގޮސް ސީޕީއާރް ދީފައިވާ ކަމަށެވެ.
އޭނާ ބަންދުކޮށްފައި ހުރީ ނުރައްކާތެރި އަދި ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ މައްސަލައެއްގައި ޝަރީއަތް ނިމެންދެނެވެ. އޭނާއަކީ ނަފްސާނީ ބައްޔަކަށް ފަރުވާކުރަމުން އައި މީހެއް ވެސްމެ އެވެ.
