ގެލްސެންކާޗެން (ޖޫން 26) - ޕޯޗުގަލް އިން، މި ފަހަރުގެ ޔޫރޯ ފޫޓްބޯޅަ މުބާރާތުގެ ގްރޫޕް ސްޓޭޖުގެ ފަހު މެޗުގައި ޖޯޖިއާ އާއި ދެކޮޅަށް ނުކުންނައިރު، ކްރިސްޓިއާނޯ ރޮނާލްޑޯގެ ސަޕޯޓަރުން، އޭނާއާ އެކު، ފޮޓޯ ނެގުމަށް ދަނޑުމައްޗަށް ނޭރުމަށް އެ ޓީމުގެ ކޯޗު ރޮބާޓޯ މާޓިނޭޒް އިލްތިމާސްކޮށްފި އެވެ.
ޕޯޗުގަލް އިން ގްރޫޕް ސްޓޭޖުގައި ކުޅުނު ދެ މެޗުގައި ވެސް ރޮނާލްޑޯގެ ބައެއް ސަޕޯޓަރުން ވަނީ އޭނާއާ އެކު, ފޮޓޯ ނެގުމަށް ދަނޑަށް އަރައިފަ އެވެ. އޭގެ ތެރޭގައި ކުޑަ ކުއްޖަކު ވެސް ހިމެނެ އެވެ.
މީގެ ކުރިން ޔުއެފާ އިން ވަނީ ސަޕޯޓަރުންނާ އެކު, ކުޅުންތެރިން ފޮޓޯ ނަގަން ދަނޑައް އަރާނަމަ, އެކަން ބަލާ ފިޔަވަޅު އަޅާނެ ކަމަށް ބުނެފަ އެވެ. އަދި ޔުއެފާ އިން ވަނީ ދަނޑަށް އެރި ބައެއް ފަރާތްތަކަށް ފިޔަވަޅު އާޅާވެސްފަ އެވެ. އޭގެ ތެރޭގައި ރޮނާލްޑޯ އާއެކު ފޮޓޯ ނަގަން ދަނޑައް އެރި ކުޑަ ކުއްޖާ އަށް ޔުއެފާގެ އެއްވެސް މެޗެއް ބަލަން ނުވަދެވޭނެ ހެން ވަނީ ސަސްޕެންޑް ކޮށްފަ އެވެ.
މާޓިނޭޒް ވަނީ ރޮނާލްޑޯ ޖޯޖިއާ މެޗުންވެސް ފެންނާނެ ކަމަށް ބުނެފަ އެވެ. މާޓިނޭޒް ބުނީ މިދިޔަ ސީޒަނުގެ ސްޓެޓްސް އަށް ބަލާނަމަ އެއް ފެންވަރެއްގައި ކައިރިކައިރީގައި މެޗު ކުޅުމުގެ ފެންވަރު ރޮނާލްޑޯ, 39, ގައި އެބަހުރި ކަމަށް ބުނެފަ އެވެ.
ނޫސްވެރިންގެ ބައްދަލުވުމުގައި މާޓިނޭޒްގެ އެންމެ ބޮޑު ކަންބޮޑުވުމަކީ ރޮނާލްޑޯ އާއެކު, ފޮޓޯ ނަގަން ސަޕޯޓަރުން ދަނޑަށް އަރާ މައްސަލަ އެވެ.
މާޓިނޭޒް ބުނީ ރޮނާލްޑޯ އަށް ސަޕޯޓަރުން ދަނޑަށް އަރާފާނެކަން އެނގޭ ކަމަށާއި, އަދި އެކަމުގައި އަމަލުކުރާނެ ގޮތްވެސް އެނގޭނެ ކަމަށެވެ. އެކަމަކު ސަޕޯޓަރުން ދަނޑަށް އެހާ ފަސޭހައިން އަރާނަމަ އެއީ ކުޅުންތެރިންގެ ރައްކާތެރިކަމަށް އޮތް ހުރަހެއް ކަމަށް މާޓިނޭޒް ސިފަކުރި އެވެ.
ޖޯޖިއާ މެޗަށް ޕޯޗުގަލުން ނުކުންނައިރު، އެ ޓީމަށް މިހާރު ވެސް ގްރޫޕްގެ އެއް ވަނަ ވަނީ ކަށަވަރުވެފަ އެވެ.
