ނިއު ޖާޒީ (ޖޫން 26) - ކޮޕަ އެމެރިކާ ފުޓްބޯޅަ މުބާރާތުގައި ރޭ ބަދަލު ކުޅުންތެރިއެއްގެ ގޮތުގައި ކުޅެން އެރި ލައުޓާރޯ މާޓިނޭޒް ފަހު ވަގުތު ޖެހި ގޯލުން ޗިލީގެ މައްޗަށް 1-0 ގެ ނަތީޖާ އަކުން އާޖެންޓީނާ ކުރި ހޯދައިފި އެވެ.
މި މުބާރާތުގައި އާޖެންޓީނާ ކުޅުނު ފުރަތަމަ މެޗުން ކެނަޑާގެ މައްޗަށް ކުރިހޯދީ 3-0 ގެ ނަތީޖާ އަކުންނެވެ.
މި މެޗު ފަށައިގެން އާޖެންޓީނާ އިން މެޗުގެ ކޮންޓްރޯލް ނަގައިގެން ކުޅުނުއިރު, މެޗުގެ 26 ވަނަ މިނެޓުގައި އާޖެންޓީނާގެ ރޮޑްރީގޯ ޑި ޕޯލް އޭރިއާގެ ބޭރުން ފޮނުވާލި ބާރު ހަމަލާ ގޯލާ އަމާޒުނުވެ ދިޔައީ ބޭރަށެވެ. އޭގެ މިނެޓެއް ފަހުން ވެސް ޑި ޕޯލް ވަނީ ނުރައްކާތެރި ހަމަލާ އެއް ފޮނުވާލައިފަ އެވެ. އެކަމަކު އެ ހަމަލާގެ ހުރަހަކަށްވީ ޗިލީގެ ކީޕަރު ކްލައުޑިއޯ ބްރާވޯ އެވެ.
އޭގެ ފަހުން މެޗުގެ 35 ވަނަ މިނެޓުގައި އޭރިއާ ބޭރުން އާޖެންޓީނާގެ ތަރި ލިއޮނަލް މެސީ ފޮނުވާލި ބާރު ހަމަލާ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.
ފުރަތަމަ ހާފު ނިމުމުގެ ކުރިން އާޖެންޓީނާ އަށް ލީޑު ނަގައިދޭން އެންޒޯ ފެނާންޑޭޒް ފޮނުވާލި ބާރު ހަމަލާވެސް ދިޔައީ ގޯލާ އަމާޒުނުވެ ބޭރަށެވެ.
ދެ ވަނަ ހާފު ފަށައިގެން ވެސް އާޖެންޓީނާ އިން ވަނީ ޗިލީގެ ހާފަށް ބާރުބޮޑު ކޮށްފަ އެވެ. އެ ގޮތުން، މެޗުގެ 49 ވަނަ މިނެޓުގައި މެސީ އޭރިއާ ތެރެއަށް ހުސްކޮށްދިން ބޯޅަ އެއް ނަހުއެލް މޮލީނާ ހުހަށް ހުރެ ފޮނުވާލި ނަމަވެސް މި ހަމަލާ ވެސް ބްރާވޯ ވަނީ ދިފާއު ކޮށްފަ އެވެ.
މެޗުގެ 61 ވަނަ މިނެޓުގައި ނިކޮލަސް ގޮންޒާލޭސް ވަނީ ޗިލީގެ އޭރިއާ ތެރެއަށް ވަދެ ބާރު ހަމަލާ އެއް ފޮނުވާލާފަ އެވެ. އެކަމަކު، އެ ހަމަލާ އަމާޒުވީ ގޯލުގެ ހުރަސް ދަނޑި އަށެވެ.
ޗިލީ އިން ގޯލު ޖެހުމާ އެންމެ ކައިރިކުރީ މެޗުގެ 72 ވަނަ މިނެޓުގައި ޗިލީގެ ރޮޑްރީގޯ އެޝަވަރިއާ އޭރިއާ ބޭރުން ފޮނުވާލި ބާރު ހަމަލާ އާޖެންޓީނާގެ ކީޕަރު އެމެލިއާނޯ މާޓިނޭޒް ވަނީ ހުށިޔާރުކަމާ އެކު ދިފާއު ކޮށްފަ އެވެ. އޭގެ ތިން މިނެޓު ފަހުން، ވެސް އެޝަވަރިއާ ވަނީ ނުރައްކާތެރި ހަމަލާ އެއް އޭރިއާ ތެރެއިން ފޮނުވާލައިފަ އެވެ. މި ފަހަރުވެސް އޭނާގެ ހަމަލާގެ ހުރަހަަކަށްވީ އާޖެންޓީނާގެ ކީޕަރު މާޓިނޭޒް އެވެ.
މެޗުގެ ފަހު 10 މިނެޓުގެ ތެރޭގައި އާޖެންޓީނާ އިން ގިނަ ބަދަލުތަކެއް ގެނަ އެވެ.
މެޗުގެ 88 ވަނަ މިނެޓުގައި އާޖެންޓީނާ މެޗުން މޮޅުކޮށްދިން ލަނޑު ޖަހާދިނީ ބަދަލު ކުޅުންތެރި އެއްގެ ގޮތުގައި ކުޅެން އެރި މާޓިނޭޒް އެވެ.
މިއީ، ޗިލީ ކުޅުންތެރިޔަކު އޭރިއާ ތެރެއިން ސާފު ކޮށްލަން ޖެހި ބޯޅަ ސީދާ މާޓިނޭޒް ފަޔަށް ދެވުމުން ހުހަށް ހުރެ, އޭރިއާ ތެރެއިން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކުރި ލަނޑެކެވެ. މި ލަނޑާ އެކު, ޗިލީ ކުޅުންތެރިން ވަނީ ވަރަށް ބޮޑަށް އެޕީލް ކޮށްފަ އެވެ. އެއީ ލަނޑުގެ ކުރިން އާޖެންޓީނާ ކުޅުންތެރިޔަކު ޗިލީގެ ކުޅުންތެރިޔަކަށް ފައުލްކުރި ކަމަށް ބުނެ އެވެ. އެކަމަކު ވީޑިއޯ އެސިސްޓެންޓް ރެފުރީ (ވީއޭއާރް) އިން ވަނީ އެ ގޯލަކީ ރަނގަޅަށް ޖެހި ގޯލެއް ކަމަށް ނިންމައިފަ އެވެ.
މެޗުގެ އިތުރު ވަގުތުގައި މާޓިނޭޒް އަށް ވަނީ ލީޑު ފުޅާކުރަން ރަނުގެ ފުރުސަތެއް ލިބި ބޭކާރުވެފަ އެވެ. އޭރިއާ ތެރެއިން ޑި މާރިއާ މުޅިން ހުސްކޮށްލާފައި މާޓިނޭޒް އަށް ދިން ބޯޅަ އޭނާ ފޮނުވާލި ނަމަވެސް ބްރާވޯ ވަނީ މާޓިނޭޒް ފޮނުވާލި ހަމަލާ ދިފާއު ކޮށްފަ އެވެ.
މިއީ އާޖެންޓީނާ މިދިޔަ އަށް އަހަރުގެ ތެރޭގައި ކޮޕަ އެމެރިކާ މުބާރާތުގައި ޗިލީ އަތުން ހޯދި ފުރަތަމަ މޮޅެވެ. އަދި މި މޮޅާއެކު, އާޖެންޓީނާ އަށް ވަނީ ކޮޕަ އެމެރިކާގެ ކުއާޓާ ފައިނަލުގެ ޖާގަ ކަށަވަރުވެފަ އެވެ.
