މަސްވެރިންނަށް ފައިސާ ނުދޭތީ ދ. ކުޑަހުވަދޫގައި މިއަދު ހަވީރު މުޒާހަރާކޮށްފި އެވެ.
ކުޑަހުވަދޫގެ މަސްވެރިން އެ ރަށު ބަނދަރު ސަރަހައްދުގައި ދޯނިތަކާއެކު މުޒާާރާ ކޮށްފައިވާއިރު، ގޮވާލާފައި ވަނީ މަސްވެރިންނަށް ސަރުކާރުން ވީ ވައުދުތައް ފުއްދައި، މަސްވެރިންނަށް ދޭން ޖެހޭ ފައިސާ ދިނުމަށެވެ.
މި މުޒާހަރާގައި ރަށުގެ ގިނަ ދޯނިތަކުން ބައިވެރިވެ، މަސްވެރިން ވަނީ ޝުއޫރު ފާޅުކޮށްފައި ހުރި ބޯޑުތަކާއި ބެނާތައް ބޭނުން ކޮށްފަ އެވެ.
މަސްވެރިންނަށް ދޭން ޖެހޭ ފައިސާ ދޫނުކުރާތީ އައްޑޫ ސިޓީ މީދޫގައި ހުންނަ އައްޑޫ ފިޝަރީޒް ކޮމްޕްލެކްސްގައި ވެސް އަންނަނީ މުޒާހަރާ ކުރަމުންނެވެ. އެ މުޒާހަރާއަށް ހަފްތާއެއް ވެފައިވާއިރު، މަސްވެރިންގެ އާއިލާތައް ވެސް މުޒާހަރާއާ ވަނީ ގުޅިފަ އެވެ.
މި ސަރުކާރު ވެރިކަމަށް އައިސްފައި ވަނީ މަސްވެރިން އަތުން މިފްކޯއަށް ގަންނަ މަހަށް 48 ގަޑިއިރު ތެރޭގައި ފައިސާ ދޭނެ ކަމަށް ވައުދު ވެގެންނެވެ. ނަމަވެސް އެ ވައުދު ނުފުއްދޭތީ މަސްވެރިން އަންނަނީ އަޑު އުފުލައި، ވައުދު ފުއްދަން ގޮވާލަމުންނެވެ.
މީގެ އިތުރުން މަސްވެރިންނަށް ފައިސާ ނުދީގެން އަދި ލޭނު އެޅުމާ ދެކޮޅަށް މާލޭގައި ޖޫން 12، ގައި ވެސް ވަނީ މުޒާހަރާއެއް ކޮށްފަ އެވެ. އެ މުޒާހަރާގައި 25 އެއްހާ ދޯނި މާލޭގައި މުޒާހަރާކުރިއިރު، މުޒާހަރާ ހުއްޓާލީ ބައެއް ޑިމާންޑުތައް ސަރުކާރުން ގަބޫލުކުރުމުންނެވެ.
މިފްކޯއިން ބުނީ މަސްވެރިންނަށް ދޭން ޖެހޭ ފައިސާ ދިނުމަށް ސަރުކާރުން މަސައްކަތް ކުރަމުން އަންނަ ކަމަށާއި ވީ އެންމެ އަވަހަކަށް ފައިސާ ދޫކުރާނެ ކަމަށެވެ. ނަމަވެސް ދުވަހެއް މިފްކޯއަކުން ނުބުނެ އެވެ.
