މޯލްޑިވްސް އިސްލާމިކް ބޭންކު ގޮތްޕެއް ލ. ގަމުގައި އަދި އޭޓީއެމް ސެންޓަރެއް ލ. ކައްދޫގައި ގާއިމުކޮށް އިއްޔެ ހިދުމަތް ދޭން ފަށައިފަ އެވެ.
އެމްއައިބީން ބުނީ ގަމުގައި ހުޅުވި ސާވިސް ސެންޓަރުން އެ ބޭންކުން ދޭ ހުރިހާ ހިދުމަތެއް ލިބޭނެ ކަމަށާއި އޭޓީއެމް މެދުވެރިކޮށް 24 ގަޑިއިރު ދިވެހި ރުފިޔާ ޖަމާކޮށް ނެގުމުގެ ހިދުމަތް ލިބޭނެ ކަމަށެވެ.
ބޭންކު އެކައުންޓް ހުޅުވުމާއި، ކާޑު ދޫކުރުމާއި، ރާއްޖޭން ބޭރަށް ފައިސާ ފޮނުވުމުގެ އިތުރުން ވިޔަފާރިތަކާއި އަމިއްލަ ފަރުދުން ބޭނުންވާ ބޭންކާ ގުޅޭ ހިދުމަތްތައް ސާވިސް ސެންޓަރުން ލިބޭނެ ކަމަށް އެމްއައިބީން ބުނެ އެވެެ.
"މިހާރު ލ. އަތޮޅުގެ ރައްޔިތުންނަށް ފަސޭހަ ކަމާއިއެކު މާލީ ފެސިލިޓީތަކަށް އެދެވޭނެ. އެގޮތުން ފަސޭހަ ކަމާއި އެކު ކާރު ބައްލަވައިގަނެވޭނެ. އަދި ގެދޮރު އިމާރާތް ކުރުމަށް ފައިނޭންސިން ހޯދޭނެ،" އެމްއައިބީން ބުންޏެވެ.
މީގެ އިތުރުން ލ. އަތޮޅުގައި ހިންގާ އެކި ވިޔަފާރިތަކަށް ބޭނުންވާ ޒަމާނީ ހިދުމަތްތަކެއް އެ ސެންޓަރުން ހޯދޭނެ ކަމަށާއި ޕީއޯއެސްގެ ހިދުމަތަށް އެދުމާއި ވިޔަފާރި އެކައުންޓު ހުޅުވުމާއި އިންޓަނެޓް ބޭންކިން އަށް އެދުމުގެ އިތުރުން މުސާރަ ޖަމާ ކުރުމުގެ ހިދުމަތްވެސް ލިބޭނެ ކަމަށް އެމްއައިބީން ބުނެ އެވެ.
އެމްއައިބީން އަންނަނީ އެ ބޭންކުގެ ހުރިހާ ހިދުމަތެއް ކަހަލަ ގޮތަކަށް ރައްކާތެރިކޮށް އޮންލައިންކޮށް ދެމުންނެވެ. އެގޮތުން ބޭންކަށް ނުގޮސް އެކައުންޓު ހުޅުވުމާއި، އިންޓަނެޓް ބޭންކިންއަށް ރަޖިސްޓާ ކުރުމުގެ އިތުރުން އުޖާލާ ދިރިއުޅުން ފެސިލިޓީއަށް ވެސް ބޭންކަށް ނުގޮސް އޮންލައިންކޮށް އެދެވެ އެވެ.
ޒަމާނީ ލުއި ފަސޭހަތަކާއިއެކު އެމްއައިބީއިން ދަނީ އެބޭންކުގެ ހިދުމަތް އެކި ކަންކޮޅުތަކަށް ފުޅާކުރަމުންނެވެ.
