ސްޓުޓްގާޓް (ޖޫން 24) - ޔޫރޯ ފުޓްބޯޅަ މުބާރާތުގައި ރޭ ސްކޮޓްލެންޑް އަތުން ހަންގޭރީ މޮޅުވި މެޗުގައި އެ ޓީމުގެ ފޯވާޑް، ބާނަބާސް ވާގާ އަށް ސީރިއަސް އަނިޔާއެއް ކުރިމަތިވެ، ހޭނެތުނުއިރު، ދަނޑުމަތީގައި ވެސް އަވަސް ފަރުވާ ދޭން ޖެހުނެވެ.
އޭގެ ފަހުން، ސީދާ ހޮސްޕިޓަލަށް ގެންގޮސް، ވާގާ، 29، އަށް އިތުރު ފަރުވާ ދިންއިރު، މިހާރު ހާލު ރަނގަޅުވަމުން އަންނަ ކަމަށް ހަންގޭރީ ފުޓްބޯޅަ އެސޯސިއޭޝަނުން ވަނީ މައުލޫމާތު ދީފަ އެވެ.
ހަންގޭރީން ސްކޮޓްލެންޑް ބަލިކުރީ އިތުރު ވަގުތުގެ ގޮތުގައި ދެއްކި 10 ވަނަ މިނިޓްގައި ކެވިން ސޮބޯތު ޖެހި ގޯލުންނެވެ. މި މެޗު އެހާ ގިނަ އިތުރު ވަގުތު ކުޅެން ޖެހުނީ، ދެ ވަނަ ހާފުގެ މެދެއްހާ ހިސާބުން ދިމާވި ހާދިސާއަކުން ގިނަ ވަގުތަށް މެޗު މެދުކަނޑާލުމުންނެވެ.
ހިލޭ ޖެހުމަށް ބޯޅައިގައި ބޮލުން ޖަހަން އަރައި، ވާގާ ދަނޑުމައްޗަށް ވެއްޓެނީ
އެ ގޮތުން މެޗުގެ 71 ވަނަ މިނިޓްގައި، ހަންގޭރީގެ ކެޕްޓަން، ޑޮމިނިކް ސޮބޯސްލާއި ނެގި ހިލޭ ޖެހުމަކަށް ބޮލުން ޖަހަން އެރި، ވާގާ އާއި ސްކޮޓްލެންޑް ކީޕަރު އެންގަސް ގަން ޖެހި، ވާގާ ވެއްޓުނު ގޮތަށް އޮތީ ހަރަކާތް ހުއްޓިފަ އެވެ.
ހަންގޭރީ ކުޅުންތެރިން، ވާގާ، ވަށާލައި، އޭނާ އަށް އަވަސް ފަރުވާ ދޭން މެޑިކަލް މީހުން އެރުވި އެވެ.
ދަނޑުމަތީގައި ވާގާ އަށް އަވަސް ފަރުވާ ދިނުމަށް ފަހު، ސްޓްރެޗަރުގައި ދަނޑުން ބާލައި، އެމްބިއުލަންސަށް ލައިގެން ވަގުތުން ހޮސްޕިޓަލަށް ގެންގޮސް ފަރުވާ ފެށި އެވެ.
މެޗު ނިމުނުތާ ވިއްސަކަށް މިނިޓް ފަހުން، ހަންގޭރީ ޓީމުން ވަނީ، ވާގާ ހޭއަރާފައިވާ ކަމަށާއި ހާލު ވެސް ރަނގަޅުވަމުން އަންނަ ކަމަށް ބުނެފަ އެވެ.
ވާގާ އަށް ދަނޑުމަތީގައި އަވަސް ފަރުވާ ދިނުމަށް ފަހު ދަނޑުން ބާލަނީ.
އެ ގޮތުން، ވާގާގެ ދަތްދޮޅި އަށް ސީރިއަސް އަނިޔާއެއްވެފައިވާތީ، ވަރަށް އަވަހަށް އޮޕަރޭޝަނެއް ކުރަންވަނީ ނިންމައިފަ އެވެ.
މެޗުގައި ހަންގޭރީ މޮޅުވި ގޯލު ޖެހި، ސޮބޯތު ވަނީ އުފާފާޅުކުރުމުގެ ތެރޭގައި ވާގާގެ ޖޯޒީއެއް ދައްކާލައި، އޭނާ އަށް ޓީމުގެ ފަރާތުން ހިތްވަރު ދީފަ އެވެ.
ވާގާގެ ޖޯޒީ ސޮބޯތުއާ ހަވާލުކުރީ ހަންގޭރީގެ ކެޕްޓަން، ޑޮމިނިކް ސޮބޯސްލާއި އެވެ. ވާގާ އަށް އަވަސްފަރުވާ ދިނުމުގައި، އެންމެ އިސްކޮށް ހަރަކާތްތެރިވި އެއް ކުޅުންތެރިއަކީ ސޮބޯސްލާއި އެވެ.
